IPL 2026: ആരാധകരുടെ കെെയടി നേടിയ താരങ്ങൾ, പക്ഷെ ഇത്തവണ ഒറ്റ മത്സരം കളിച്ചേക്കില്ല; വാട്ടർ ബോയിസ് ആകാൻ ഇവർ

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ ഇനി ഏഴ് ദിവസമാണ് ബാക്കിയുള്ളത്. ടീമുകളെല്ലാം അവസാന ഘട്ട പടയൊരുക്കത്തിലേക്ക് കടന്ന് കഴിഞ്ഞു. അവസാന സീസണിലെ പിഴവുകൾ മിനി താരലേലത്തിലൂടെ തിരുത്തിയ ടീമുകൾ ശക്തമായ തിരിച്ചുവരവാണ് ഈ സീസണിൽ ലക്ഷ്യമിടുന്നത്. ആർസിബി ഇത്തവണ കിരീടം നിലനിർത്തുമോ അതോ മറ്റേതെങ്കിലും ടീം കപ്പ് നേടുമോയെന്നതാണ് കണ്ടറിയേണ്ടത്.എന്തായാലും എല്ലാ ടീമിനും ഇത്തവണ ശക്തമായ ടീം കരുത്ത് അവകാശപ്പെടാൻ സാധിക്കും. പരിക്ക് ഒരുവശത്ത് വെല്ലുവിളി തീർക്കുമ്പോഴും അതിനെ മറികടക്കാനുള്ള ടീം കരുത്ത് എല്ലാ ടീമുകൾക്കുമുണ്ടെന്ന് തന്നെയാണ് ആരാധകർ പ്രതീക്ഷിക്കുന്നത്. എന്നാൽ ഇത്തവണത്തെ ഐപിഎല്ലിൽ ആരാധകരുടെ പ്രിയപ്പെട്ട ചില താരങ്ങളെങ്കിലും ഒരു മത്സരം പോലും കളിക്കാതെ ബെഞ്ചിലേക്ക് ഒതുക്കപ്പെടാൻ സാധ്യതയുണ്ട്. ഇത് ആരൊക്കെയാണെന്ന് പരിശോധിക്കാം.

ചെന്നെെ സൂപ്പർ കിങ്സ് നിരയിലെ സ്പിന്നർമാരിലൊരാളാണ് ശ്രേയസ് ഗോപാൽ. ഐപിഎല്ലിൽ കളിച്ച് അനുഭവസമ്പത്തുള്ള താരമാണെങ്കിലും സമീപകാലത്തെ ശ്രേയസിന്റെ പ്രകടനം അത്ര മികച്ചതല്ല. ഈ സീസണിൽ സിഎസ്കെയുടെ സ്പിൻ നിരയിൽ ശ്രേയസ് ഉൾപ്പെടാൻ സാധ്യത കുറവാണ്. പരിക്ക് ബാധിക്കാത്ത സാഹചര്യത്തിൽ ശ്രേയസ് ഗോപാൽ എല്ലാ മത്സരത്തിലും ബെഞ്ചിൽ ഇരിക്കാനാണ് സാധ്യത കൂടുതൽ.

രണ്ടാമത്തെ താരം കരുൺ നായരാണ്. ഡൽഹി ക്യാപിറ്റൽസിൽ ഉൾപ്പെട്ട കരുൺ നായർ ഈ സീസണിൽ ബെഞ്ചിലിരിക്കാൻ സാധ്യത കൂടുതലാണ്. ടോപ് ഓഡറിലും മധ്യനിരയിലും ഉപയോഗിക്കാവുന്ന താരമാണ് കരുൺ നായർ. എന്നാൽ സ്ഥിരതയും സ്ട്രെെക്ക് റേറ്റും താരത്തിന് പ്രശ്നമാണ്. ഇത്തവണ ഡൽഹിയുടെ ബെഞ്ചിലേക്ക് കരുൺ ഒതുക്കപ്പെടാൻ സാധ്യത കൂടുതലാണെന്ന് തന്നെ പറയാം.
IPL 2026: ഇന്ത്യൻ ടീമിലെ സുഹൃത്തുക്കൾ, പക്ഷെ ഐപിഎല്ലിൽ തമ്മിലടിച്ചു! സഞ്ജുവിനോടും കൊമ്പുകോർത്തു, ഇത്തവണ ആവർത്തിക്കുമോ?
കൊൽക്കത്ത നെെറ്റ് റെെഡേഴ്സ് നിരയിലെ സീനിയർ താരമാണ് മനീഷ് പാണ്ഡെ. ഐപിഎല്ലിൽ ആദ്യ സെഞ്ചുറി നേടിയ ഇന്ത്യക്കാരനാണ് മനീഷ് പാണ്ഡെ. ടി20യിൽ ഭേദപ്പെട്ട റെക്കോഡും മനീഷിന് അവകാശപ്പെടാനാവും. എന്നാൽ മികച്ച സ്ട്രെെക്ക് റേറ്റിൽ കളിക്കുന്ന താരമല്ല മനീഷ്. ഇത്തവണ കെകെആറിൽ മനീഷ് പാണ്ഡെ ബെഞ്ചിലിരിക്കാനുള്ള സാധ്യതയാണ് കൂടുതൽ.

മുംബെെ ഇന്ത്യൻസിന്റെ ഓൾറൗണ്ടർമാരിലൊരാളാണ് ശാർദ്ദുൽ ഠാക്കൂർ. സീനിയർ താരമായ ശാർദ്ദുലിനെ ഇത്തവണ മുംബെെ ടീമിലെത്തിച്ചെങ്കിലും കളിപ്പിക്കാൻ സാധ്യത കുറവാണ്. ഇത്തവണ മുംബെെയുടെ ബെഞ്ചിൽ വാട്ടർബോയിയായി ശാർദ്ദുൽ മാറാനുള്ള സാധ്യതയാണ് കൂടുതലെന്ന് പറയാം. താരസമ്പന്നമായ മുംബെെയുടെ പ്ലേയിങ് 11ൽ ഇടം നേടാൻ ശാർദ്ദുൽ‌ ഠാക്കൂറിന് സാധിച്ചേക്കില്ല.

രോഹിത്തും കോഹ്ലിയും ഏകദിന ലോകകപ്പിനുണ്ടാവില്ലേ? സീറ്റുറപ്പിക്കാതെ ബിസിസിഐ, ഐപിഎല്ലിന് ശേഷം നിർണ്ണായക തീരുമാനം

പഞ്ചാബ് കിങ്സിന്റെ പ്ലേയിങ് 11ൽ മുഷീർ ഖാനും ഇടം പ്രതീക്ഷിക്കാനാവില്ല. മുംബെെയ്ക്കായി ആഭ്യന്തര ക്രിക്കറ്റിൽ തിളങ്ങുന്ന മുഷീർ ഖാന് പഞ്ചാബ് പ്ലേയിങ് 11ൽ ഇടം നേടുക പ്രയാസമായിരിക്കുമെന്ന് തന്നെ പറയാം. രാജസ്ഥാൻ റോയൽസ് ഇത്തവണ ടീമിലെത്തിച്ച വിഘ്നേഷ് പുത്തൂർ ഒരു മത്സരം പോലും കളിക്കാൻ സാധ്യതയില്ല. യുവ സ്പിന്നർ ബെഞ്ചിലിരിക്കാനാണ് സാധ്യത കൂടുതൽ. ലഖ്നൗ സൂപ്പർ ജയ്ന്റ്സിന്റെ ഭാഗമായുള്ള അർജുൻ ടെണ്ടുൽക്കർക്കും ഇത്തവണ അവസരം ലഭിക്കാൻ സാധ്യതയില്ലെന്ന് തന്നെ പറയാം.