IPL 2026: ആദ്യ 37 പന്തിൽ 20 റൺസ്, പിന്നെ 23 പന്തിൽ 54; സിഎസ്കെയുടെ മാനം കാത്ത് റുതുരാജ്, കിടിലൻ ഫിഫ്റ്റിക്ക് കെെയടി

ഇന്ത്യൻ പ്രീമിയർ ലീഗിന്റെ 2026 സീസണിൽ നിരാശപ്പെടുത്തുന്ന പ്രകടനം നടത്തിയ താരങ്ങളിലൊരാളാണ് ചെന്നെെ സൂപ്പർ കിങ്സ് നായകനായ റുതുരാജ് ഗെയ്ക് വാദ്. ഓറഞ്ച് ക്യാപ്പടക്കം നേടിയിട്ടുള്ള റുതുരാജിന്റെ ഈ സീസണിലെ മോശം പ്രകടനം വലിയ വിമർശനങ്ങളും ഏറ്റുവാങ്ങിയിരുന്നു. എന്നാൽ‌ ഗുജറാത്ത് ടെെറ്റൻസിനെതിരേ ചെന്നെെ സൂപ്പർ കിങ്സിനെ വലിയ മാനക്കേടിൽ നിന്ന് രക്ഷിച്ച് കെെയടി നേടിയിരിക്കുകയാണ് റുതുരാജ് ഗെയ്ക് വാദ്. ഗുജറാത്തിനെതിരേ 60 പന്തിൽ 74 റൺസോടെയാണ് റുതുരാജ് പുറത്താവാതെ നിന്നത്. ആറ് ഫോറും നാല് സിക്സും ഉൾപ്പെടെയായിരുന്നു താരത്തിന്റെ പ്രകടനം. 123.33 സ്ട്രെെക്ക് റേറ്റ് മാത്രമായിരുന്നു റുതുരാജിന് ഉണ്ടായിരുന്നതെങ്കിലും മത്സരത്തിന്റെ സാഹചര്യം നോക്കുമ്പോൾ പൊന്നുംവിലയുള്ള പ്രകടനമാണ് റുതുരാജ് കാഴ്ചവെച്ചതെന്ന് പറയാം.

ഗുജറാത്തിനെതിരേ സ്വന്തം തട്ടകമായ ചെപ്പോക്കിൽ ബാറ്റ് ചെയ്യാനിറങ്ങിയ സിഎസ്കെയ്ക്ക് പ്രതീക്ഷിച്ച തുടക്കമല്ല ലഭിച്ചത്. ഒരുവശത്ത് വിക്കറ്റ് വീണപ്പോൾ പിടിച്ചുനിന്ന് പൊരുതിയ റുതുരാജ് 158 എന്ന ഭേദപ്പെട്ട സ്കോറിലേക്കും സിഎസ്കെയെ എത്തിച്ചു. ആദ്യത്തെ 37 പന്തിൽ റുതുരാജ് നന്നായി പ്രയാസപ്പെട്ടു. 20 റൺസ് മാത്രമാണ് അദ്ദേഹത്തിന് നേടാനായത്. തുടർച്ചയായി വിക്കറ്റ് വീണ സാഹചര്യത്തിൽ പ്രതിരോധിച്ച് കളിക്കേണ്ടത് റുതുരാജിനെ സംബന്ധിച്ച് അനിവാര്യമായിരുന്നു.

താളം കണ്ടെത്തിയ ശേഷം ഫോമിലേക്കെത്തിയ റുതുരാജ് ആക്രമണത്തിലേക്ക് ഗിയർ മാറ്റി. പിന്നീടുള്ള 23 പന്തിൽ നിന്ന് 54 റൺസാണ് റുതുരാജ് നേടിയെടുത്തത്. 234.7 സ്ട്രെെക്ക് റേറ്റിലായിരുന്നു റുതുരാജ് കത്തിക്കയറിയത്. ഒരു ഘട്ടത്തിൽ സിഎസ്കെ 100 പോലും കടക്കില്ലെന്ന് തോന്നിച്ചിടത്തുനിന്ന് നായകനെന്ന നിലയിൽ മുന്നിൽ നിന്ന് പൊരുതാൻ റുതുരാജിന് സാധിക്കുകയായിരുന്നു.
IPL 2026: ചരിത്ര നേട്ടത്തിൽ‌ സഞ്ജു സാംസൺ, എലെെറ്റ് ക്ലബ്ബിൽ ഇനി കോഹ്ലിക്കും രോഹിത്തിനുമൊപ്പം; ധോണിയെ പിന്നിലാക്കി വമ്പൻ റെക്കോ‍ഡും
ഈ സീസണിൽ റുതുരാജ് നേടുന്ന ആദ്യ അർധ സെഞ്ചുറിയാണിത്. ഏറ്റവും നിർണ്ണായകമായ സമയത്ത് ആ ഫിഫ്റ്റി പ്രകടനം ഉണ്ടായി എന്നതാണ് എടുത്തു പറയേണ്ട കാര്യം. 22 റൺസെടുത്ത ശിവം ദുബെയാണ് സിഎസ്കെയുടെ രണ്ടാമത്തെ ടോപ് സ്കോറർ. സിഎസ്കെയുടെ തട്ടകത്തിലെ പരീക്ഷണങ്ങളെല്ലാം പാളിയെന്നതാണ് എടുത്തു പറയേണ്ടത്. സഞ്ജു സാംസണിന്റെ ബാറ്റിങ് മികവ് ഇന്ന് കാണാൻ സാധിച്ചില്ല. 15 പന്ത് നേരിട്ട് 11 റൺസെടുത്താണ് സഞ്ജു പുറത്തായത്.

സഞ്ജുവിന്റെ വിക്കറ്റ് സിഎസ്കെയെ സമ്മർദ്ദത്തിലാക്കി. പിന്നാലെ എത്തിയവരെയെല്ലാം ഇത് ബാധിച്ചുവെന്നതാണ് വസ്തുത. ഉർവിൽ പട്ടേൽ മൂന്ന് പന്തിൽ നാല് റൺസെടുത്ത് പുറത്തായപ്പോൾ സർഫറാസ് ഖാൻ ഗോൾഡൻ‌ ഡക്കായി. വെടിക്കെട്ട് താരമായ ഡെവാൾഡ് ബ്രെവിസ് പരിക്ക് ഭേദമായി തിരിച്ചെത്തിയെങ്കിലും പഴയ താളം കണ്ടെത്താൻ സാധിച്ചിട്ടില്ല.

IPL 2026: ഇവർ കളിക്കുന്നത് ടീമിനെ തോൽപ്പിക്കാനോ? ബാധ്യതയാകുന്ന താരങ്ങൾ ഇവരാണ്; നാല് ക്യാപ്റ്റന്മാരും പട്ടികയിൽ

ഗുജറാത്തിനെതിരേ 9 പന്ത് നേരിട്ട് 2 റൺസ് മാത്രമാണ് ബ്രെവിസിന് നേടാനായത്. ശിവം ദുബെ 17 പന്തിൽ 22 റൺസാണ് നേടിയത്. യുവതാരം കാർത്തിക് ശർമക്കും അവസരം മുതലാക്കാനായില്ല. 9 പന്തിൽ 15 റൺസാണ് താരം നേടിയത്. ജാമി ഓവർട്ടൻ ആറ് പന്തിൽ 18 റൺസും നേടി.