IPL 2026: ഇത്രയും നാൾ ധോണിയുടെ നിഴൽ, റുതുരാജ് തുടരട്ടെ; സഞ്ജുവിനെ സിഎസ്കെ ക്യാപ്റ്റനാക്കേണ്ടെന്ന് ഇർഫാൻ പഠാൻ

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ പോവുകയാണ്. 10 ടീമുകളും സജീവ കിരീട പ്രതീക്ഷയോടെയാണ് ഇത്തവണയും ഇറങ്ങുന്നത്. വമ്പൻ ടീമുകളെല്ലാം ഇടവേളക്ക് ശേഷം കപ്പിലേക്കെത്താനുള്ള തയ്യാറെടുപ്പിലാണ്. ഇതിൽ എല്ലാവരും ഉറ്റുനോക്കുന്ന ടീമുകളിലൊന്ന് ചെന്നെെ സൂപ്പർ കിങ്സാണ്. എംഎസ് ധോണി യെന്ന ഇതിഹാസത്തിന്റെ ടീമായ സിഎസ്കെ ഇത്തവണ ആറാം കിരീടമാണ് ലക്ഷ്യമിടുന്നത്.രാജസ്ഥാൻ റോയൽസിൽ നിന്ന് സഞ്ജു സാംസണെക്കൂടി ഒപ്പം കൂട്ടിയ സിഎസ്കെ ഇത്തവണ കിരീട പ്രതീക്ഷ സജീവമാക്കുകയാണ്. സഞ്ജു സാംസൺ ടീമിലേക്ക് വന്നതോടെ നിലവിലെ സിഎസ്കെ നായകനായ റുതുരാജ് ഗെയ്ക് വാദിനെ മാറ്റണമെന്ന ആവശ്യം ഒരു ഭാഗത്ത് നിന്ന് ശക്തമായി ഉയരുന്നുണ്ട്. 2024ൽ സിഎസ്കെയുടെ ക്യാപ്റ്റനായ റുതുരാജിന് നായകനെന്ന നിലയിൽ വലിയൊരു ഇംപാക്ട് സൃഷ്ടിക്കാനായിട്ടില്ല.

ഇപ്പോഴിതാ റുതുരാജിനെ തിടുക്കപ്പെട്ട് സിഎസ്കെയുടെ നായകസ്ഥാനത്ത് നിന്ന് മാറ്റരുതെന്നും സമയം നൽകണമെന്നും ആവശ്യപ്പെട്ടിരിക്കുകയാണ് മുൻ ഇന്ത്യൻ പേസ് ഓൾറൗണ്ടറായ ഇർഫാൻ പഠാൻ. 'സഞ്ജു സാംസണ് സിഎസ്കെയുടെ നായക ദൗത്യം പെട്ടെന്ന് നൽകുമെന്ന് കരുതുന്നില്ല. നായകനെന്ന നിലയിൽ റുതുരാജിന് അൽപ്പം കൂടി സമയം നൽകണം. 2024 മുതൽ സിഎസ്കെയെ നയിക്കുന്നവനാണ് റുതുരാജ്.

ആളുകൾ എന്തെങ്കിലും പറയട്ടെ എംഎസ് ധോണിയുടെ നിഴലിൽ നിന്ന് അദ്ദേഹം പുറത്തുവരട്ടെ. അവൻ അവന്റേതായ രീതിയിൽ ടീമിനെ കൊണ്ടുപോകട്ടെ. എംഎസ് ധോണിയുടെ അഭാവത്തിൽ ടീമിനെ നയിക്കാൻ അവന് സാധിക്കേണ്ടതായുണ്ട്. ധോണിയിൽ മാത്രമൂന്നാതെ സ്വന്തമായി നിൽക്കാനാണ് റുതുരാജ് ശ്രമിക്കേണ്ടത്' ഇർഫാൻ പഠാൻ പറഞ്ഞു.
IPL 2026: സൂപ്പർ താരങ്ങൾ, പക്ഷെ ഇവരുടെ ഫോം ടീമുകൾക്ക് ആശങ്ക; ഫ്ളോപ്പായാൽ വലിയ തിരിച്ചടി, അഞ്ച് താരങ്ങൾ ഇവരാണ്
റുതുരാജ് ഗെയ്ക് വാദ് ബാറ്റ്സ്മാനെന്ന നിലയിൽ മികച്ച റെക്കോഡ് അവകാശപ്പെടാൻ സാധിക്കുന്ന താരമാണ്. എന്നാൽ ക്യാപ്റ്റനെന്ന നിലയിൽ പോസിറ്റീവായി വലിയൊരു നീക്കം നടത്താൻ ഗെയ്ക് വാദിന് സാധിച്ചിട്ടില്ല. ഇതിന് കാരണം എംഎസ് ധോണിയുടെ ഇടപെടലാണെന്ന് പറയാം. ഇപ്പോഴും സിഎസ്കെയിലെ എല്ലാ കാര്യങ്ങളും തീരുമാനിക്കുന്നത് ധോണിയാണ്. റുതുരാജിന് കാഴ്ചക്കാരന്റെ റോളാണുള്ളതെന്ന് പറയാം.

പ്രധാനപ്പെട്ട തീരുമാനങ്ങളെല്ലാം ധോണിയോട് ചോദിച്ചിട്ടാണ് റുതുരാജ് എടുക്കുന്നത്. ഡിആർഎസ് തീരുമാനത്തിൽ പോലും ധോണിയുടെ ഇടപെടലാണുള്ളത്. ഫീൽ‌ഡ് സെറ്റ് ചെയ്യാനും ബൗളർമാരെ ഉപയോഗിക്കുന്നതിലുമെല്ലാം റുതുരാജിന്റെ മുകളിൽ ധോണിയുടെ നിയന്ത്രണമുണ്ട്. ഇത് സിഎസ്കെയുടെ ശെെലിയാണെന്ന് തന്നെ പറയാം. ധോണി കളിക്കുന്നിടത്തോളം ധോണിയുടെ തീരുമാനത്തിന് കീഴിലാവും കാര്യങ്ങൾ നടക്കുക.
IPL 2026: ചേട്ടൻ തുടങ്ങി മക്കളേ... സിഎസ്കെ നെറ്റ്സിൽ പരിശീലനം ആരംഭിച്ച് സഞ്ജു, ആദ്യ സെഷനിൽ ചെയ്തത് ഇങ്ങനെ
റുതുരാജിനെ ഈ സീസണിൽ ക്യാപ്റ്റനായി സിഎസ്കെ പ്രഖ്യാപിച്ച് കഴിഞ്ഞു. എന്നാൽ ഈ സീസണിലും നിരാശപ്പെടുത്തിയാൽ റുതുരാജിനെ മാറ്റി സഞ്ജുവിനെ നായകസ്ഥാനത്തേക്ക് കൊണ്ടുവന്നേക്കും. ധോണി ഈ സീസണോടെ വിരമിക്കൽ പ്രഖ്യാപിക്കാൻ സാധ്യതയുണ്ട്. അങ്ങനെ വരുമ്പോൾ ധോണി തന്റെ പിൻഗാമിയായി കാണുന്ന സഞ്ജു സാംസണെ നായകസ്ഥാനത്തേക്ക് കൊണ്ടുവന്നേക്കും.

രാജസ്ഥാന്റെ നായകനായിരുന്ന സഞ്ജുവിന് വലിയ അനുഭവസമ്പത്ത് അവകാശപ്പെടാൻ സാധിക്കും. രാജസ്ഥാനെ ഫെെനൽ കളിപ്പിച്ചിട്ടുള്ള ക്യാപ്റ്റനാണ് സഞ്ജു സാംസൺ. അതുകൊണ്ടുതന്നെ സഞ്ജുവിനെ വരുന്ന സീസണിൽ നായകസ്ഥാനത്തേക്ക് പരിഗണിക്കാൻ സിഎസ്കെ തയ്യാറായാൽ അതിനെ തെറ്റ് പറയാനാവില്ല.