IPL 2026: ഇംപാക്ട് പ്ലയറോ ഫിനിഷറോ? ധോണിയിൽ നിന്ന് സിഎസ്കെ അത്ഭുത പ്രകടനം പ്രതീക്ഷിക്കണോ? മുഹമ്മദ് കെെഫ് പറയുന്നത് ഇങ്ങനെ

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ പോവുകയാണ്. ഈ മാസം 28ന് ആരംഭിക്കുന്ന ഐപിഎല്ലിലൂടെ ചില സൂപ്പർ താരങ്ങളുടെ വെടിക്കെട്ട് പ്രകടനം വീണ്ടും കാണാനുള്ള അവസരമാണ് ആരാധകർക്ക് ലഭിക്കുന്നത്. ഇതിൽ അന്താരാഷ്ട്ര ക്രിക്കറ്റിൽ നിന്ന് വിരമിച്ച ചില താരങ്ങളുടെ പ്രകടനം വീണ്ടും കാണാൻ സാധിക്കുമെന്നതാണ് ആരാധകരെ കൂടുതൽ ആവേശത്തിലാക്കുന്നത്. ഇതിൽ ഏറ്റവും കൂടുതൽ ആരാധകർ കാത്തിരിക്കുന്നത് എംഎസ് ധോണിയുടെ ബാറ്റിങ് കാണാനാണ്. ലഭിക്കുന്ന റിപ്പോർട്ട് പ്രകാരം ഈ സീസണോടെ ധോണി വിരമിക്കൽ പ്രഖ്യാപിക്കും. അതുകൊണ്ടുതന്നെ ധോണി എവിടെ ബാറ്റ് ചെയ്യും ഇംപാക്ട് പ്ലയറായിട്ടാണോ കളിക്കുക തുടങ്ങിയ പല ചോദ്യങ്ങളും ആരാധകർക്ക് മുന്നിലുണ്ട്. ധോണിയുടെ സൂപ്പർ പ്രകടനത്തിനായി കാത്ത് നിൽക്കുന്നവരോട് പഴയ വെടിക്കെട്ട് ഇനി പ്രതീക്ഷിക്കേണ്ടെന്ന് അഭിപ്രായപ്പെട്ടിരിക്കുകയാണ് മുഹമ്മദ് കെെഫ്.

'പലയാളുകളും ധോണി ഇംപാക്ട് പ്ലയറായി ഇറങ്ങുമെന്ന് പറയുന്നവരാണ്. എന്നാൽ ഞാൻ അതിനെ പൂർണ്ണമായും എതിർക്കുന്നു. ധോണിക്ക് ഇനി ഇംപാക്ട് പ്ലയറായി കളിക്കാനാവില്ല.എട്ടാം നമ്പറിൽ ബാറ്റ് ചെയ്ത് 12 പന്തിൽ 6 റൺസാവും ധോണിക്ക് നേടാനാവുക. 20 ഓവറിൽ വിക്കറ്റ് കീപ്പറായിരുന്ന് എല്ലായിടത്തേക്കും തന്റെ കണ്ണോടിച്ച് മത്സരം നിയന്ത്രിക്കുകയും ഫീൽഡ് ഒരുക്കുകയും കൂടാതെ ബൗളിങ് ചെയ്ഞ്ചുകൾക്ക് റുതുരാജ് ഗെയ്ക് വാദിനെ സഹായിക്കുകയും ചെയ്യുന്നു.

ടീം എപ്പോഴൊക്കെ സമ്മർദ്ദത്തിലാകുമോ അപ്പോഴൊക്കെ ധോണിയുടെ ഇടപെടൽ ഉണ്ടാവും. റുതുരാജ് ക്യാപ്റ്റനാണെങ്കിലും ഇപ്പോഴും നിയന്ത്രണം ധോണിയുടെ കെെയിലാണെന്നാണ് കരുതുന്നത്' മുഹമ്മദ് കെെഫ് പറഞ്ഞു. സിഎസ്കെ ഇത്തവണ ശക്തമായ താരനിരയാണ്. അവസാന സീസണിലെ വിടവുകൾ നികത്താൻ ഇത്തവണ സിഎസ്കെയ്ക്ക് സാധിച്ചിട്ടുണ്ട്.
​ഗൗതം ​ഗംഭീറല്ല, എന്നെ ക്യാപ്റ്റനാക്കാൻ തീരുമാനിച്ചത് ആ 4 പേർ; ടി20 ലോകകപ്പിന് പിന്നാലെ വെളിപ്പെടുത്തലുമായി സൂര്യകുമാർ യാദവ്
രവീന്ദ്ര ജഡേജയും സാം കറനും സിഎസ്കെ വിട്ടപ്പോൾ പകരം സഞ്ജു സാംസണെ സിഎസ്കെ സ്വന്തമാക്കി. ഇത്തവണ സഞ്ജുവിന്റെ വരവ് സിഎസ്കെയ്ക്ക് ഗുണം ചെയ്തേക്കും. സഞ്ജുവിന്റെ സമീപകാല ഫോം സിഎസ്കെയുടെ പ്രതീക്ഷ വാനോളം ഉയർത്തുന്നു. ഡെവാൾഡ് ബ്രെവിസ്, ആയുഷ് മാത്രെ, സർഫറാസ് ഖാൻ, ഉർവിൽ പട്ടേൽ എന്നിവരെല്ലാം സിഎസ്കെയുടെ ബാറ്റിങ് നിരയിലുണ്ട്. ശിവം ദുബെ ടി20 ലോകകപ്പിൽ കിടിലൻ പ്രകടനം നടത്തിയതും സിഎസ്കെയുടെ കരുത്തുയർത്തുന്നു.

രവീന്ദ്ര ജഡേജക്ക് പകരം അക്കീൽ ഹൊസീൻ വന്നെങ്കിലും മികച്ച പേസർമാരുടെ അഭാവം സിഎസ്കെയിലുണ്ട്. മതീഷ പതിരാനയെ സിഎസ്കെ ഒഴിവാക്കിയപ്പോൾ‌ പകരം എടുത്തു പറയാവുന്ന ഒരു പേസറെ കൊണ്ടുവരാനായില്ല. ഖലീൽ അഹമ്മദ്, മുകേഷ് ചൗധരി, നതാൻ എല്ലിസ്, മാറ്റ് ഹെൻ റി എന്നിവരെയൊന്നും വിശ്വസ്തരെന്ന് വിളിക്കാനാവില്ല. ഈ വെല്ലുവിളിയെ സിഎസ്കെ എങ്ങനെ മറികടക്കുമെന്നതാണ് പ്രധാനപ്പെട്ട ചോദ്യം.

IPL 2026: ഐപിഎൽ പടിവാതുക്കൽ, പരിക്കിൽ വലഞ്ഞ് ടീമുകൾ; കൂടുതൽ തിരിച്ചടി ആർക്ക്? തലപുകച്ച് ഈ മൂന്ന് ടീമുകൾ

സ്എസ്കെയുടെ തലയായി ഇത്തവണയും ധോണി തുടരുന്നത് പ്രതീക്ഷ നൽകുന്ന കാര്യമാണ്. ഈ സീസണിൽ കിരീടത്തോടെ ധോണിക്ക് പടിയിറങ്ങാൻ സാധിക്കുമോയെന്നതാണ് കണ്ടറിയേണ്ടത്. സിഎസ്കെയുടെ ടീം കരുത്ത് ശക്തമാണെങ്കിലും ഫോം എങ്ങനെയാവുമെന്നതാണ് ഇനി കാത്തിരുന്ന് കാണേണ്ടത്. ധോണിക്ക് മിന്നിക്കാനാവുമെന്ന് തന്നെ പ്രതീക്ഷിക്കാം.