IPL 2026: വമ്പൻ ട്വിസ്റ്റ്, കെകെആറും സിഎസ്കെയും സ്റ്റെപ് ബാക്ക്; സഞ്ജുവിനെ റാഞ്ചാൻ ഡൽഹി രം​ഗത്ത് - റിപ്പോർട്ട്

Authored by: അനുഷ ഗംഗാധരൻ|Samayam Malayalam•1 Sept 2025, 4:59 pm

രാജസ്ഥാൻ റോയൽസിന് നിന്നും സഞ്ജു സാംസൺ മറ്റൊരു ടീമിലേക്ക് ചേക്കേറും എന്ന അഭ്യൂഹങ്ങൾ ശക്തമായി പ്രചരിക്കുകയാണ്‌. തല ധോണിയുടെ ചെന്നൈ സൂപ്പർ കിങ്സിലേക്ക് സഞ്ജു ചേക്കേറും എന്നായിരുന്നു ആദ്യം വന്ന റിപ്പോർട്ടുകൾ. ശേഷം കൊൽക്കത്ത നൈറ്റ് റൈഡേഴ്സും താരത്തെ സ്വന്തമാക്കാൻ മുൻപന്തിയിലാണ് എന്നാണ് സൂചന. എന്നാൽ ഇപ്പോൾ മറ്റൊരു റിപ്പോർട്ട് കൂടി എത്തിയിരിക്കുകയാണ്. ഐപിഎൽ 2026 സീസണിന് മുമ്പ് സഞ്ജു രാജസ്ഥാൻ റോയൽസിൽ നിന്ന് പുറത്തുവരുകയാണ് എങ്കിൽ സഞ്ജുവിനെ പൊന്നുംവിലകൊടുത്ത് സ്വന്തമാക്കാൻ ഡൽഹി ക്യാപിറ്റൽ തയ്യാറാണ് എന്ന സൂചനകളാണ് ഇപ്പോൾ ലഭിക്കുന്നത്.
രോഹിത്തും കോലിയും വേണ്ട, ക്യാപ്റ്റൻ ​ഗിൽ; 2027ലെ ഏകദിന ലോകകപ്പിൽ ഇന്ത്യക്ക് ഈ 11 ബെസ്റ്റ്
ഐപിഎൽ എന്ന ടൂർണമെന്റിൽ മികച്ച ക്യാപ്റ്റൻസി കാഴ്ചവെച്ച താരങ്ങളിൽ ഒരാളാണ് മലയാളികളുടെ പ്രിയപ്പെട്ട വിക്കറ്റ് കീപ്പർ ബാറ്റ്സ്മാൻ സഞ്ജു സാംസൺ . ഐപിഎൽ ടൂർണമെന്റിന്റെ പ്രഥമ സീസണിൽ കിരീടം ഉയർത്തിയ രാജസ്ഥാൻ റോയൽസ് പിന്നീട ആദ്യമായി ഫൈനൽ മത്സരം കളിക്കുന്നത് സഞ്ജുവിന്റെ ക്യാപ്റ്റൻസിയ്ക്ക് കീഴിലാണ്.

അതുകൊണ്ടു തന്നെ സഞ്ജുവിനെ സ്വന്തമാക്കാൻ ചില ടീമുകൾ മിനി താരലേലത്തിൽ വാശിയോടെ ലേലം വിളിക്കും എന്നതിൽ തര്ക്കമില്ല. സഞ്ജു രാജസ്ഥാൻ റോയൽസ് വിടുകയാണ് എങ്കിൽ ഡൽഹി ക്യാപിറ്റൽസ് അദ്ദേഹത്തെ സ്വാഗതം ചെയ്യും എന്ന റിപ്പോർട്ട് ദേശീയ മാധ്യമമായ ന്യൂസ് 24 ആണ് പുറത്തുവിട്ടത്.

ഡൽഹി ക്യാപിറ്റൽസ് വൃത്തങ്ങൾ മാധ്യമങ്ങളോട് സംസാരിക്കുകയും വിക്കറ്റ് കീപ്പർ ബാറ്റ്‌സ്മാൻ ആയ സഞ്ജു സാംസണിൽ തങ്ങൾക്ക് താൽപ്പര്യമുണ്ടെന്ന് സ്ഥിരീകരിക്കുകയും ചെയ്തു. 'സഞ്ജു രാജസ്ഥാൻ വിട്ടാൽ, ഞങ്ങൾ അദ്ദേഹത്തെ തുറന്ന കൈകളോടെ സ്വാഗതം ചെയ്യും' എന്നാണ് ഡൽഹി ക്യാപിറ്റൽസ് വൃത്തങ്ങൾ പറഞ്ഞത്.

ഡൽഹിയുടെ നിലവിലെ ക്യാപ്റ്റൻ അക്‌സർ പട്ടേലാണ്. കെഎൽ രാഹുലിന്റെ കരുത്തും ഡൽഹിയ്ക്ക് ഉണ്ട്. സഞ്ജുവിനെ സ്വന്തമാക്കാൻ ഡൽഹിയ്ക്ക് സാധിച്ചാൽ നായക പട്ടം നല്കിയായിരിക്കും ഡൽഹി ഒരുപക്ഷെ സഞ്ജുവിനെ ടീമിലേക്ക് എത്തിക്കുക. എന്നാൽ സഞ്ജുവിനെ സ്വന്തമാക്കുക എന്നത് അത്ര എളുപ്പായിരിക്കില്ല.

നിലവിൽ ഇതുവരെ സഞ്ജു രാജസ്ഥാൻ വിട്ട് പുറത്തുവന്നിട്ടില്ല. അഭ്യൂഹങ്ങൾ ശക്തമായി നിലനിൽക്കുന്നുണ്ടെങ്കിലും സഞ്ജു ഇപ്പോഴും റോയൽസ് താരമാണ്. ആർ അശ്വിനുമായി നടത്തിയ ഒരു അഭിമുഖത്തിൽ സഞ്ജുവിന് രാജസ്ഥാൻ റോയൽസുമായുള്ള ആത്മബന്ധത്തെ കുറിച്ച് തുറന്ന് സംസാരിക്കുകയും ചെയ്‌തിരുന്നു.

ഇനി ഐപിഎൽ മിനി താരലേലത്തിന് മുമ്പ് സഞ്ജു റോയൽസ് വിടുകയാണ് എങ്കിൽ താരത്തെ സ്വന്തമാക്കാൻ പ്രധാനമായും മത്സരിക്കാൻ സാധ്യതയുള്ള ടീമുകളാണ് ചെന്നൈ സൂപ്പർ കിങ്‌സും കൊൽക്കത്ത നൈറ്റ് റൈഡേഴ്സും. ഇവർക്കൊപ്പം ഇനി ഡൽഹി ക്യാപിറ്റൽസും മത്സര രംഗത്തുണ്ടാകും.

നിലവിലെ സഞ്ജുവിന്റെ പ്രകടനം കാണുമ്പോൾ സഞ്ജുവിനെ സ്വന്തമാക്കാൻ തയ്യാറായി ഇനിയും ടീമുകൾ രംഗത്തെത്താനുള്ള സാധ്യത കൂടുതലാണ്. ഇപ്പോൾ നടന്നുകൊണ്ടിരിക്കുന്ന കേരള ക്രിക്കറ്റ് ലീഗ് 2025 സീസണിൽ കൊച്ചി ബ്ലൂ ടൈഗേഴ്‌സിനായി ഒപ്പനറി കളിക്കുന്ന സഞ്ജു വെടിക്കെട്ട് ബാറ്റിങ് പ്രകടനമാണ് കാഴ്ചവെക്കുന്നത്.

ടി20 ഫോർമാറ്റിൽ അത്രമാത്രം തിളങ്ങി നിൽക്കുന്ന സഞ്ജുവിനായി 2025 മിനി താരലേലത്തിൽ ഫ്രാൻഞ്ചൈസികൾ തമ്മിൽ അടികൂടിയാലും അതിൽ അത്ഭുതപ്പെടാനില്ല. എന്നാൽ സഞ്ജുവിനെ വിടാൻ റോയൽസ് ഒരുക്കമാകുമോ എന്നൊരു ചോദ്യം ബാക്കി നിൽക്കുന്നുണ്ട്. പരിക്കിനെത്തുടർന്ന് ഐപിഎൽ 2025 സീസണിൽ സഞ്ജുവിന് വളരെ കുറച്ച് മത്സരങ്ങളിൽ മാത്രമാണ് കളിക്കാൻ സാധിച്ചത്. ചില മത്സരങ്ങളിൽ ക്യാപ്റ്റൻ സ്ഥാനം നിർവഹിച്ചത് റയാൻ പരാഗയിരുന്നു. പക്ഷെ ആ സീസണിൽ റോയൽസ് ദയനീയ പ്രകടനം കാഴ്ചവെച്ചു.

ഈ കാരണം കൊണ്ടുതന്നെ സഞ്ജുവിനെ റോയൽസിൽ നിന്ന് ഒഴിവാക്കിയാൽ അത് ടീമിനെ മോശമായി ബാധിക്കും എന്ന വിലയിരുത്തൽ രാജസ്ഥാൻ റോയൽസിനുള്ളിൽ തന്നെ ഉണ്ട്. അതുകൊണ്ടുതന്നെ താരത്തെ വിട്ടുകളയാനുള്ള സാധ്യത കുറവാണ്. സഞ്ജുവിനായി വിട്ടുവീഴ്ചകൾ ചെയ്യാൻ പോലും റോയൽസ് തയ്യാറാക്കാനും സാധ്യതകൾ കൂടുതലാണ്.