IPL 2026: എതിരാളികൾ കരുതിയിരുന്നോ, ഡെത്തോവറിൽ വിറപ്പിക്കാൻ ഈ അഞ്ച് ബൗളർമാർ തയ്യാർ; ആരൊക്കെ തിളങ്ങും?

ഇന്ത്യൻ പ്രീമിയർ ലീഗിന്റെ 2026 സീസൺ 28ന് ആരംഭിക്കാൻ പോവുകയാണ്. അവസാന സീസണിലെ പോരായ്മകൾ‌ പരിഹരിച്ച് ഇത്തവണ ശക്തമായ തിരിച്ചുവരവിനാണ് 9 ടീമുകളും തയ്യാറെടുക്കുന്നത്. നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബംഗളൂരു കിരീടം നിലനിർത്താമെന്ന പ്രതീക്ഷയോടെയുമാണ് ഇത്തവണ പോരാട്ടത്തിനിറങ്ങുന്നത്. നിരവധി യുവതാരങ്ങളെ വമ്പൻ പ്രതിഫലത്തിൽ ഒപ്പം കൂട്ടാൻ ഇത്തവണ ടീമുകൾക്ക് സാധിച്ചിട്ടുണ്ട്. എന്നാൽ ഇതിൽ ആരൊക്കെ തിളങ്ങുമെന്നതാണ് കണ്ടറിയേണ്ടത്. ഇത്തവണ ബാറ്റ്സ്മാൻമാരെ വിറപ്പിക്കാനുള്ള ബൗളിങ് കരുത്തുയർത്താനും ടീമുകൾ ശ്രമിച്ചിട്ടുണ്ട്. പ്രധാനമായും ഡെത്തോവറുകളിൽ തിളങ്ങാൻ സാധിക്കുന്ന താരങ്ങളെ ഒപ്പം കൂട്ടാൻ മിനി ലേലത്തിലൂടെ ടീമുകൾ തയ്യാറായിരുന്നു, ഇത്തവണ ഡെത്തോവറുകളിൽ മികവ് കാട്ടാൻ സാധിക്കുന്ന നിരവധി ബൗളർമാരുണ്ടെന്ന് തന്നെ പറയാം. ഇതിൽ ഇത്തവണ ഏറ്റവും മികവ് കാട്ടാൻ സാധ്യതയുള്ള അഞ്ച് ഡെത്തോവർ ബൗളർമാർ ആരൊക്കെയാണെന്ന് പരിശോധിക്കാം.

ജസ്പ്രീത് ബുംറയാണ് ഇതിൽ എടുത്തു പറയേണ്ട താരം. മുംബെെ ഇന്ത്യൻസിന്റെ വജ്രായുധം ബുംറയാണെന്ന് നിസംശയം പറയാം. ഡെത്തോവറിൽ ബുംറയുണ്ടാക്കുന്ന ഇംപാക്ടാണ് പല മത്സരങ്ങളിലും മുംബെെ ജയിക്കാൻ കാരണമായിട്ടുള്ളത്. ഐപിഎൽ ഡെത്തോവറുകളിൽ 550 പന്തുകളെറിഞ്ഞ ബുംറ 531 റൺസാണ് വഴങ്ങിയത്. 5.75 എന്ന അത്ഭുത ഇക്കോണമിയാണ് അദ്ദേഹത്തിന്റെ പേരിലുള്ളത്. യോർക്കറുകളിലൂടെയും സ്ലോ ബോളുകളിലൂടെയും എതിർ ടീം ബാറ്റ്സ്മാൻമാരെ വിറപ്പിക്കാൻ ബുംറക്ക് സാധിക്കുമെന്ന് തന്നെ കരുതാം.

രണ്ടാമത്തെ താരം അർഷ്ദീപ് സിങ് ങാണ്. പഞ്ചാബ് കിങ്സിന്റെ ഇടം കെെയൻ പേസറായ അർഷ്ദീപ് പവർപ്ലേയിലും ഡെത്തോവറിലും ഒരുപോലെ മികവ് കാട്ടുന്ന താരമാണ്. ഐപിഎല്ലിൽ ഡെത്തോവറിൽ 5.66 എന്ന മികച്ച ഇക്കോണമിയിൽ പന്തെറിയാൻ അർഷ്ദീപിന് സാധിക്കുന്നുണ്ട്. സ്ലോ കട്ടറുകളും യോർക്കറുകളുമാണ് അർഷ്ദീപിന്റേയും ആയുധം. നന്നായി ബൗൺസും എറിഞ്ഞ് ബാറ്റ്സ്മാനെ പ്രയാസപ്പെടുത്താൻ കഴിവുള്ള ബൗളറാണ് അർഷ്ദീപ് സിങ്.
IPL 2026: ഐപിഎല്ലിലെ വമ്പന്മാർ, പക്ഷെ ഇത്തവണ സ്പിൻ കരുത്ത് ദുർബലം; ഈ ദൗർബല്യം മൂന്ന് ടീമുകൾക്ക് തിരിച്ചടിയായേക്കും
രാജസ്ഥാൻ റോയൽസിന്റെ സീനിയർ പേസർ സന്ദീപ് ശർമയാണ് മറ്റൊരു ‍ഡെത്തോവർ സ്പെഷ്യലിസ്റ്റ് പേസർ. എംഎസ് ധോണിയെയടക്കം ഡെത്തോവറിൽ പിടിച്ചുകെട്ടിയിട്ടുള്ള ബൗളറാണ് സന്ദീപ് ശർമ. പവർപ്ലേയിലും ഡെത്തോവറിലും ഇത്തവണ രാജസ്ഥാൻ വലിയ പ്രതീക്ഷ സന്ദീപിൽ വെക്കുമെന്ന കാര്യം ഉറപ്പാണ്. വെെഡ് യോർ‍ക്കറുകളിലൂടെ ബാറ്റ്സ്മാനെ പ്രയാസപ്പെടുത്താൻ താരം മിടുക്കനാണ്.

ചെന്നെെ സൂപ്പർ കിങ്സിന്റെ ഓസ്ട്രേലിയൻ പേസർ നതാൻ ഇല്ലിസാണ് മറ്റൊരു താരം. ബിഗ് ബാഷ് ലീഗിലടക്കം തകർപ്പൻ പ്രകടനം നടത്താൻ ഇല്ലിസിന് സാധിച്ചിരുന്നു. ഡെത്തോവറിൽ ഏറ്റവും മികച്ച പ്രകടനം കാഴ്ചവെക്കാൻ ശേഷിയുള്ള താരമാണ് ഇല്ലിസ്. നന്നായി സ്ലോ ബോൾ എറിയുന്നു എന്നതാണ് ഇല്ലിസിന്റെ സവിശേഷത. ഇത്തവണ ഡെത്തോവറിൽ ഇല്ലിസ് ശോഭിക്കാൻ സാധ്യത കൂടുതലാണ്.
IPL 2026: ഇംപാക്ട് പ്ലയറോ ഫിനിഷറോ? ധോണിയിൽ നിന്ന് സിഎസ്കെ അത്ഭുത പ്രകടനം പ്രതീക്ഷിക്കണോ? മുഹമ്മദ് കെെഫ് പറയുന്നത് ഇങ്ങനെ
ഡൽഹി ക്യാപിറ്റൽസിന്റെ ആക്വിബ് നബിയാണ് മറ്റൊരു താരം. 8.4 കോടിക്ക് ഡൽഹി സ്വന്തമാക്കിയ ജമ്മു കാശ്മീർ പേസർ ഇത്തവണ ഡെത്തോവറിൽ മികവ് കാട്ടിയേക്കും. ആഭ്യന്തര ക്രിക്കറ്റിലടക്കം ഡെത്തോവറിൽ മികവ് കാട്ടാൻ അദ്ദേഹത്തിന് സാധിച്ചിട്ടുണ്ട്. അധികമാരും നേരിട്ട് പരിചയമില്ലാത്ത പേസറെന്ന നിലയിൽ ആക്വിബിന്റെ ബൗളിങ് എതിരാളികൾക്ക് കടുത്ത തിരിച്ചടിയായേക്കും.