IPL 2026: സഞ്ജു ഓപ്പണറല്ലെങ്കിൽ ഏത് റോൾ ബെസ്റ്റ്? ധോണി നിർദേശിക്കുക ആ സ്ഥാനമോ; ​മലയാളി താരം എന്തിനും തയ്യാർ, കണക്കുകളിതാ

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാനിരിക്കുകയാണ്. ഈ മാസം 28നാണ് ഐപിഎൽ പോരാട്ടങ്ങൾ ആരംഭിക്കുക. ഇത്തവണ കപ്പ് തിരിച്ചുപിടിക്കാൻ 9 ടീമും തയ്യാറെടുക്കുമ്പോൾ കിരീടം നിലനിർത്താനുറച്ചാവും ആർസിബി ഇറങ്ങുക. ഇത്തവണ എല്ലാവരും ഉറ്റുനോക്കുന്ന ടീമുകളിലൊന്ന് ചെന്നെെ സൂപ്പർ കിങ്സാണ്. സഞ്ജു സാംസണിന്റെ വരവോടെ സിഎസ്കെയുടെ ആറാം കിരീടമാണ് ആരാധകർ പ്രതീക്ഷിക്കുന്നത്. വലിയ പ്രതീക്ഷകളോടെയാണ് സഞ്ജു സാംസൺ ഇത്തവണ സിഎസ്കെയിലേക്കെത്തുന്നത്. ആരാധകർക്കും സഞ്ജുവിന്റെ വരവ് വലിയ ആവേശം നൽകുന്ന കാര്യമാണ്. എന്നാൽ സിഎസ്കെയിലെ സഞ്ജുവിന്റെ റോൾ എന്താവുമെന്നതാണ് കാത്തിരുന്ന് കാണേണ്ടത്. ടി20 ലോകകപ്പിൽ ഓപ്പണർ റോളിൽ തകർത്തടിച്ച് റെക്കോഡിട്ട സഞ്ജുവിന് സിഎസ്കെ ഓപ്പണർ സ്ഥാനം നൽകിയേക്കില്ലെന്ന സൂചനകളാണ് പുറത്തുവരുന്നത്. അപ്പോൾ സഞ്ജു എവിടെയാവും കളിക്കുക? പരിശോധിക്കാം.

സഞ്ജുവിന്റെ റോൾ മധ്യനിരയിലേക്ക് മാറിയേക്കും

നിലവിൽ സിഎസ്കെയുടെ ഓപ്പണിങ് റോളിലുള്ളത് റുതുരാജ് ഗെയ്ക് വാദും ആയുഷ് മാത്രെയുമാണ്. ഈ കൂട്ടുകെട്ടിനെ ഇത്തവണയും സിഎസ്കെ പിന്തുണച്ചേക്കുമെന്നാണ് സൂചനകൾ. റുതുരാജ് സിഎസ്കെയുടെ ക്യാപ്റ്റനാണ്. സിഎസ്കെയ്ക്കായി ഓപ്പണർ റോളിൽ ഏറ്റവും കൂടുതൽ മികവ് കാട്ടിയിട്ടുള്ള റുതുരാജിനെ ഇത്തവണയും ഇതേ റോളിൽ പിന്തുണച്ചേക്കും.

മൂന്നാം നമ്പറിൽ ഉർവിൽ പട്ടേലിനെ കളിപ്പിക്കാൻ സിഎസ്കെ നീക്കം നടത്തുന്നുണ്ടെന്നാണ് സൂചന. വമ്പനടിക്കാരനായ ഉർവിൽ സയ്യിദ് മുഷ്താഖ് അലി ട്രോഫിയിൽ 28 പന്തിൽ സെഞ്ചുറി നേടിയവനാണ്. ഉർവിൽ പട്ടേലിനെ മൂന്നാം നമ്പറിൽ കളിപ്പിക്കുമ്പോൾ സഞ്ജു സാംസണെ നാലാം നമ്പറിൽ മധ്യനിരയിലേക്കിറക്കാനുള്ള സാധ്യതയാണുള്ളത്. ഇത്തരമൊരു മാറ്റത്തിന് സിഎസ്കെ തയ്യാറെടുത്താലും അത്ഭുതപ്പെടാനാവില്ല.
IPL 2026: ഇന്ത്യൻ ടീമിലെ സുഹൃത്തുക്കൾ, പക്ഷെ ഐപിഎല്ലിൽ തമ്മിലടിച്ചു! സഞ്ജുവിനോടും കൊമ്പുകോർത്തു, ഇത്തവണ ആവർത്തിക്കുമോ?

സഞ്ജു ഏഴാം നമ്പറിൽവരെ ബാറ്റ് ചെയ്തിട്ടുള്ള താരം

സിഎസ്കെയിൽ ബാറ്റിങ് പൊസിഷനിൽ ഉറപ്പ് പറയാൻ സാധിക്കില്ല. പരീക്ഷണം നടത്താൻ മടിയില്ലാത്ത ടീമാണ് സിഎസ്കെ. എന്നാൽ ഒന്നോ രണ്ടോ മോശം പ്രകടനംകൊണ്ട് ഒരു താരത്തിനും പ്ലേയിങ് 11ലെ സീറ്റ് നഷ്ടപ്പെടില്ല. ഇത്തരമൊരു പിന്തുണ സിഎസ്കെ എല്ലാ താരങ്ങൾക്കും നൽകാറുണ്ട്. അതുകൊണ്ടുതന്നെ സഞ്ജുവിന് ഭയക്കാതെ തന്റെ പ്രകടനം പുറത്തെടുക്കാൻ സാധിക്കും.

സഞ്ജു ഇപ്പോൾ അനുഭവസമ്പന്നനായ താരമാണ്. സിഎസ്കെയുടെ മധ്യനിരയിൽ റോൾ ലഭിച്ചാൽ സഞ്ജുവിന് അത് മുതലാക്കാൻ സാധിക്കുമെന്ന് തന്നെ കരുതാം. എന്തായാലും സിഎസ്കെ എങ്ങനെയാവും സഞ്ജുവിനെ ഉപയോഗിക്കുകയെന്നതാണ് കാത്തിരുന്ന് കാണേണ്ടത്. എംഎസ് ധോണി കൃത്യമായ പദ്ധതികളോടെയാവും ഇത്തവണ സഞ്ജുവിനെ ടീമിലേക്കെത്തിച്ചതെന്ന് നിസംശയം പറയാം.

രോഹിത്തും കോഹ്ലിയും ഏകദിന ലോകകപ്പിനുണ്ടാവില്ലേ? സീറ്റുറപ്പിക്കാതെ ബിസിസിഐ, ഐപിഎല്ലിന് ശേഷം നിർണ്ണായക തീരുമാനം

സഞ്ജുവിന്റെ ഐപിഎല്ലിലെ റെക്കോഡുകൾ ഗംഭീരം

ഐപിഎല്ലിൽ കിടിലൻ റെക്കോഡുകൾ അവകാശപ്പെടാൻ സാധിക്കുന്ന താരമാണ് സഞ്ജു സാംസൺ. 176 മത്സരങ്ങളിൽ നിന്ന് 4704 റൺസാണ് അദ്ദേഹം നേടിയത്. 30.75 എന്ന മികച്ച ശരാശരിയും 139.05 എന്ന പ്രഹര ശേഷിയും സഞ്ജുവിനുണ്ട്. എന്നാൽ ഒരു സീസണിൽ സഞ്ജു 500ലധികം റൺസ് നേടിയത് 2024 സീസണിൽ മാത്രമാണ്. ഇത്തവണ കരിയറിലെ ഏറ്റവും മികച്ച പ്രകടനത്തോടെ തിളങ്ങാൻ സഞ്ജു സാംസണ് സാധിക്കുമോയെന്നത് കാത്തിരുന്ന് കാണാം.