IPL 2026: ഏറ്റവും ഇഷ്ടപ്പെട്ട ക്രിക്കറ്റ് താരമാര്? അത് സച്ചിനോ സെവാ​ഗോ അല്ല; സർപ്രെെസ് താരത്തെ തിരഞ്ഞെടുത്ത് ഹാർദിക് പാണ്ഡ്യ

ടി20 ലോകകപ്പിന് പിന്നാലെ ക്രിക്കറ്റ് ലോകം ഐപിഎൽ ആവേശത്തിലേക്ക് കടക്കാൻ പോവുകയാണ്. ഈ മാസം 28നാണ് ടൂർണമെന്റ് ആരംഭിക്കുന്നത്. ഇത്തവണ കരുത്തുറ്റ താരനിരയോടെ 10 ടീമുകളും ഇറങ്ങുമ്പോൾ പോരാട്ടം തീപാറുമെന്ന കാര്യം ഉറപ്പാണ്. അഞ്ച് തവണ ചാമ്പ്യന്മാരായ മുംബെെ ഇന്ത്യൻസ് ഇത്തവണ വലിയ പ്രതീക്ഷയിലാണ്. 2020ന് ശേഷം ആദ്യ കിരീടമെന്ന സ്വപ്നത്തോടെയാണ് ഇത്തവണ മുംബെെ ഇന്ത്യൻസ് ഇറങ്ങുന്നത്.മുംബെെ ഇന്ത്യൻസ് ക്യാപ്റ്റനെന്ന നിലയിൽ ഹാർദിക് പാണ്ഡ്യക്കും ഇത്തവണത്തെ ഐപിഎൽ കിരീടം അഭിമാന പ്രശ്നമാണ്. ഇപ്പോഴിതാ ഐപിഎൽ 2026 സീസൺ ആരംഭിക്കാനിരിക്കെ ഹാർദിക് പാണ്ഡ്യ തന്റെ പ്രതീക്ഷകൾ പങ്കുവെക്കുകയാണ്. തന്റെ എക്കാലത്തേയും മികച്ച ക്രിക്കറ്റ് താരത്തെ ഹാർദിക് പാണ്ഡ്യ തിരഞ്ഞെടുത്തതാണ് എല്ലാവർക്കും സർപ്രെെസായി മാറിയത്.

ബിസിസി ഐയുടെ അവാർഡ് ദാന ചടങ്ങിൽ അവതാരകൻ ഇഷ്ട ക്രിക്കറ്റ് താരത്തെക്കുറിച്ച് ചോദിച്ചപ്പോൾ വസിം ജാഫർ എന്ന സർപ്രെെസ് ഉത്തരമാണ് ഹാർദിക് നൽകിയത്. വെടിക്കെട്ട് പേസ് ഓൾറൗണ്ടറാണ് ഹാർദിക് പാണ്ഡ്യ. അതുകൊണ്ടുതന്നെ ഹാർദിക്കിന്റെ ഇഷ്ട താരം ഏതെങ്കിലും വെടിക്കെട്ട് താരമായിരിക്കുമെന്നാണ് എല്ലാവരും കരുതിയത്. എന്നാൽ ഹാർദിക്കിന്റെ ഇഷ്ട താരം ക്ലാസിക് താരമായ വസിം ജാഫറാണെന്നതാണ് കൗതുകം.

വസിം ജാഫർ ആഭ്യന്തര ക്രിക്കറ്റിലാണ് കൂടുതലായി ശോഭിച്ചത്. അന്താരാഷ്ട്ര ക്രിക്കറ്റിൽ കാര്യമായ പ്രകടനം നടത്താൻ സാധിക്കാത്ത താരമാണ് ജാഫർ‌. എന്നാൽ ആഭ്യന്തര ക്രിക്കറ്റിൽ ഇപ്പോഴും പകരക്കാരനില്ലാത്ത കളിക്കാരനാണ് ജാഫർ. മുംബെെയുടെ എക്കാലത്തേയും മികച്ച ആഭ്യന്തര താരമാണ് വസിം ജാഫറെന്ന് പറഞ്ഞാലും അത് തെറ്റാകില്ല. ഇപ്പോൾ ക്രിക്കറ്റ് നിരൂപകന്റെ റോളിൽ ജാഫർ സജീവമാണ്.
സഞ്ജു രാജസ്ഥാൻ റോയൽസ് വിട്ടു, പക്ഷെ ഈ റെക്കോഡുകൾ എന്നും ശേഷിക്കും? തകർക്കാൻ സാധ്യതയില്ലാത്ത മൂന്ന് വമ്പൻ നേട്ടങ്ങളിതാ
വേദിയിൽ ഉണ്ടായിരുന്ന വെെഭവ് സൂര്യവംശിയും ഇഷ്ട ക്രിക്കറ്റ് താരത്തെ വെളിപ്പെടുത്തി. രണ്ട് പേരെയാണ് എക്കാലത്തേയും ഇഷ്ട താരങ്ങളായി വെെഭവ് തിരഞ്ഞെടുത്തത്. അത് മുൻ വെസ്റ്റ് ഇൻഡീസ് താരമായ ബ്രയാൻ ലാറയും മുൻ ഇന്ത്യൻ താരമായ യുവരാജ് സിങ്ങുമാണ്. രണ്ട് പേരും ഇടം കെെയൻ ബാറ്റ്സ്മാൻമാരും ഇതിഹാസ താരങ്ങളുമാണ്. ഇടം കെെയൻ യുവതാരമായ വെെഭവ് വെടിക്കെട്ട് ബാറ്റിങ് പുറത്തെടുത്ത് ആരാധകരുടെ കെെയടി നേടുകയാണ്.

സഞ്ജു സാംസണും തന്റെ ഇഷ്ട താരത്തെ വെളിപ്പെടുത്തി. അത് സച്ചിൻ ടെണ്ടുൽക്കറാണെന്നാണ് സഞ്ജു പറഞ്ഞത്. താൻ ചെറുപ്പം മുതൽ പ്രചോദിതനായത് സച്ചിനെ കണ്ടിട്ടാണെന്നും മലയാളി താരം പറഞ്ഞു. ടി20 ലോകകപ്പിൽ ഫോമിലേക്ക് തിരിച്ചെത്താൻ സച്ചിൻ ടെണ്ടുൽക്കർ സഹായിച്ച കാര്യം നേരത്തെ തന്നെ സഞ്ജു വെളിപ്പെടുത്തുകയും ചെയ്തിരുന്നു.
IPL 2026: ഈ ക്യാപ്റ്റന്മാർ സീസൺ തികച്ചേക്കില്ല, മോശം ഫോമിലെങ്കിൽ പാതി വഴിയിൽ പുറത്താവും; വെല്ലുവിളി നേരിടുന്ന നായകന്മാരിതാ
ഇപ്പോൾ ഇന്ത്യൻ ടീമിലെ സഹതാരങ്ങളെല്ലാം ഇനി ഫ്രാഞ്ചെെസി ക്രിക്കറ്റിലെ ചിരവെെരികളായി മാറുകയാണ്. സഞ്ജു സിഎസ്കെയ്ക്കൊപ്പമാണെങ്കിൽ ഹാർദിക് മുംബെെ ഇന്ത്യൻസ് നായകനാണ്. വെെഭവ് രാജസ്ഥാൻ റോയൽസിന്റെ താരവും. ഇത്തവണ വെടിക്കെട്ട് പ്രകടനത്തോടെ ആരൊക്കെ കസറുമെന്നും ആരൊക്കെ കിരീടത്തിലേക്കെത്തുമെന്നതുമാണ് കാത്തിരുന്ന് കാണേണ്ടത്.