IPL 2026: നരെയ്നെ മാറ്റി വീണ്ടും ഓപ്പണർ‌, ​ഗോൾഡൻ ഡക്കായി അജിൻക്യ രഹാനെ; കെകെആറിൽ നിന്ന് പുറത്താക്കണമെന്ന് ആരാധകർ

ഇന്ത്യൻ പ്രീമിയർ ലീഗിന്റെ 2026 സീസണിലെ കൊൽക്കത്ത നെെറ്റ് റെെഡേഴ്സ് ക്യാപ്റ്റൻ അജിൻക്യ രഹാനെയുടെ മോശം ഫോം തുടരുന്നു. ഗുജറാത്ത് ടെെറ്റൻസിനെതിരായ മത്സരത്തിൽ ഗോൾഡൻ ഡക്കായാണ് രഹാനെ മടങ്ങിയത്. സുനിൽ നരെയ്നെ ഓപ്പണർ സ്ഥാനത്ത് നിന്ന് മാറ്റി വീണ്ടും ഓപ്പണർ റോളിലേക്കെത്തിയ രഹാനെ മുഹമ്മദ് സിറാജിനെ സിക്സർ പറത്താൻ ശ്രമിച്ചപ്പോൾ ആദ്യ പന്തിൽത്തന്നെ വിക്കറ്റ് നഷ്ടമാവുകയായിരുന്നു. സീസണിൽ അഞ്ച് മത്സരത്തിലും ജയിക്കാത്ത കെെകആറിനൊപ്പം വീണ്ടും രഹാനെ നിരാശപ്പെടുത്തിയതിന് പിന്നാലെ വലിയ വിമർശനമാണ് ആരാധകരുടെ ഭാഗത്ത് നിന്ന് ഉണ്ടായിരിക്കുന്നത്. രഹാനെയെ കെകെആർ പുറത്താക്കണമെന്നാണ് ആരാധകർ എക്സിലൂടെ പ്രതികരിക്കുന്നത്. 37കാരനായ രഹാനെ അന്താരാഷ്ട്ര ക്രിക്കറ്റിൽ നിന്ന് പുറത്തായിട്ട് നാളുകളേറെയായി.

ആഭ്യന്തര ക്രിക്കറ്റിലും അത്ര മികച്ച പ്രകടനമല്ല നടത്തുന്നത്. എന്നാൽ കെകെആർ രഹാനെയെ നായകനാക്കി മുന്നോട്ട് പോകാൻ തീരുമാനിക്കുകയായിരുന്നു. ഐപിഎല്ലിലെ അനുഭവസമ്പന്നനായ ക്യാപ്റ്റനാണ് രഹാനെ. എന്നാൽ അദ്ദേഹത്തിന്റെ കണക്കുകൾ നിരാശപ്പെടുത്തുന്നതാണെന്ന് നിസംശയം പറയാം. ബാറ്റ്സ്മാനെന്ന നിലയിൽ ഭേദപ്പെട്ട റെക്കോഡ് ഐപിഎല്ലിലുണ്ടെങ്കിലും ക്യാപ്റ്റനായി ലോക തോൽവിയാണ്.

എന്നിട്ടും കെകെആർ ഇപ്പോഴും രഹാനെയെ വിശ്വസിക്കുന്നതാണ് അത്ഭുതമെന്നാണ് ആരാധകർ പ്രതികരിക്കുന്നത്. ഐപിഎല്ലിന്റെ ഈ സീസണിൽ ആറ് മത്സരത്തിൽ നിന്ന് 152 റൺസാണ് രഹാനെ നേടിയിരിക്കുന്നത്. 25 മാത്രമാണ് ശരാശരി. മുംബെെ ഇന്ത്യൻസിനെതിരായ ആദ്യ മത്സരത്തിൽ 67 റൺസ് നേടാൻ രഹാനെക്ക് സാധിച്ചെങ്കിലും പിന്നീടുള്ള മത്സരങ്ങളിലെല്ലാം ഫ്ളോപ്പായി.
IPL 2026: രോഹിത്തിന് പരിക്കേറ്റപ്പോൾ അവസരം, കിടിലൻ സെഞ്ചുറിയോടെ ക്വിന്റൻ ഡീകോക്ക്; എലെെറ്റ് ക്ലബ്ബിൽ സഞ്ജുവിനും രാഹുലിനുമൊപ്പം
രഹാനെ ഉത്തരവാദിത്തം ഏറ്റെടുക്കുന്നില്ലെന്നും ടി20യിൽ ഇനിയും രഹാനെയിൽ നിന്ന് അത്ഭുതം പ്രതീക്ഷിക്കാനാവില്ലെന്നുമാണ് ആരാധകർ പറയുന്നത്. രഹാനെയെ പുറത്താക്കണമെന്ന ആവശ്യമാണ് ആരാധകർ ഉയർത്തുന്നതെങ്കിലും കെകെആറിനെ സംബന്ധിച്ച് ഇത്തരമൊരു തീരുമാനം എളുപ്പമല്ല. രഹാനെയെ പുറത്താക്കിയാൽ പകരം ആരെ നായകനാക്കുമെന്നതാണ് പ്രധാനപ്പെട്ട ചോദ്യം.

വെെസ് ക്യാപ്റ്റനായ റിങ്കു സിങ്ങിനും മികച്ച ഫോമിൽ കളിക്കാനാവുന്നില്ല. ഓസ്ട്രേലിയൻ ഓൾറൗണ്ടർ കാമറൂൺ ഗ്രീനും മോശം ഫോമിൽ തുടരുകയാണ്. രഹാനെയെ പുറത്താക്കിയാൽ പകരം ക്യാപ്റ്റനാക്കാൻ ആളില്ലാത്ത അവസ്ഥയാണ് നിലവിൽ കെകെആറിലുള്ളത്. പല പരീക്ഷണങ്ങളും കെകെആർ ഈ സീസണിൽ നടത്തിയിട്ടുണ്ട്. എന്നാൽ ഇതൊന്നും ഫലം കാണുന്നില്ലെന്നതാണ് വസ്തുത.

IPL 2026: സൂര്യകുമാർ യാദവിന് ഇത് എന്തുപറ്റി? ആദ്യ പന്തിൽത്തന്നെ പുറത്ത്, ഇന്ത്യൻ ടീമിന്റെ ക്യാപ്റ്റൻ സ്ഥാനം തെറിക്കുമോ?

ഗുജറാത്ത് ടെെറ്റൻസിനെതിരേ മോശം ഫോമിലുള്ള ഫിൻ അലനെ മാറ്റി മറ്റൊരു ന്യൂസീലൻഡ് താരമായ ടിം സീഫർട്ടിനെയാണ് കെകെആർ കളിപ്പിച്ചത്. സീഫർട്ട് അലനെക്കാളും മോശം പ്രകടനം നടത്തിയാണ് പുറത്തായത്. 14 പന്തിൽ രണ്ട് ഫോറും ഒരു സിക്സും ഉൾപ്പെടെ 19 റൺസെടുത്താണ് സീഫർട്ട് മടങ്ങിയത്. മൂന്നാം നമ്പറിലേക്കെത്തിയ അൻകൃഷ് രഘുവംശി നാല് പന്തിൽ എട്ട് റൺസെടുത്താണ് പുറത്തായത്.

കെകെആർ ബാറ്റിങ് ഓഡറിൽ നിരന്തരം മാറ്റങ്ങൾ വരുത്തി പരീക്ഷണങ്ങൾ നടത്തുന്നുണ്ടെങ്കിലും ഇതൊന്നും ഫലം കാണുന്നില്ല. ഈ പരീക്ഷണങ്ങൾ ഫോമിൽ കളിക്കുന്ന താരങ്ങളേയും പ്രതികൂലമായി ബാധിക്കുകയാണ് ചെയ്യുന്നതെന്ന് പറയാം. എന്തായാലും കെകെആറിന്റെ സീസണിലെ ഇതുവരെയുള്ള പ്രകടനം നിലവാരം കാട്ടുന്നില്ലെന്നതാണ് വസ്തുത.