​IPL 2026: രാജസ്ഥാൻ കാട്ടിയത് വലിയ മണ്ടത്തരം, രണ്ട് സീസണിൽ ജഡേജയെ ക്യാപ്റ്റനാക്കണമായിരുന്നു; കാരണം പറഞ്ഞ് ആർ അശ്വിൻ

ഇന്ത്യൻ പ്രീമിയർ ലീഗിന്റെ 2026 സീസൺ നാളെ ആരംഭിക്കാൻ പോവുകയാണ്. 10 ടീമുകളും സജീവ കിരീട പ്രതീക്ഷയോടെയാണ് ഇത്തവണ ഇറങ്ങുന്നത്. ഈ സീസണിൽ എല്ലാവരും ഉറ്റുനോക്കുന്ന ടീമുകളിലൊരാൾ രാജസ്ഥാൻ റോയൽസാണ്. സഞ്ജു സാംസൺ നായകസ്ഥാനമൊഴിഞ്ഞതോടെ ഇത്തവണ രാജസ്ഥാൻ റോയൽസിന്റെ വിധി എന്താകുമെന്നാണ് എല്ലാവരും ഉറ്റുനോക്കുന്നത്.ഇത്തവണ നിർണ്ണായക മാറ്റത്തോടെയാണ് രാജസ്ഥാൻ ഇറങ്ങുന്നത്. സഞ്ജു സാംസൺ പോയതോടെ പകരക്കാരായി സാം കറനെയും രവീന്ദ്ര ജഡേജയേയും രാജസ്ഥാൻ ടീമിലെത്തിച്ചിരുന്നു. പിന്നീട് നായകസ്ഥാനത്തേക്ക് റിയാൻ പരാഗിനെ കൊണ്ടുവരികയും ചെയ്തു. രവീന്ദ്ര ജഡേജ, ദ്രുവ് ജുറേൽ, യശ്വസി ജയ്സ്വാൾ എന്നിവരെയെല്ലാം മറികടന്നാണ് റിയാൻ പരാഗിനെ രാജസ്ഥാൻ ക്യാപ്റ്റനാക്കിയത്.

ഇപ്പോഴിതാ രാജസ്ഥാൻ റോയൽസ് കാട്ടിയത് വലിയ പിഴവാണെന്ന് ചൂണ്ടിക്കാട്ടിയിരിക്കുകയാണ് മുൻ രാജസ്ഥാൻ റോയൽസ് താരവും സ്പിൻ ഓൾറൗണ്ടറുമായ ആർ അശ്വിൻ. ഇപ്പോൾത്തന്നെ രാജസ്ഥാന്റെ നായകസ്ഥാനത്തേക്ക് റിയാൻ പരാഗിനെ കൊണ്ടുവന്നത് തെറ്റായ തീരുമാനം ആണെന്നാണ് അശ്വിൻ പറയുന്നത്. രവീന്ദ്ര ജഡേജയെ രണ്ട് വർഷത്തേക്ക് ക്യാപ്റ്റനാക്കി പരാഗിന് നായകനായി വളരാൻ അവസരം നൽകണമായിരുന്നുവെന്നാണ് അശ്വിൻ അഭിപ്രായപ്പെടുന്നത്.

'രാജസ്ഥാൻ റോയൽസിന്റെ നേതൃത്വപരമായ അടിത്തറയെക്കുറിച്ച് എനിക്ക് വലിയ ഉറപ്പ് പറയാൻ സാധിക്കില്ല. രവീന്ദ്ര ജഡേജയെ രണ്ട് വർഷം ക്യാപ്റ്റനാക്കി റിയാൻ പരാഗിനെ ജഡേജക്ക് കീഴിൽ വളർത്താൻ ശ്രമിക്കണമായിരുന്നു. റിയാൻ പരാഗിനെ വളർത്താനുള്ള എല്ലാ സാങ്കേതിക മികവും രാജസ്ഥാനുണ്ട്. ക്യാപ്റ്റനായുള്ള റിയാൻ പരാഗിന്റെ മുകളിൽ വലിയ ഭാരമാണ്. അവൻ സ്വതന്ത്ര്യ മനസോടെ കളിക്കുന്ന കളിക്കാരനാണ്. പരാഗ് അസം ക്യാപ്റ്റനായിട്ടുണ്ട്. എന്നാൽ അസം ക്യാപ്റ്റനാവുന്നതും ഐപിഎൽ ക്യാപ്റ്റനാവുന്നതും തമ്മിൽ വലിയ വ്യത്യാസമുണ്ട്.
IPL 2026: സഞ്ജു സാംസണിൽ പരീക്ഷണം വേണ്ട, സിഎസ്കെ ഓപ്പണർ റോളിൽ കളിപ്പിക്കണം; മൂന്ന് കാരണങ്ങൾ ഇതാ
ജോഫ്രാ ആർച്ചർ ഒരേ സമയം മികവ് കാട്ടുകയും ചിലപ്പോൾ മോശം പ്രകടനം പുറത്തെടുക്കുകയും ചെയ്യും. ആർച്ചറെ എങ്ങനെ പരാഗ് നിയന്ത്രിക്കുമെന്നതാണ് വലിയ വെല്ലുവിളി. രവി ബിഷ്നോയ് അത്ര മികച്ച സീസണ് ശേഷമല്ല ഇത്തവണ എത്തുന്നത്. ജഡേജ സ്വാഭാവികമായുള്ള പതിവ് മികവ് പുറത്തെടുക്കുന്ന താരമാണ്. ഷിംറോൻ ഹെറ്റ്മെയറിന്റെ ബാറ്റിങ്ങാണ് മറ്റൊരു പ്രധാന പ്രശ്നം.' അശ്വിൻ പറഞ്ഞു.

അവസാന സീസണിൽ സഞ്ജു സാംസണിന്റെ അഭാവത്തിൽ റിയാൻ പരാഗ് രാജസ്ഥാനെ 8 മത്സരത്തിൽ നയിച്ചിരുന്നു. രണ്ട് മത്സരത്തിലാണ് പരാഗിന് രാജസ്ഥാനെ ജയിപ്പിക്കാനായത്. 14 മത്സരത്തിൽ നിന്ന് 10 പോയിന്റാണ് അവസാന സീസണിൽ രാജസ്ഥാൻ നേടിയത്. പരാഗ് ഭേദപ്പെട്ട ബാറ്റിങ് പ്രകടനം നടത്തിയെങ്കിലും ക്യാപ്റ്റനെന്ന നിലയിൽ അദ്ദേഹം നിരാശപ്പെടുത്തി.

IPL 2026: ഇന്ത്യക്കായി ഇതുവരെ അരങ്ങേറിയിട്ടില്ല, പക്ഷെ ഇത്തവണത്തെ ഐപിഎല്ലിൽ മിന്നിച്ചേക്കും; ആറ് പേർ ഇവരാണ്

ആഭ്യന്തര ക്രിക്കറ്റിൽ ക്യാപ്റ്റനെന്ന നിലയിൽ അനുഭവസമ്പത്തുണ്ടെങ്കിലും ഐപിഎല്ലിൽ നായകനെന്ന നിലയിൽ പരാഗിന് വലിയ മികവ് അവകാശപ്പെടാനാവില്ല. സഞ്ജു സാംസണ് കീഴിൽ ഫെെനൽ കളിച്ച ടീമാണ് രാജസ്ഥാൻ. അതുകൊണ്ടുതന്നെ പരാഗിന് മുന്നിൽ വലിയ വെല്ലുവിളിയാണുള്ളത്. എന്തായാലും ഇത്തവണ രാജസ്ഥാൻ ടീം മാനേജ്മെന്റ് പരാഗിനെ വിശ്വസിച്ച് മുന്നോട്ട് പോകാനാണ് സാധ്യത. എന്താകും രാജസ്ഥാന്റെ വിധിയെന്നത് കാത്തിരുന്ന് കാണാം.