IPL 2026: പ്ലേ ഓഫിൽ കടക്കുന്നതല്ല കാര്യം, ബഹുമാനം വേണേൽ കപ്പ് നേടണം; ഇല്ലെങ്കിൽ...ലഖ്നൗ താരങ്ങൾക്ക് മുന്നറിയിപ്പുമായി ​ഗോയങ്ക

ഇന്ത്യൻ പ്രീമിയർ ലീഗിന്റെ 2026 സീസൺ 28ന് ആരംഭിക്കാൻ പോവുകയാണ്. 10 ടീമുകളും ഇത്തവണ വലിയ കിരീട പ്രതീക്ഷയോടെ ഇറങ്ങുമ്പോൾ പോരാട്ടം തീപാറുമെന്ന കാര്യം ഉറപ്പാണ്. നിലവിലെ ചാമ്പ്യന്മാരായ റോയൽ‌ ചലഞ്ചേഴ്സ് ബംഗളൂരു ഇത്തവണ കിരീടം നിലനിർത്തുമോ അതോ പുതിയ ചാമ്പ്യന്മാർ ഇത്തവണ ഉണ്ടാകുമോയെന്നതാണ് ആരാധകർ ഉറ്റുനോക്കുന്നത്.ഇത്തവണ വലിയ പ്രതീക്ഷയോടെയാണ് ലഖ്നൗ സൂപ്പർ ജയ്ന്റ്സ് ഇറങ്ങുന്നത്. ഋഷഭ് പന്ത് നയിക്കുന്ന ലഖ്നൗവിന് ഇത്തവണ കിരീടം നേടേണ്ടത് അഭിമാന പ്രശ്നമാണെന്ന് പറയാം. സഞ്ജീവ് ഗോയങ്ക ഉടമയായിട്ടുള്ള ലഖ്നൗവിന് ഇത്തവണ മികച്ച താരനിര തന്നെയുണ്ട്. ഇപ്പോഴിതാ ഐപിഎൽ പോരാട്ടം ആരംഭിക്കാനിരിക്കെ ലഖ്നൗ താരങ്ങൾക്ക് മുന്നറിയിപ്പുമായി രംഗത്തെത്തിയിരിക്കുകയാണ് ടീം ഉടമയായ സഞ്ജീവ് ഗോയങ്ക.

'ലഖ്നൗ ടീമിന്റെ ശരിയായ വ്യക്തിത്വം എന്താണെന്ന് ഇപ്പോഴും കാട്ടാനായിട്ടില്ലെന്നാണ് കരുതുന്നത്. ഏത് സ്പോർട്സ് ടീമിനെ സംബന്ധിച്ചും കിരീടം നേടുമ്പോൾ ലഭിക്കുന്ന ബഹുമാനം മറ്റെന്ത് ചെയ്താലും ലഭിക്കില്ല. ഞങ്ങൾ രണ്ട് തവണ പ്ലേ ഓഫിൽ പ്രവേശിച്ചിട്ടുണ്ട്. എന്നാൽ അത് മതിയാകില്ല. ചില മത്സരങ്ങൾ ജയിക്കുകയും തോൽക്കുകയും ചെയ്യുക എന്നതല്ല ഇത്തവണ ആദ്യ കിരീടം നേടാൻ സാധിക്കണം. ഇല്ലെങ്കിൽ ബഹുമാനം ലഭിക്കില്ല.' ജിയോ ഹോട്ട്സ്റ്റാറിൽ സംസാരിക്കവെ ഗോയങ്ക പറഞ്ഞു.

ക്യാപ്റ്റനെന്ന നിലയിൽ ഋഷഭ് പന്തിനുള്ള മുന്നറിയിപ്പാണിത്. കെ എൽ രാഹുലായിരുന്നു ലഖ്നൗവിന്റെ ആദ്യത്തെ പ്രധാന താരം. എന്നാൽ ഗോയങ്കയുമായുള്ള അഭിപ്രായഭിന്നതയെത്തുടർന്നാണ് രാഹുൽ ടീം വിട്ടത്. അവസാന സീസണിൽ ഋഷഭ് പന്തിന് കീഴിൽ ഇറങ്ങിയ ലഖ്നൗവിന് ഏഴാം സ്ഥാനത്താണ് എത്താനായത്. അതുകൊണ്ടുതന്നെ ഈ സീസണിൽ ശക്തമായ തിരിച്ചുവരവ് ടീമിന് നടത്തേണ്ടതായുണ്ട്.
IPL 2026: രാജസ്ഥാന്റെ ഉടമ മാറി, റിയാൻ പരാ​ഗിന്റെ ക്യാപ്റ്റൻസി തെറിക്കുമോ? നയിക്കാൻ ജയ്സ്വാൾ തയ്യാർ, ടീമിന്റെ നീക്കം ഇതാവും
ഋഷഭ് പന്തിനെ സംബന്ധിച്ചും ഈ സീസൺ സുപ്രധാനമാണ്. ഇന്ത്യയുടെ ടെസ്റ്റ് ടീമിലേക്ക് മാത്രമായി ഒതുക്കപ്പെട്ട ഋഷഭിന് പരിമിത ഓവർ ടീമിലേക്ക് എത്താൻ ഇത്തവണത്തെ ഐപിഎല്ലിൽ ബാറ്റുകൊണ്ട് ശ്രദ്ധേയ പ്രകടനം കാഴ്ചവെക്കേണ്ടതായുണ്ട്. അല്ലാത്ത പക്ഷം വരുന്ന ഏകദിന ലോകകപ്പിനുള്ള ഇന്ത്യൻ ടീമിലെ സീറ്റ് പോലും ഋഷഭിന് നഷ്ടമാകുന്ന സാഹചര്യം ഉണ്ടായേക്കും.

അവസാന സീസണിൽ ലഖ്നൗ നിരാശപ്പെടുത്തിയെങ്കിലും ചില പോസിറ്റീവ് കാര്യങ്ങളുമുണ്ടെന്നും ഗോയങ്ക ചൂണ്ടിക്കാട്ടി. 'ഞങ്ങളുടെ പ്രധാനപ്പെട്ട ബൗളർമാരെല്ലാം പരിക്കിന്റെ പിടിയിലായപ്പോഴും ആദ്യ ആറ് മത്സരത്തിൽ നാല് മത്സരം ഞങ്ങൾക്ക് ജയിക്കാനായിരുന്നു. പ്രതീക്ഷ നൽകുന്ന ചില നീക്കങ്ങൾ പിന്നീട് നടന്നു. എയ്ഡൻ മാർക്രവും മിച്ചൽ മാർഷും ചേർന്ന് ഓപ്പണിങ്ങിലേക്കെത്തി.

IPL 2026: സഞ്ജു വന്നതോടെ റുതുരാജിന് ഓപ്പണർ സീറ്റ് നഷ്ടമാവും, സിഎസ്കെയ്ക്ക് ഇത്തവണ പുതിയ കൂട്ടുകെട്ട്; കാരണം എന്താണെന്ന് അറിയാം

രണ്ട് പേരുടേയും മികച്ച ഐപിഎൽ സീസണായിരുന്നു ഇത്. പുതിയതായി ടീമിലേക്കെത്തിയ ദിഘ് വേഷ് റാത്തി മികച്ച പ്രകടനം പുറത്തെടുത്തു. ഇത്തവണ ബൗളിങ് നിരയുടെ കരുത്തുയർത്തി മികച്ച ഇന്ത്യൻ ആഭ്യന്തര ബൗളർമാരെ ടീമിലേക്ക് എത്തിച്ചിട്ടുണ്ട്. ഇപ്പോഴുള്ള ടീമിൽ സംതൃപ്തനാണ്' ഗോയങ്ക പറഞ്ഞു. ലഖ്നൗവിന് ഇത്തവണ ഭേദപ്പെട്ട താരനിരയുണ്ട്. എന്നാൽ ഋഷഭിന്റെ പ്രകടനം ടീമിന് നിർണ്ണായകമാവും. ഇത്തവണ ശക്തമായ പ്രകടനം നടത്താൻ ലഖ്നൗവിന് സാധിക്കുമോയെന്നത് കാത്തിരുന്ന് കാണാം.