IPL 2026: ഈ സീസണിലെ ഏറ്റവും ദുർബല ടീം കെകെആറോ? ദൗർബല്യങ്ങൾ ഏറെ, പരിഹാരം എളുപ്പമല്ല; ഇത്തവണ അവസാന സ്ഥാനത്തായേക്കും

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ പോവുകയാണ്. ഇത്തവണ 10 ടീമുകളും ഒന്നിനൊന്ന് മികച്ച താരനിരയോടെയാണ് എത്തുന്നത്. അവസാന സീസണിൽ സംഭവിച്ച പിഴവുകൾക്ക് ഇത്തവണ മിനി താരലേലത്തിലൂടെ പരിഹാരം കാണാൻ ടീമുകൾ ശ്രമിച്ചിട്ടുണ്ട്. എല്ലാ ടീമിന്റെ താരസമ്പത്ത് നോക്കുമ്പോൾ ഒന്നിനൊന്ന് മെച്ചമാണെന്ന് പറയാം. അതുകൊണ്ടുതന്നെ കിരീട നേട്ടം ആർക്കും എളുപ്പമാവില്ലെന്നുറപ്പാണ്.അഞ്ച് തവണ ചാമ്പ്യന്മാരായ മുംബെെ ഇന്ത്യൻസും ചെന്നെെ സൂപ്പർ കിങ്സും നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബംഗളൂരുവുമെല്ലാം ഇത്തവണ സൂപ്പർ താരങ്ങളുടെ നിരയാണ്. എന്നാൽ ഇത്തവണത്തെ ഏറ്റവും ദുർബലമായ താരനിര ആരുടെയാണ്?. അത് കൊൽക്കത്ത നെെറ്റ് റെെഡേഴ്സാണെന്ന് പറയാം. ഇതിന് ചില കാരണങ്ങളുണ്ട്. അത് എന്തൊക്കെയാണെന്ന് പരിശോധിക്കാം.

ഒന്നാമത്തെ കാര്യം ബാറ്റിങ് നിരയുടെ ശക്തിക്കുറവ് തന്നെയാണ്. അജിൻക്യ രഹാനെ നയിക്കുന്ന കെകെആറിൽ നിന്ന് അത്ഭുതം പ്രതീക്ഷിക്കാനാവില്ല. അൻകൃഷ് രഘുവൻഷി, മനീഷ് പാണ്ഡെ, രാഹുൽ ത്രിപാഠി, രചിൻ രവീന്ദ്ര, റിങ്കു സിങ് , കാമറൂൺ ഗ്രീൻ, ടിം സീഫർട്ട് എന്നിവരെല്ലാം ഉൾപ്പെടുന്ന കെകെആറിന്റെ ബാറ്റിങ് നിരയിൽ വിശ്വസ്തരെന്ന് വിളിക്കാവുന്നവർ കുറവാണ്.

രഹാനെ സീനിയർ താരമാണ്. ടി20യിൽ അനുഭവസമ്പത്തുള്ള നായകനാണെങ്കിലും കാര്യമായ റെക്കോഡുകളൊന്നും അദ്ദേഹത്തിന് അവകാശപ്പെടാൻ സാധിക്കില്ല. രഹാനെയുടെ ബാറ്റിൽ നിന്ന് കാര്യമായൊന്നും പ്രതീക്ഷിക്കാനാവില്ല. ക്യാപ്റ്റനെ വിശ്വസിക്കാനാവാത്ത സാഹചര്യത്തിൽ ആ ടീമിൽ നിന്ന് വലിയ പ്രകടനം പ്രതീക്ഷിക്കുന്നത് മണ്ടത്തരമായിരിക്കുമെന്ന് പറയാം.
IPL 2026: ഐപിഎല്ലിലെ വമ്പന്മാർ, പക്ഷെ ഇത്തവണ സ്പിൻ കരുത്ത് ദുർബലം; ഈ ദൗർബല്യം മൂന്ന് ടീമുകൾക്ക് തിരിച്ചടിയായേക്കും
കെകെആറിന്റെ പ്രധാന സൂപ്പർ താരങ്ങളെല്ലാം മോശം ഫോമിലാണെന്നതാണ് എടുത്തു പറയേണ്ടത്. കാമറൂൺ ഗ്രീൻ ടി20 ലോകകപ്പിൽ മോശം ഫോമിലായിരുന്നു. സമീപകാലത്തൊന്നും പ്രതീക്ഷക്കൊത്ത പ്രകടനം നടത്താൻ ഗ്രീന് സാധിച്ചിട്ടില്ല. റിങ്കു സിങ്ങിനെ മോശം ഫോമിനെത്തുടർന്ന് ഇന്ത്യ ടി20 ലോകകപ്പ് കളിപ്പിച്ചിട്ടില്ല. അജിൻക്യ രഹാനെ ഇടവേളക്ക് ശേഷമാണ് കളിക്കാൻ ഇറങ്ങുന്നത്.

രചിൻ രവീന്ദ്രക്കും കാര്യമായ ഫോം അവകാശപ്പെടാനാവില്ല. ഫിൻ അലൻ, ടീം സീഫർട്ട് എന്നിവർ തല്ലിത്തകർക്കുന്നവരാണെങ്കിലും സ്ഥിരതയോടെ കസറുന്നവരല്ല. റോവ്മാൻ പവൽ ഫിനിഷർ റോളിൽ ശോഭിക്കാൻ ശേഷിയുള്ളവനാണ്. എങ്കിലും ടീമിനെ ഒറ്റക്ക് തോളിലേറ്റാൻ റോവ്മാൻ പവലിന് ശേഷിയുണ്ടെന്ന് കരുതാനാവില്ല.

IPL 2026: ഇംപാക്ട് പ്ലയറോ ഫിനിഷറോ? ധോണിയിൽ നിന്ന് സിഎസ്കെ അത്ഭുത പ്രകടനം പ്രതീക്ഷിക്കണോ? മുഹമ്മദ് കെെഫ് പറയുന്നത് ഇങ്ങനെ

പരിക്കും ബൗളർമാരുടെ മോശം ഫോമും കെകെആറിന് ആശങ്കയുണ്ടാക്കുന്നു. ഹർഷിത് റാണക്ക് പരിക്കേറ്റതോടെ കെകെആർ വലിയ പ്രതിസന്ധിയിലായിരിക്കുകയാണ്. വരുൺ ചക്രവർത്തി, സുനിൽ നരെയ്ൻ എന്നീ രണ്ട് സ്പിന്നർമാർ പ്രതീക്ഷ നൽകുന്നുണ്ട്. എന്നാൽ വരുൺ ചക്രവർത്തി തല്ലുകൊള്ളിയായി മാറുന്നതാണ് ടി20 ലോകകപ്പിൽ കാണാനായത്.

പേസ് നിരയിലുള്ള ഉമ്രാൻ മാലിക്, ആകാശ് ദീപ്, കാർത്തിക് ത്യാഗി എന്നിവരെല്ലാം തല്ലുകൊള്ളികളാണ്. സിംബാബ് വെക്കാർ ബ്ലെസിങ് മുസറാബാനിയേയും വിശ്വസിക്കാനാവില്ല. വെെഭവ് അറോറ, മതീഷ പതിരാന എന്നിവരുടെ പ്രകടനത്തിലാണ് കെകെആറിന്റെ പ്രതീക്ഷ. മറ്റ് ടീമുകളുമായി താരതമ്യപ്പെടുത്തുമ്പോൾ കെകെആറിന്റെ താരനിരയാണ് ഏറ്റവും മോശമെന്ന് പറയാം. മൂന്ന് തവണ ചാമ്പ്യന്മാരായ കെകെആർ ഇത്തവണ അത്ഭുത പ്രകടനം നടത്തുമോയെന്നത് കാത്തിരുന്ന് കാണാം.