IPL 2026: ഐപിഎൽ പടിവാതുക്കൽ, പരിക്കിൽ വലഞ്ഞ് ടീമുകൾ; കൂടുതൽ തിരിച്ചടി ആർക്ക്? തലപുകച്ച് ഈ മൂന്ന് ടീമുകൾ

ഐപിഎൽ 2026 ആരംഭിക്കാൻ ഇനി 10 ദിവസമാണ് ശേഷിക്കുന്നത്. 28ന് റോയൽ ചലഞ്ചേഴ്സ് ബംഗളൂരുവും സൺറെെസേഴ്സ് ഹെെദരാബാദും തമ്മിലുള്ള പോരാട്ടത്തോടെയാണ് ഇത്തവണത്തെ ഐപിഎൽ സീസൺ ആരംഭിക്കുന്നത്. 10 ടീമുകളും അരയും തലയും മുറുക്കി പോരിനിറങ്ങുമ്പോൾ പോരാട്ടം തീപാറുമെന്ന് തന്നെ പ്രതീക്ഷിക്കാം.എന്നാൽ ഐപിഎൽ ആരംഭിക്കാനിരിക്കെ ടീമുകൾക്ക് വലിയ തലവേദനയാകുന്നത് പരിക്കാണ്. പല പ്രധാന താരങ്ങളും പരിക്കിന്റെ പിടിയിലായതോടെ പല ടീമുകളുടേയും കണക്കുകൂട്ടൽ തെറ്റിയിരിക്കുകയാണ്. ഇനി പകരക്കാരെ കണ്ടെത്തുകയെന്നതും ദുഷ്കരമായ കാര്യമാണ്. എന്നാൽ ഫ്രാഞ്ചെെസികൾക്ക് മുന്നിൽ മറ്റ് വഴികളില്ലെന്ന് തന്നെ പറയാം.

ഇത്തവണത്തെ ഐപിഎല്ലിന് മുമ്പ് പരിക്ക് വേട്ടയാടിയിരിക്കുന്ന താരങ്ങൾ ആരൊക്കെയാണെന്നതും അത് ടീമുകളെ എത്രത്തോളം ബാധിച്ചിട്ടുണ്ടെന്നും പരിശോധിക്കാം. കൊൽ‌ക്കത്ത നെെറ്റ് റെെഡേഴ്സിന് വലിയ തിരിച്ചടിയാണ് നേരിട്ടിരിക്കുന്നത്. രണ്ട് താരങ്ങൾ ഇതിനോടകം പരിക്കിന്റെ പിടിയിലായിട്ടുണ്ട്. ഇതിൽ ഹർഷിദ് റാണയുടെ പരിക്കാണ് പ്രധാന പ്രശ്നം. പന്തുകൊണ്ടും ബാറ്റുകൊണ്ടും മാച്ച് വിന്നറായിട്ടുള്ള താരമാണ് ഹർഷിദ് റാണ.

ടി20 ലോകകപ്പിന് തൊട്ടുമുമ്പ് പരിക്കേറ്റ ഹർഷിദിന് ഇപ്പോൾ തിരിച്ചുവരവ് നടത്തുക എളുപ്പമല്ല. കൂടുതൽ വിശ്രമം താരത്തിന് വേണ്ടിവരുമെന്നാണ് റിപ്പോർട്ട്. ഹർഷിദ് റാണയുടെ അഭാവം കെകെആറിനെ സംബന്ധിച്ച് കടുത്ത തിരിച്ചടിയായിരിക്കുമെന്ന് നിസംശയം പറയാം. സിഎസ്കെയിൽ നിന്ന് കെകെആർ ടീമിലേക്കെത്തിച്ച താരമാണ് മതീഷ പതിരാന. ശ്രീലങ്കൻ താരം സമീപകാലത്തായി പരിക്കിന്റെ പിടിയിലാണ്.
IPL 2026: രാജസ്ഥാനെതിരേ ആദ്യമായി കളിക്കുന്നു, പക്ഷെ വെെകാരിക പ്രശ്നമില്ല; കാരണം വെളിപ്പെടുത്തി സഞ്ജു സാംസൺ
ടി20 ലോകകപ്പിലടക്കം പരിക്ക് താരത്തെ കാര്യമായി ബാധിച്ചിരുന്നു. ഈ സാഹചര്യത്തിൽ ഐപിഎല്ലിൽ മതീഷ പതിരാനയുടെ പ്രകടനം കെകെആറിന് ആശങ്കയുണ്ടാക്കുന്നതാണ്. 18 കോടിക്ക് ടീമിലെത്തിച്ച പതിരാനയുടെ പ്രകടനം കെകെആറിന് നിർണ്ണായകമാണ്. പതിരാനക്കും ഹർഷിതിനും കളിക്കാൻ സാധിക്കാതെ പോകുന്നത് കെകെആറിന് വലിയ തിരിച്ചടിയായേക്കും.

സൺറെെസേഴ്സ് ഹെെദരാബാദിന്റെ ക്യാപ്റ്റനായ പാറ്റ് കമ്മിൻസ് നിലവിൽ പരിക്കിന്റെ പിടിയിലാണ്. ഓസ്ട്രേലിയക്കാരനായ കമ്മിൻസ് ടി20 ലോകകപ്പ് പോലും കളിച്ചിരുന്നില്ല. ലഭിക്കുന്ന വിവരം അനുസരിച്ച് കമ്മിൻസ് ഐപിഎല്ലിൽ കളിക്കില്ല. അതുകൊണ്ടുതന്നെ പുതിയ നായകനെ കണ്ടെത്താനുള്ള നീക്കങ്ങൾ ഹെെദരാബാദ് ആരംഭിച്ചിട്ടുമുണ്ട്. ഇത്തവണ കമ്മിൻസ് കളിക്കാതിരുന്നാൽ ഹെെദരാബാദിന് അത് തിരിച്ചടിയായി മാറാനുള്ള സാധ്യത കൂടുതലായിരിക്കും. മികച്ചൊരു പേസ് ഓൾറൗണ്ടറുടെ സേവനമാണ് ഹെെദരാബാദിന് നഷ്ടമാകുന്നത്.

ധോണി എന്നെങ്കിലും ഇന്ത്യയുടെ പരിശീലകനാവുമോ? ആഗ്രഹമുണ്ടെന്ന് ഗംഭീർ, പക്ഷെ നടന്നേക്കില്ല? തടസമാകുന്നത് ബിസിസിഐ നിയമം

നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബംഗളൂരുവിനേയും പരിക്ക് ബാധിച്ചിട്ടുണ്ട്. ആർസിബിയുടെ സ്റ്റാർ പേസർ ജോഷ് ഹെയ്സൽവുഡ് ഇത്തവണ കളിച്ചേക്കില്ല. പരിക്കിനെത്തുടർന്ന് ടി20 ലോകകപ്പിൽ നിന്നടക്കം വിട്ടുനിൽക്കുന്ന ഹെയ്സൽവുഡ് ഐപിഎല്ലിൽ കളിക്കാൻ യാതൊരു സാധ്യതയുമില്ലെന്നാണ് വിവരം. അങ്ങനെയാണെങ്കിൽ അത് ആർസിബിയുടെ ബൗളിങ് കരുത്തിനെ പ്രതികൂലമായി ബാധിക്കുന്ന ഘടകമാണ്.

അവസാന സീസണിൽ 22 വിക്കറ്റുമായി ആർസിബിയുടെ കിരീട നേട്ടത്തിൽ ഏറ്റവും പ്രധാന പങ്കുവഹിച്ച താരങ്ങളിലൊരാളാണ് ഹെയ്സൽവുഡ്. അതുകൊണ്ടുതന്നെ ഹെയ്സൽവുഡിന്റെ അഭാവം ആർസിബിയെ ബാധിക്കുന്ന കാര്യം തന്നെയാണ്.

നിലവിലെ സാഹചര്യത്തിൽ മുംബെെ ഇന്ത്യൻസ്, ചെന്നെെ സൂപ്പർ കിങ്സ് തുടങ്ങിയ ടീമുകളെയൊന്നും പരിക്ക് കാര്യമായി ബാധിച്ചിട്ടില്ല. രാജസ്ഥാൻ റോയൽസിനേയും പഞ്ചാബ് കിങ്സിനേയും ഡൽഹി ക്യാപിറ്റൽസിനേയും ഗുജറാത്ത് ടെെറ്റൻസിനേയും നിലവിൽ പരിക്ക് ബാധിച്ചിട്ടില്ല. എന്തായാലും പരിക്ക് എത്രത്തോളം തിരിച്ചടിയായി മാറുമെന്നത് കാത്തിരുന്ന് കാണാം.