IPL 2026: ഇന്ത്യക്കായി ഇതുവരെ അരങ്ങേറിയിട്ടില്ല, പക്ഷെ ഇത്തവണത്തെ ഐപിഎല്ലിൽ മിന്നിച്ചേക്കും; ആറ് പേർ ഇവരാണ്

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ പോവുകയാണ്. ഇനി ഒരുനാൾ മാത്രമാണ് സൂപ്പർ പോരാട്ടം ആരംഭിക്കാനായുള്ളത്. നാളെ നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബംഗളൂരുവും മുൻ ചാമ്പ്യന്മാരായ സൺറെെസേഴ്സ് ഹെെദരാബാദും തമ്മിലാണ് ഉദ്ഘാടന പോരാട്ടം. ഇത്തവണത്തെ ഐപിഎല്ലിലൂടെ കെെയടി നേടാൻ പല താരങ്ങളും കാത്തിരിക്കുകയാണ്.സെലക്ടർമാരുടെ ശ്രദ്ധ നേടിയെടുത്ത് ദേശീയ ടീമിൽ സീറ്റ് നേടാമെന്ന സ്വപ്നത്തോടെയാണ് ഇത്തവണ പല യുവതാരങ്ങളുമുള്ളത്. ഇന്ത്യൻ ടീമിന്റെ പടിവാതുക്കൽ നിൽക്കുന്ന പല താരങ്ങളുമുണ്ട്. അവർക്ക് ഇത്തവണത്തെ ഐപിഎൽ വളരെ നിർണ്ണായകമാണ്. ഇതുവരെ ഇന്ത്യക്കായി അരങ്ങേറാത്ത ചില താരങ്ങൾ ഇത്തവണത്തെ ഐപിഎല്ലിൽ ശോഭിക്കാൻ കാത്തിരിക്കുന്നുണ്ട്. ഇത്തരത്തിലുള്ള ആറ് താരങ്ങൾ ആരൊക്കെയാണെന്ന് നോക്കാം.

ആക്വിബ് നബിയാണ് ഒന്നാമത്തെ താരം. ആഭ്യന്തര ക്രിക്കറ്റിൽ ശ്രദ്ധേയ പ്രകടനം നടത്തുന്ന ആക്വിബ് ജമ്മുകാശ്മീരുകാരനായ പേസ് ഓൾറൗണ്ടറാണ്. ഇത്തവണ ‍ഡൽഹി ക്യാപിറ്റൽസിനായാണ് നബി കളിക്കാനിറങ്ങുന്നത്. നബിയുടെ പ്രകടനം സെലക്ടർമാർ വീക്ഷിച്ചുകൊണ്ടിരിക്കുകയാണ്. രഞ്ജി ട്രോഫിയിൽ റെക്കോഡ് പ്രകടനം നടത്തിയ നബിക്ക് ഐപിഎല്ലിലും ശോഭിക്കാനായാൽ ഇന്ത്യൻ ടീമിലേക്ക് വിളി ഉറപ്പാണ്.

പ്രശാന്ത് വീറാണ് രണ്ടാമത്തെ താരം. ചെന്നെെ സൂപ്പർ കിങ്സ് ഇത്തവണ 14.2 കോടിക്ക് ടീമിലെത്തിച്ച സ്പിൻ ഓൾറൗണ്ടറാണ് പ്രശാന്ത് വീർ. 20കാരനായ താരത്തെ രവീന്ദ്ര ജഡേജയുടെ പകരക്കാരന്റെ റോളിലാണ് സിഎസ്കെ കാണുന്നത്. അതിവേഗം റൺസുയർത്താൻ കഴിയുന്ന താരം വിക്കറ്റ് വീഴ്ത്താനും മിടുക്കനാണ്. സിഎസ്കെ മധ്യനിരയിൽ കളിപ്പിക്കാൻ സാധ്യതയുള്ള താരമാണ് പ്രശാന്ത് വീർ.
സഞ്ജുവിന് സീറ്റ് ഉണ്ടാവുമോ? ഇന്ത്യ-വെസ്റ്റ് ഇൻഡീസ് ഏകദിനം സെപ്തംബർ 27ന് തിരുവനന്തപുരത്ത്, ഇക്കാര്യം നടന്നാൽ വിളി പ്രതീക്ഷിക്കാം
മങ്കേഷ് യാദവാണ് മൂന്നാമത്തെ താരം. ആർസിബി ഇത്തവണ ടീമിലേക്കെത്തിച്ച താരമാണ് മങ്കേഷ്. ഇടം കെെയൻ പേസറായ മങ്കേഷിനെ 5.2 കോടിക്കാണ് ആർസിബി സ്വന്തമാക്കിയത്. മധ്യ പ്രദേശുകാരനായ മങ്കേഷിൽ നിന്ന് വലിയ പ്രകടനം ഇത്തവണ ആർസിബി പ്രതീക്ഷിക്കുന്നു. ആർസിബിയുടെ ബൗളിങ് നിരയിൽ ഇത്തവണ ചില ദൗർബല്യങ്ങളുള്ള സാഹചര്യത്തിൽ മങ്കേഷിന് കെെയടി നേടാനുള്ള അവസരം മുന്നിലുണ്ട്.

സലിൽ അറോറയാണ് മറ്റൊരു താരം. 1.5 കോടിക്ക് സൺറെെസേഴ്സ് ഹെെദരാബാദ് ടീമിലെത്തിച്ച താരമാണ് സലിൽ അറോറ. പഞ്ചാബ് കാരനായ വിക്കറ്റ് കീപ്പർ ബാറ്റ്സ്മാനാണ് സലിൽ. സയ്യിദ് മുഷ്താഖ് അലി ട്രോഫിയിൽ 39 പന്തിൽ സെഞ്ചുറി നേടിയ താരത്തിന് ഇത്തവണ ഹെെദരാബാദ് പ്ലേയിങ് 11ൽ അവസരം കൊടുക്കുമെന്ന് തന്നെ പറയാം. വലിയ പ്രകടനത്തോടെ കെെയടി നേടാൻ സലിലിന് സാധിക്കുമെന്ന് തന്നെ കരുതാം.

കോഹ്ലി, രോഹിത് ഫാൻസ് ഹാപ്പി, 2027 ഫെബ്രുവരി വരെയുള്ള പരമ്പരകൾ പ്രഖ്യാപിച്ച് ബിസിസി ഐ; കേരളത്തിന്റെ മണ്ണിലും കളിയാവേശം, ഷെഡ്യൂൾ ഇതാ

സിഎസ്കെ ടീമിലെത്തിച്ച വിക്കറ്റ് കീപ്പർ ബാറ്റ്സ്മാനായ കാർത്തിക് ശർമയാണ് മറ്റൊരു താരം. 19കാരനായ താരത്തെ 14.2 കോടിക്കാണ് സിഎസ്കെ ടീമിലേക്കെത്തിച്ചത്. സിഎസ്കെയുടെ നെറ്റ്സിൽ താരം മിന്നും പ്രകടനമാണ് നടത്തുന്നത്. കാർത്തികിന്റെ ഷോട്ട് കണ്ട് ധോണി പ്രശംസിക്കുന്ന വീഡിയോയടക്കം പുറത്തുവന്നിരുന്നു. സിഎസ്കെ കാർത്തികിനെ കളിപ്പിക്കുമോയെന്നത് കാത്തിരുന്ന് കാണണം. എങ്കിലും പ്രതീക്ഷ നൽകുന്ന താരമാണ് കാർത്തിക്.

അശോക് ശർമയാണ് ആറാമത്തെ താരം. ഗുജറാത്ത് ടെെറ്റൻസിന്റെ താരമായ അശോക് ശർമ പേസറെന്ന നിലയിൽ കരുത്തുകാട്ടാൻ ശക്തിയുള്ളവനാണ്. 2025-26ലെ സയ്യിദ് മുഷ്താഖ് അലി ട്രോഫിയിൽ ശ്രദ്ധേയ പ്രകടനം നടത്താൻ താരത്തിനായിരുന്നു. തുടർച്ചയായി മണിക്കൂറിൽ 150 കിലോമീറ്റർ വേഗത്തിൽ പന്തെറിയാൻ ശേഷിയുള്ളവനാണ് അശോക് ശർമയെന്ന് പറയാം.

90 ലക്ഷം രൂപക്ക് ടീമിലെത്തിയ താരം ഇത്തവണ എല്ലാവരേയും ഞെട്ടിക്കാൻ ശേഷിയുള്ളവനാണെന്ന് നിസംശയം പറയാം. ഗുജറാത്ത് യുവതാരത്തെ കളിപ്പിക്കുമെന്ന് തന്നെയാണ് വിലയിരുത്തപ്പെടുന്നത്. ഇന്ത്യൻ ക്രിക്കറ്റിന്റെ പേസ് നിരയിൽ വലിയ താരമാകാൻ ശേഷിയുള്ളവനാണ് അശോക് ശർമയെന്ന് പറയാം.