IPL 2026: ആദ്യ റൗണ്ട് പൂർത്തിയായി, പ്ലേ ഓഫിലെത്താൻ കൂടുതൽ സാധ്യത ആർക്കൊക്കെ? കെവിൻ പീറ്റേഴ്സണിന്റെ പ്രവചനം

ഇന്ത്യൻ പ്രീമിയർ ലീഗിന്റെ 2026 സീസൺ ആവേശകരമായി പുരോഗമിക്കുകയാണ്. ആദ്യ റൗണ്ട് മത്സരങ്ങൾ പൂർത്തിയാകുമ്പോൾ പല വമ്പന്മാരും പ്രതീക്ഷിച്ച നിലവാരം കാട്ടുന്നില്ലെന്നതാണ് എടുത്തു പറയേണ്ടത്. ഇതിൽ‌ ചെന്നെെ സൂപ്പർ കിങ്സ് ആദ്യത്തെ രണ്ട് മത്സരങ്ങളും തോറ്റത് ആരാധകരെ നിരാശരാക്കുന്ന കാര്യമാണ്. അഞ്ച് തവണ ചാമ്പ്യന്മാരായ സിഎസ്കെയുടെ ആദ്യ രണ്ട് മത്സരത്തിലെ പ്രകടനവും മോശമാണ്.മൂന്ന് തവണ ചാമ്പ്യന്മാരായ കൊൽക്കത്ത നെെറ്റ് റെെഡേഴ്സിനും ആദ്യ റൗണ്ടിൽ പ്രതീക്ഷിച്ച പ്രകടനം നടത്താൻ സാധിച്ചിട്ടില്ല. പല പ്രധാന താരങ്ങളുടേയും ആദ്യ റൗണ്ടുകളിലെ പ്രകടനം നിരാശപ്പെടുത്തുന്നതാണെന്ന് കാണാൻ സാധിക്കും. ഇപ്പോഴിതാ ആദ്യ രണ്ട് റൗണ്ടിലെ പോരാട്ടം വിലയിരുത്തി ഇത്തവണ പ്ലേ ഓഫിലെത്താൻ സാധ്യതയുള്ള ടീമുകൾ ഏതൊക്കെയാണെന്ന് പ്രവചിച്ചിരിക്കുകയാണ് കെവിൻ പീറ്റേഴ്സൻ.

മുംബെെ ഇന്ത്യൻസ് , രാജസ്ഥാൻ റോയൽസ് , ഡൽഹി ക്യാപിറ്റൽസ് , പഞ്ചാബ് കിങ്സ് എന്നീ ടീമുകൾ പ്ലേ ഓഫിലെത്തുമെന്നാണ് പീറ്റേഴ്സൻ പറയുന്നത്. മുംബെെ ഇന്ത്യൻസ് ഇത്തവണ വലിയ പ്രതീക്ഷയാണ് നൽകുന്നത്. തോറ്റ് തുടങ്ങുന്ന മുംബെെ ഇത്തവണ വിജയത്തോടെയാണ് ആരംഭിച്ചിരിക്കുന്നത്. കൊൽക്കത്ത നെെറ്റ് റെെഡേഴ്സിനെ ആറ് വിക്കറ്റിനാണ് മുംബെെ തോൽപ്പിച്ചത്.

മുംബെെയുടെ സൂപ്പർ താരങ്ങളെല്ലാം മികച്ച ഫോമിൽ കളിക്കുന്നതാണ് കാണാനാവുന്നത്. ഇതിൽ സീനിയർ താരം രോഹിത് ശർമയുടെ മികച്ച ഫോമും ഉൾപ്പെടും. ഇത്തവണ മുംബെെ ഇന്ത്യൻസിന്റെ ആദ്യ മത്സരത്തിലെ പ്രകടനം വലിയ പ്രതീക്ഷ നൽകുന്ന കാര്യം തന്നെയാണെന്ന് പറയാം. ആറാം കിരീട പ്രതീക്ഷയോടെയാണ് മുംബെെ ഇത്തവണ മുന്നോട്ട് പോകുന്നത്.
IPL 2026: സ്ഥിരതകാട്ടാതെ സഞ്ജു, വേട്ടയാടുന്നത് ആ പഴയ പ്രശ്നം, യുവരാജ് സിങ്ങിന്റെ ഉപദേശവും ഫലിച്ചില്ലേ? സിഎസ്കെയ്ക്ക് ആശങ്ക
ഡൽഹി ആദ്യ മത്സരത്തിൽ ലഖ്നൗ സൂപ്പർ ജയ്ന്റ്സിനെ തോൽപ്പിച്ചു. എന്നാൽ ഡൽഹിയുടെ ബാറ്റിങ് നിര വലിയ പ്രതീക്ഷ നൽകുന്നതല്ലെന്ന് പറയാം. അക്ഷർ പട്ടേലും സംഘവും ബൗളിങ്ങിൽ കരുത്തുറ്റ നിരയാണെങ്കിലും ബാറ്റിങ്ങിൽ ഇനിയും മികവ് തെളിയിക്കേണ്ടിയിരിക്കുന്നു. കെ എൽ രാഹുൽ ആദ്യ മത്സരത്തിൽ ഫ്ളോപ്പായത് ഡൽഹിക്ക് ആശങ്കയുണ്ടാക്കുന്ന കാര്യമാണ്. രാഹുലിന്റെ ഫോം വരുന്ന മത്സരങ്ങളിൽ ഡൽഹിക്ക് വളരെ നിർണ്ണായകമാണ്.

രാജസ്ഥാൻ റോയൽസ് ആദ്യ മത്സരത്തിൽ ചെന്നെെ സൂപ്പർ കിങ്സിനെയാണ് തോൽപ്പിച്ചത്. ആദ്യ മത്സരത്തിൽത്തന്നെ ഒത്തിണക്കത്തോടെ കളിക്കുന്ന രാജസ്ഥാനെയാണ് കാണാനായത്. റിയാൻ പരാഗിന് കീഴിൽ മികച്ച പ്രകടനം നടത്താൻ രാജസ്ഥാന് സാധിക്കുന്നു. സഞ്ജു സാംസണിന്റെ അഭാവം രാജസ്ഥാനെ ഇത്തവണ പ്രതികൂലമായി ബാധിച്ചിട്ടില്ല. ഈ സീസണിൽ കപ്പിലേക്കെത്താൻ തങ്ങൾക്ക് കഴിവുണ്ടെന്ന് ആദ്യ മത്സരത്തിലൂടെത്തന്നെ തെളിയിക്കാൻ‌ രാജസ്ഥാനായി.

IPL 2026: ഭയന്നത് സംഭവിച്ചു, ചെപ്പോക്കിൽ നിരാശപ്പെടുത്തി സഞ്ജു; പഞ്ചാബിനോടും ഒറ്റ സംഖ്യയിൽ പുറത്തായി; തിരിച്ചുവരവ് പ്രതീക്ഷയിൽ ആരാധകർ

പഞ്ചാബ് കിങ്സ് അവസാന സീസണിലെ റണ്ണറപ്പുകളാണ്. ഇത്തവണയും മികച്ച പ്രകടനം പുറത്തെടുക്കാൻ അവർക്ക് സാധിക്കുന്നുണ്ട്. ആദ്യ രണ്ട് മത്സരത്തിലും ജയിച്ച പഞ്ചാബ് അച്ചടക്കമുള്ള നിരയാണെന്ന് തെളിയിക്കുകയാണ്. ശ്രേയസ് അയ്യർ എന്ന നായകന് കീഴിൽ പഞ്ചാബിന് തകർപ്പൻ പ്രകടനം പുറത്തെടുക്കാൻ സാധിക്കുന്നുണ്ട്. ഇത്തവണ പഞ്ചാബ് പ്ലേ ഓഫിലെത്താൻ സാധ്യത കൂടുതലാണെന്ന് തന്നെ പറയാം. പീറ്റേഴ്സണിന്റെ പ്രവചനം കൃത്യമാകുമോയെന്നത് കാത്തിരുന്ന് കാണാം.