IPL 2026: പരിക്കിന്റെ പണി തുടരുന്നു, ഇനിയും എത്രപേർ പുറത്താവും? വിദേശ സൂപ്പർ പേസർമാരെല്ലാം പുറത്ത്, ടീമുകൾക്ക് തിരിച്ചടി

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ പോവുകയാണ്. ടൂർണമെന്റ് ആവേശത്തിലേക്ക് ആറ് ദിവസം മാത്രം ശേഷിക്കെ പരിക്കിന്റെ കളികൾ തുടരുകയാണ്. ഇതിനോടകം പല സൂപ്പർ താരങ്ങളും പരിക്കേറ്റ് പുറത്തായിക്കഴിഞ്ഞു. ഇനി എത്ര താരങ്ങൾ പുറത്താകുമെന്നതാണ് കാത്തിരുന്ന് കാണേണ്ടത്. പല ടീമുകളിലേയും പ്രധാന ബൗളർമാരെല്ലാം പരിക്കിന്റെ പിടിയിലായതോടെ ഇനി എന്ത് എന്ന വലിയ ചോദ്യമാണ് മുന്നിലുള്ളത്.വിദേശ പേസർമാരെയാണ് പരിക്ക് കൂടുതലായി ബാധിച്ചിരിക്കുന്നത്. വിദേശ താരങ്ങൾക്കാടി കോടികൾ മുടക്കിയ ടീമുകളെല്ലാം ഇപ്പോൾ ഉത്തമ പകരക്കാരെ കണ്ടെത്താനാവാതെ പ്രയാസപ്പെടുകയാണ്. ടൂർണമെന്റ് ആരംഭിക്കാൻ ഇനിയും ആറ് ദിവസമുള്ളപ്പോൾ‍ ഈ പട്ടിക ഇനിയും നീളാനാണ് സാധ്യത കൂടുതൽ.

കൊൽക്കത്ത നെെറ്റ് റെെഡേഴ്സിന്റെ മൂന്ന് സൂപ്പർ താരങ്ങളാണ് പരിക്കേറ്റ് പുറത്തായിരിക്കുന്നത്. സ്റ്റാർ പേസർ ഹർഷിത് റാണ ഈ സീസണിൽ ഉണ്ടാകില്ല. ഇന്ത്യൻ പേസർക്ക് പരിക്കിനെത്തുടർന്ന് ടി20 ലോകകപ്പും നഷ്ടമായിരുന്നു. ബാറ്റുകൊണ്ടും ഭേദപ്പെട്ട് നിൽക്കുന്ന ഹർഷിത് റാണയുടെ അഭാവം കെകെആറിനെ സംബന്ധിച്ച് വലിയ തിരിച്ചടി തന്നെയാണെന്ന് നിസംശയം പറയാം.

ശ്രീലങ്കൻ പേസർ മതീഷ പതിരാനയെ കെകെആർ ടീമിലേക്കെത്തിച്ചിരുന്നു. എന്നാൽ താരവും പരിക്കിന്റെ പിടിയിലാണ്. ഈ സീസണിൽ കളിക്കുമെന്ന് പറയുമ്പോഴും പൂർണ്ണ ഫിറ്റ്നസിലേക്കെത്താൻ പതിരാനക്ക് സാധിച്ചിട്ടില്ല. കളിച്ചാലും താരത്തിന്റെ ഫോം വലിയ ചോദ്യമായി തുടരുന്നു. ഏറ്റവും ഒടുവിലായി ആകാശ് ദീപാണ് കെകെആറിൽ നിന്ന് പരിക്കേറ്റ് പുറത്തായത്. നിലവിൽ പേസ് ബൗളർമാരുടെ വലിയ അഭാവം കെകെആറിലുണ്ടെന്ന് പറയാം.
IPL 2026: സൂപ്പർ താരങ്ങൾ, പക്ഷെ ഇവരുടെ ഫോം ടീമുകൾക്ക് ആശങ്ക; ഫ്ളോപ്പായാൽ വലിയ തിരിച്ചടി, അഞ്ച് താരങ്ങൾ ഇവരാണ്
നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബംഗളൂരുവിന്റെ സ്റ്റാർ പേസറായ ജോഷ് ഹെയ്സൽവുഡ് പരിക്കിന്റെ പിടിയിലാണ്. ഹെയ്സൽവുഡ് രണ്ടാഴ്ചക്ക് ശേഷം ടൂർണമെന്റിലേക്കെത്തിയേക്കും എന്ന റിപ്പോർട്ടുകളുമുണ്ട്. എന്തായാലും ഏറെ നാളുകളായി പരിക്കിന്റെ പിടിയിലുള്ള ഹെയ്സൽവുഡിന് ഐപിഎൽ നഷ്ടമാവാനാണ് സാധ്യത കൂടുതൽ. അവസാന സീസണിൽ 22 വിക്കറ്റുമായി ആർസിബിയുടെ കിരീട നേട്ടത്തിൽ പ്രധാന പങ്കുവഹിക്കാൻ ഹെയ്സൽവുഡിനായി.

സൺറെെസേഴ്സ് ഹെെദരാബാദ് നായകനായ പാറ്റ് കമ്മിൻസ് എപ്പോൾ തിരിച്ചുവരുമെന്ന് പറയാനാവില്ല. കമ്മിൻസിന് പകരം ഇഷാൻ കിഷനെ ഹെെദരാബാദ് ക്യാപ്റ്റനാക്കി പ്രഖ്യാപിച്ചിട്ടുമുണ്ട്. ജാക്ക് എഡ്വാർഡ്സും പരിക്കിന്റെ പിടിയിലായത് ഹെെദരാബാദിന് വലിയ തിരിച്ചടിയാണ്. ഇത്തവണ ശക്തമായ തിരിച്ചുവരവ് ലക്ഷ്യംവെക്കുന്ന ഹെെദരാബാദിന്റെ ബൗളിങ് നിരയെ പരിക്ക് ദുർബലപ്പെടുത്തിയിരിക്കുകയാണ്.

IPL 2026: ചേട്ടൻ തുടങ്ങി മക്കളേ... സിഎസ്കെ നെറ്റ്സിൽ പരിശീലനം ആരംഭിച്ച് സഞ്ജു, ആദ്യ സെഷനിൽ ചെയ്തത് ഇങ്ങനെ

ചെന്നെെ സൂപ്പർ കിങ്സ് വലിയ പ്രതീക്ഷയോടെ കണ്ട പേസറാണ് ഓസ്ട്രേലിയക്കാരനായ നതാൻ ഇല്ലിസ്. ഡെത്തോവർ സ്പെഷ്യലിസ്റ്റായ താരം സിഎസ്കെയുടെ തുറുപ്പുചീട്ടാവുമെന്നാണ് കരുതിയിരുന്നത്. എന്നാൽ പരിക്ക് ഇല്ലിസിന് തിരിച്ചടിയായി മാറുകയാണ്. ഈ സീസണിൽ കളിക്കാൻ ഇല്ലിസ് ഉണ്ടാകില്ലെന്ന് ഉറപ്പായിരിക്കുന്നു.

സഞ്ജു സാംസണ് പകരം രാജസ്ഥാൻ റോയൽസ് സിഎസ്കെയിൽ നിന്ന് കൊണ്ടുവന്ന സാം കറനും പരിക്കിന്റെ പിടിയിലായി. ഇംഗ്ലണ്ട് ഓൾറൗണ്ടർക്ക് ഇത്തവണ നിർണ്ണായക റോളാണ് രാജസ്ഥാനിൽ ഉണ്ടായിരുന്നത്. എന്നാൽ പരിക്ക് ഇപ്പോൾ വില്ലനായി മാറിയിരിക്കുകയാണെന്ന് നിസംശയം പറയാം.