IPL 2026: വെെഭവ് സൂര്യവംശി മുംബെെ ഇന്ത്യൻസിലേക്കോ? മുൻ സെലക്ടറുടെ എക്സ് പോസ്റ്റിൽ‌ ഞെട്ടി ആരാധകർ; സംഭവം ഇങ്ങനെ

ഇന്ത്യൻ പ്രീമിയർ ലീഗിന്റെ 2026 സീസൺ ആവേശകരമായി പുരോഗമിക്കവെ കെെയടിക‍ൾ നേടുന്ന യുവതാരങ്ങളിലൊരാളാണ് വെെഭവ് സൂര്യവംശി . രാജസ്ഥാൻ റോയൽസ് കണ്ടെത്തിയ നിധിയാണ് വെെഭവ് സൂര്യവംശിയെന്ന് പറയാം. തുടക്കം മുതൽ തല്ലിത്തകർക്കുന്ന 15 കാരൻ ഇതിനോടകം ക്രിക്കറ്റ് ലോകത്തെ ചർച്ചാ വിഷയമാണ്. മുംബെെ ഇന്ത്യൻസിനെതിരായ വെെഭവിന്റെ പ്രകടനം എല്ലാവരുടേയും പ്രശംസ ഏറ്റുവാങ്ങുന്നതാണ്.ജസ്പ്രീത് ബുംറയെയടക്കം പഞ്ഞിക്കിട്ടാണ് വെെഭവ് കത്തിക്കയറിയത്. ഇപ്പോഴിതാ വെെഭവ് സൂര്യവംശി ഇപ്പോൾ രാജസ്ഥാൻ റോയൽസിലാണെങ്കിലും ഭാവി മുംബെെ ഇന്ത്യൻസ് താരമാണെന്ന് അഭിപ്രായപ്പെട്ട് ഞെട്ടിച്ചിരിക്കുകയാണ് മുൻ ബിസിസി ഐ സെലക്ടറായ ജതിൻ പരഞ്ജ്പെ. അദ്ദേഹം എക്സിൽ കുറിച്ച പോസ്റ്റ് ഇപ്പോൾ വെെറലായി മാറിയിരിക്കുകയാണ്. 'വെെഭവ് സൂര്യവംശി ഇന്ന് രാത്രി കളിക്കുന്നത് ഭാവി ടീമിനെതിരേയാണ് ' എന്നാണ് ജതിൻ എക്സിൽ കുറിച്ചത്. ഈ പോസ്റ്റ് വളരെയധികം ചർച്ച ചെയ്യപ്പെട്ടു.

ഇതിനുള്ള സാധ്യതകൾ തള്ളിക്കളയാൻ സാധിക്കില്ലെന്നാണ് ആരാധക പക്ഷം. വെെഭവ് സൂര്യവംശിക്ക് 15 വയസ് മാത്രമാണ് പ്രായം. അടുത്ത മെഗാ ലേലത്തിൽ വെെഭവ് പങ്കെടുക്കാൻ ആഗ്രഹിച്ചാൽ രാജസ്ഥാന് കാര്യങ്ങൾ എളുപ്പമാവില്ല. സ്ഥിരതയോടെ വെടിക്കെട്ട് നടത്തുന്ന വെെഭവിന് നിലവിൽ 1.10 കോടിയാണ് പ്രതിഫലമായി ലഭിക്കുന്നത്. എന്നാൽ ഈ തുകയ്ക്ക് രാജസ്ഥാൻ റോയൽസിൽ തുടരാൻ വെെഭവ് താൽപര്യം കാട്ടാത്ത പക്ഷം യുവതാരം കൂടുമാറാനുള്ള സാധ്യത കൂടുതലാണ്.

വെെഭവിന് ആദ്യ അവസരം നൽകിയത് രാജസ്ഥാൻ റോയൽസാണെന്നത് വസ്തുതയാണ്. എന്നാൽ മുംബെെ ഇന്ത്യൻസിനെപ്പോലൊരു വമ്പൻ ടീമിൽ നിന്ന് ഓഫർ ലഭിച്ചാൽ വെെഭവ് അത് തള്ളിക്കളയാനുള്ള സാധ്യതയുണ്ടോയെന്നതാണ് കാത്തിരുന്ന് കാണേണ്ടത്. നിലവിൽ ഋഷഭ് പന്താണ് ഐപിഎല്ലിലെ റെക്കോഡ് പ്രതിഫലത്തിന്റെ ഉടമ. 27 കോടിയാണ് ഋഷഭിന്റെ പ്രതിഫലം. എന്നാൽ വെെഭവ് സൂര്യവംശി ലേലത്തിലേക്കെത്തിയാൽ 30 കോടി പ്രതിഫലത്തിലേക്ക് എത്തുമോയെന്നതാണ് കണ്ടറിയേണ്ടത്.
IPL 2026: വെെഭവിന് എന്ത് ബുംറ, നേരിട്ട ആദ്യ പന്ത് തന്നെ സിക്സർ; യോർക്കറൊന്നും ഇവിടെ വിലപ്പോവില്ല, അപൂർവ്വ നേട്ടവുമായി 15കാരൻ
ഐപിഎല്ലിലെ പ്രായം കുറഞ്ഞ സെഞ്ചുറിക്കാരനാണ് വെെഭവ്. സ്പിന്നിനേയും പേസിനേയും ഒരുപോലെ കടന്നാക്രമിക്കാൻ കഴിവുള്ള വെെഭവിനെ സ്വന്തമാക്കാൻ എല്ലാ ടീമുകളും ആഗ്രഹിക്കുമെന്ന കാര്യം ഉറപ്പാണ്. 2027ലാണ് ഇനി മെഗാ താരലേലം വരാനുള്ളത്. രാജസ്ഥാൻ റോയൽസിന്റെ യശ്വസി ജയ്സ്വാളിനെ ഏറെ നാളുകളായി മുംബെെ ഇന്ത്യൻസ് നോട്ടമിടുന്നതാണ്. എന്നാൽ ഇതുവരെ ടീമിലേക്കെത്തിക്കാനായിട്ടില്ല.

ഇപ്പോഴത്തെ സാഹചര്യത്തിൽ ജയ്സ്വാളിനെക്കാൾ മുംബെെ പ്രാധാന്യം നൽകി വെെഭവിലാകും. മുംബെെ ഇന്ത്യൻസിന്റെ സമീപകാലത്തെ പ്രകടനങ്ങൾ നിരാശപ്പെടുത്തുന്നതാണ്. അതുകൊണ്ടുതന്നെ 2027ലെ ലേലത്തിൽ വലിയൊരു പൊളിച്ചെഴുത്തിലേക്ക് മുംബെെ കടക്കാനും സാധ്യതയുണ്ട്. വെെഭവിനെ സ്വന്തമാക്കിയാൽ ദീർഘ കാല താരമെന്ന നിലയിൽ പരിഗണിക്കാം.

IPL 2026: മുംബെെക്ക് ഇത് എന്തുപറ്റി? ഹാർദിക്കിന് കീഴിൽ മികവ് കാട്ടാനാവുന്നില്ല, ചാമ്പ്യൻ നിരയെ പിന്നോട്ടടിച്ച് ഇക്കാര്യങ്ങൾ

ആഭ്യന്തര ക്രിക്കറ്റിൽ ക്യാപ്റ്റനെന്ന നിലയിലും വെെസ് ക്യാപ്റ്റനെന്ന നിലയിലും ഇതിനോടകം കളിച്ചിട്ടുള്ള താരമാണ് വെെഭവ്. യുവതാരത്തെ ആര് ടീമിലെടുത്താലും അത് മുതൽക്കൂട്ടാവും. ലേലത്തിലേക്കെത്താതെ വെെഭവിനെ കൂടെ നിർത്താൻ രാജസ്ഥാന് സാധിക്കുമോയെന്നതാണ് കണ്ടറിയേണ്ടത്. വലിയ അവസരങ്ങൾ ലഭിക്കുമ്പോൾ വെെഭവിന്റെ തീരുമാനം എങ്ങനെയാവുമെന്നത് കാത്തിരുന്ന് കാണാം.