IPL 2026: ഇന്ന് സഞ്ജുവിന്റെ ദിനം, ചെപ്പോക്കിൽ അവൻ മാച്ച് വിന്നറാവും; സിഎസ്കെ ഒരു മാറ്റവും വരുത്തണം, ക്രിസ് ശ്രീകാന്ത് പറയുന്നു

ഇന്ത്യൻ പ്രീമിയർ ലീഗിന്റെ 2026 സീസണിലെ ഇന്നത്തെ സൂപ്പർ പോരാട്ടത്തിൽ ചെന്നെെ സൂപ്പർ കിങ്സും പഞ്ചാബ് കിങ്സും ഏറ്റുമുട്ടുകയാണ്. രണ്ട് ടീമും തകർപ്പൻ താരങ്ങളുടെ നിരയാണ്. പഞ്ചാബ് ആദ്യ മത്സരത്തിൽ ഗുജറാത്ത് ടെെറ്റൻസിനെ തോൽപ്പിച്ചപ്പോൾ സിഎസ്കെ രാജസ്ഥാൻ റോയൽസിനോട് തോൽവി നേരിട്ടാണ് പഞ്ചാബിനെതിരേ ഇറങ്ങുന്നത്. സിഎസ്കെ ഇന്നിറങ്ങുമ്പോൾ എല്ലാ കണ്ണുകളും സഞ്ജു സാംസണിലേക്കാണ്.രാജസ്ഥാൻ റോയൽസ് വിട്ട് സിഎസ്കെയിലേക്കെത്തിയ സഞ്ജു സാംസണ് ആദ്യ മത്സരത്തിൽ കാര്യമായ പ്രകടനം നടത്താനായിരുന്നില്ല. എന്നാൽ ഇന്ന് തകർപ്പൻ പ്രകടനത്തോടെ സഞ്ജു തിരിച്ചുവരുമെന്നാണ് എല്ലാവരും പ്രതീക്ഷിക്കുന്നത്. ഇപ്പോഴിതാ ഇന്ന് സഞ്ജുവിന്റെ ദിവസമായിരിക്കുമെന്നും പഞ്ചാബിനെതിരേ മാച്ച് വിന്നറായി സഞ്ജു സാംസൺ മാറുമെന്നും പ്രവചിച്ചിരിക്കുകയാണ് ക്രിസ് ശ്രീകാന്ത്.

'ഇന്നത്തെ മത്സരം ചെപ്പോക്കിലാണ്. സഞ്ജു സാംസൺ ടി20 ലോകകപ്പിൽ തിരിച്ചുവരവ് നടത്തിയതും ടൂർണമെന്റിലെ താരമായതും ചെന്നെെയിലെ മത്സരത്തിലൂടെയാണ്. സഞ്ജു ഇന്ന് തകർപ്പൻ പ്രകടനം പുറത്തെടുക്കും. രാജകീയ തിരിച്ചുവരവാണ് ഇന്ന് അവനെ കാത്തിരിക്കുന്നത്. ആദ്യത്തെ അഞ്ച് പന്തുകൾക്ക് ശേഷം അവൻ കടന്നാക്രമിക്കും.

അവൻ പഞ്ചാബിനെ തല്ലിത്തകർക്കുമെന്നാണ് ഞാൻ വിശ്വസിക്കുന്നത്. 220 റൺസ് നേടുന്ന ടീമിന് വിജയം നേടിയെടുക്കാൻ സാധിക്കും. രണ്ട് ടീമും ഇതിന് കരുത്തുള്ളവരാണ്. പേപ്പറിൽ ഇരു ടീമും പകുതി പകുതി വിജയ സാധ്യതയാണുള്ളത്. സഞ്ജു സാംസൺ ഫോമിലേക്കെത്തിയാൽ പഞ്ചാബിന്റെ ഒരു താരത്തിനും അതിനൊപ്പം എത്താൻ സാധിക്കില്ല' ക്രിസ് ശ്രീകാന്ത് പറഞ്ഞു.
IPL 2026: 12 വർഷത്തിന് ശേഷം ഇതാദ്യം, കെകെആറിന്റെ ​ഗ്രീനും രംഘുവംശിയും അപൂർവ്വ റെക്കോഡിൽ, പക്ഷെ ആരും ആ​ഗ്രഹിക്കില്ല
എന്നാൽ സഞ്ജുവിന്റെ ചെപ്പോക്കിലെ കണക്കുകൾ മികച്ചതല്ല. ഇതിന് മുമ്പ് അഞ്ച് തവണ ഇവിടെ കളിച്ചപ്പോൾ 59 റൺസാണ് സഞ്ജുവിന് നേടാനായത്. അതുകൊണ്ടുതന്നെ ഇത്തവണ സഞ്ജുവിന് കാര്യങ്ങൾ എളുപ്പമല്ലെന്ന് തന്നെ പറയാം. രാജസ്ഥാൻ റോയൽസിനെതിരേ സഞ്ജുവിനെ ബാധിച്ചത് വെെകാരിക പ്രശ്നമാണ്. എന്നാൽ പഞ്ചാബിനോട് ഈ പ്രശ്നം ഉണ്ടാവില്ല.

പഞ്ചാബിനെതിരായ സഞ്ജു സാംസണിന്റെ പ്രകടനം മികച്ചതാണ്. രണ്ട് അർധ സെഞ്ചുറികൾ ഉൾപ്പെടെ മികച്ച പ്രകടനം നടത്താൻ സഞ്ജുവിന് സാധിച്ചിട്ടുണ്ട്. പഞ്ചാബിന്റെ ബൗളിങ് നിര ശക്തമാണ്. അർ‌ഷ്ദീപ് സിങ്, മാർക്കോ യാസനും ഉൾപ്പെടുന്ന ന്യൂബോൾ ആക്രമണത്തെ സഞ്ജു എങ്ങനെ ചെറുക്കുമെന്നതാണ് ഇനി കണ്ടറിയേണ്ടത്.

IPL 2026: വിജയ വഴിയിൽ ഹെെദരാബാദ്, കെകെആറിന് രണ്ടാം തോൽവി; രഹാനെക്കും സംഘത്തിനും പിഴക്കുന്നത് എവിടെ? പ്രശ്നം ബാറ്റിങ്ങിൽ

പഞ്ചാബിനെതിരേ സിഎസ്കെ നിർണ്ണായകമായ ഒരു മാറ്റം വരുത്തണമെന്നും ക്രിസ് ശ്രീകാന്ത് നിർദേശിച്ചിരിക്കുകയാണ്. നാലാം നമ്പറിൽ ഡെവാൾഡ് ബ്രെവിസ് ഉണ്ടാകില്ലെങ്കിൽ ആ റോളിൽ ശിവം ദുബെയെ കളിപ്പിക്കണമെന്നാണ് ശ്രീകാന്ത് പറയുന്നത്. എന്നാൽ ഇത്തരമൊരു മാറ്റത്തിന് സിഎസ്കെ തയ്യാറാവുമോയെന്നതാണ് കണ്ടറിയേണ്ടത്.

എംഎസ് ധോണി ടീമിനൊപ്പം ചേർന്നിട്ടുണ്ട്. ഇത് സിഎസ്കെയ്ക്ക് വലിയ ആത്മവിശ്വാസം നൽകുന്ന കാര്യമാണെന്ന് തന്നെ പറയാം. ഇന്നലെ പരിശീലന സെഷനിലടക്കം ധോണി സജീവമായിരുന്നു. ഡെവാൾ‌ഡ് ബ്രെവിസും പരിശീലനം ആരംഭിച്ചിട്ടുണ്ട്. എന്തായാലും ഇന്നത്തെ മത്സരത്തിൽ ജയിച്ച് തിരിച്ചുവരേണ്ടത് സിഎസ്കെയെ സംബന്ധിച്ച് അഭിമാന പ്രശ്നമാണ്. സഞ്ജുവിനും റുതുരാജിനും ഫോമിലേക്കെത്താനായാൽ സിഎസ്കെയ്ക്ക് തിരിച്ചുവരവ് സാധ്യമാകുമെന്ന് തന്നെ പ്രതീക്ഷിക്കാം.