IPL 2026: വെെഭവ് ഷോ, 15 പന്തിൽ ഫിഫ്റ്റി; സിഎസ്കെയെ അടിച്ചൊതുക്കി 15കാരൻ, ഇന്ത്യൻ‌ സെലക്ടർമാർ കാണുന്നുണ്ടോ?

ഇന്ത്യൻ പ്രീമിയർ ലീഗിന്റെ 16ാം സീസണിലേക്കുള്ള വരവ് രാജകീയമായി അറിയിച്ചിരിക്കുകയാണ് വെെഭവ് സൂര്യവംശി . അവസാന സീസണിലെ ബാറ്റിങ് വെടിക്കെട്ട് വൺ സീസൺ വണ്ടറല്ലെന്ന് തെളിയിക്കാൻ വെെഭവിന് സാധിച്ചിരിക്കുകയാണ്. സിഎസ്കെ മുന്നോട്ടുവെച്ച 128 റൺസ് വിജയലക്ഷ്യം പിന്തുടർന്ന രാജസ്ഥാൻ റോയൽസിനായി 15 പന്തിൽ അർധ സെഞ്ചുറി നേടിയാണ് വെെഭവ് ഞെട്ടിച്ചിരിക്കുന്നത്. നാല് ഫോറും 5 സിക്സും ഉൾപ്പെടെ 17 പന്തിൽ 52 റൺസെടുത്താണ് വെെഭവ് പുറത്തായത്. 305.88 പ്രഹര ശേഷിയിലാണ് വെെഭവ് കത്തിക്കയറിയത്. അൻഷുൽ കാംബോജിന്റെ പന്തിൽ സർഫറാസ് ഖാന്റെ കിടിലൻ ക്യാച്ചിലാണ് വെെഭവ് മടങ്ങിയത്. ഒന്നാം വിക്കറ്റിൽ 77 റൺസിന്റെ കൂട്ടുകെട്ട് സൃഷ്ടിച്ചാണ് വെെഭവ് പുറത്തായത്. ഇന്ത്യയുടെ സീനിയർ ടീമിനായി കളിക്കാൻ വെെഭവ് സൂര്യവംശിക്ക് പ്രായപൂർത്തിയായിരിക്കുകയാണ്.

15 വയസ് പൂർത്തിയായ വെെഭവ് സൂര്യവംശി സെലക്ടർമാരുടെ ശ്രദ്ധ നേടിയെടുക്കുന്ന പ്രകടനമാണ് ഇപ്പോൾ കാഴ്ചവെച്ചിരിക്കുന്നതെന്ന് പറയാം. ഐപിഎല്ലിലെ മൂന്നാമത്തെ വേഗ ഫിഫ്റ്റിയാണ് വെെഭവ് സ്വന്തം പേരിലാക്കിയത്. 13 പന്തിൽ ഫിഫ്റ്റി നേടിയ രാജസ്ഥാന്റെ യശ്വസി ജയ്സ്വാൾ തലപ്പത്ത് നിൽക്കുമ്പോൾ 14 പന്തിൽ ഫിഫ്റ്റി നേടിയ കെ എൽ രാഹുലും പാറ്റ് കമ്മിൻസും റൊമാരിയോ ഷെഫേർഡും രണ്ടാം സ്ഥാനത്താണുള്ളത്. യൂസുഫ് പഠാൻ, സുനിൽ നരെയ്ൻ, നിക്കോളാസ് പുരാൻ, ഫ്രാസർ മഗ്യൂർക്ക് എന്നിവരും 15 പന്തിൽ ഫിഫ്റ്റി നേടിയിട്ടുണ്ട്.

ഭയമില്ലാത്ത ബാറ്റിങ് ശെെലികൊണ്ടാണ് വെെഭവ് എതിരാളികളെ വിറപ്പിക്കുന്നത്. തുടക്കത്തിലേ വെെഭവിനെ പുറത്താക്കാൻ അവസരം ലഭിച്ചതാണ്. എന്നാൽ അരങ്ങേറ്റ താരം കാർത്തിക് ശർമക്ക് പന്ത് കെെയിലൊതുക്കാൻ സാധിക്കാതെ പോയി. എന്തായാലും ഈ ലെെഫിനെ മുതലാക്കുന്ന പ്രകടനം കാഴ്ചവെക്കാൻ വെെഭവിന് സാധിച്ചുവെന്ന് തന്നെ പറയാം.
IPL 2026: തോറ്റ് തുടങ്ങുന്ന മുംബെെയെ ഭയക്കണം, പക്ഷെ ആദ്യ മത്സരം ജയിച്ചാലോ? കപ്പ് പ്രതീക്ഷിക്കണോ, ചരിത്രം ഇങ്ങനെ
നൂർ അഹമ്മദിനെ തുടർച്ചയായി രണ്ട് സിക്സുകൾ പറത്തിയാണ് വെെഭവ് സൂര്യവംശി തന്റെ അർധ സെഞ്ചുറി പൂർത്തിയാക്കിയത്. സഞ്ജു സാംസണെ സാക്ഷിയാക്കിയാണ് വെെഭവിന്റെ തകർപ്പൻ പ്രകടനം. രാജസ്ഥാൻ റോയൽസിന്റെ ക്യാപ്റ്റൻസ്ഥാനമൊഴി‍ഞ്ഞാണ് സഞ്ജു സിഎസ്കെയിലേക്കെത്തിയത്. എന്നാൽ സിഎസ്കെയ്ക്കായുള്ള അരങ്ങേറ്റത്തിൽ‌ സഞ്ജു 7 പന്തിൽ 6 റൺസെടുത്ത് പുറത്തായി.

വെെഭവിന്റെ ഈ മികവ് തുടർന്നാൽ ഇന്ത്യൻ ടീമിലേക്ക് വെെകാതെ വിളി ലഭിച്ചേക്കും. ഇന്ത്യക്ക് അയർലൻഡിനെതിരേ ടി20 പരമ്പര വരാനിരിക്കുന്നുണ്ട്. ഇതിലൂടെ വെെഭവിന് അവസരം ലഭിക്കുമോയെന്നാണ് ആരാധകർ ഉറ്റുനോക്കുന്നത്. വെെഭവിന് അവസരം നൽകിയാൽ ഇടം കെെയൻ ബാറ്റ്സ്മാനായ അഭിഷേക് ശർമക്ക് സീറ്റ് നഷ്ടമാവും. അഭിഷേകിന് ഇപ്പോൾ പഴയ സ്ഥിരത കാട്ടാൻ സാധിക്കുന്നില്ല. അതുകൊണ്ടുതന്നെ ഇന്ത്യ വെെഭവിനെ കളിപ്പിക്കാൻ തീരുമാനിച്ചാലും അത്ഭുതപ്പെടാനാവില്ല.

IPL 2026: കെകെആറിനെ പഞ്ഞിക്കിട്ട് രോഹിത് ശർമ, സിക്സറിൽ മറ്റൊരു ഏഷ്യക്കാരനുമില്ലാത്ത നേട്ടം; ഫിഫ്റ്റിയിലും ചരിത്ര റെക്കോഡ്

എന്തായാലും വെെഭവിൽ ഇപ്പോൾ വലിയ പ്രതീക്ഷയാണുള്ളത്. ഇന്ത്യൻ ടി20 ടീമിന്റെ ഭാവി വെെഭവിന്റെ കെെകളിലാണെന്ന് പറയാം. ഇതേ മികവ് രാജസ്ഥാനൊപ്പം തുടർന്ന് ടീമിന്റെ ഇതിഹാസ താരമായി മാറാൻ വെെഭവിന് സാധിച്ചേക്കും. 15 വയസിലാണ് വെെഭവ് ഇത്രയും മികച്ച പ്രകടനം കാഴ്ചവെക്കുന്നത് എന്നതാണ് എടുത്തു പറയേണ്ട കാര്യം. വെെഭവിനെ സ്പിൻ ബൗളറെന്ന നിലയിലും ഉപയോഗിക്കാവുന്നതാണ്. എന്തായാലും വരുന്ന മത്സരങ്ങളിലും ഇതേ മികവ് വെെഭവ് ആവർത്തിക്കുമോയെന്നതാണ് കണ്ടറിയേണ്ടത്.