IPL 2026: സിഎസ്കെ ഒഴിവാക്കിയ താരങ്ങൾ, ഇന്ന് തകർപ്പൻ പ്രകടനത്തോടെ കസറുന്നു; തരം​ഗമായി സമീർ റിസ്വിയും തുഷാർ ദേശ്പാണ്ഡെയും

ഇന്ത്യൻ പ്രീമിയർ ലീഗിന്റെ 2026 സീസൺ ആവേശകരമായി മുന്നോട്ട് പോവുകയാണ്. ഇഞ്ചോടിഞ്ച് പോരാട്ടങ്ങളാണ് സീസണിൽ കാണാൻ സാധിക്കുന്നത്. ആർക്കും വ്യക്തമായ മുൻതൂക്കം അവകാശപ്പെടാൻ സാധിക്കാത്ത അവസ്ഥയാണ് ഇപ്പോഴുള്ളത്. രണ്ടാം റൗണ്ട് മത്സരങ്ങൾ പുരോഗമിക്കവെ ചില യുവ താരങ്ങളുടെ പ്രകടനമാണ് വളരെയധികം ശ്രദ്ധിക്കപ്പെടുന്നത്. ഇതിൽ എടുത്ത് പറയേണ്ടത് സമീർ റിസ്വി , തുഷാർ ദേശ്പാണ്ഡെ എന്നീ രണ്ട് പേരുകളാണ്. രണ്ട് പേരും നടത്തുന്ന കിടിലൻ പ്രകടനം ഇതിനോടകം കെെയടി നേടിയെടുക്കുകയാണ്. സിഎസ്കെ യുടെ മുൻ താരങ്ങളായ രണ്ട് പേരും ഇപ്പോൾ ഡൽഹി ക്യാപിറ്റൽസിനും രാജസ്ഥാൻ റോയൽസിനുമായി ഹീറോകളാവുമ്പോൾ തുടർച്ചയായ രണ്ടാം തോൽവിയോടെ സിഎസ്കെ താഴോട്ട് പോയിരിക്കുകയാണെന്ന് പറയാം.

സമീർ റിസ്വിയാണ് ആദ്യ രണ്ട് മത്സരത്തിലും കെെയടി നേടി നിലവിൽ റൺവേട്ടക്കാരിൽ തലപ്പത്ത് നിൽക്കുന്നത്. അവസാനം കളിച്ച മൂന്ന് ഐപിഎൽ മത്സരത്തിലും അർധ സെഞ്ചുറി നേടിയ റിസ്വി ഈ സീസണിലെ ഡൽഹിയുടെ രണ്ട് മത്സരത്തിലും കളിയിലെ താരമായി മാറിയിരിക്കുകയാണ്. ചെന്നെെ സൂപ്പർ കിങ്സ് 8.4 കോടിക്ക് ടീമിലെത്തിച്ച താരമാണ് റിസ്വി. എന്നാൽ താരസമ്പന്നമായ സിഎസ്കെ റിസ്വിയിൽ വലിയ വിശ്വാസം അർപ്പിക്കാതെ കെെയൊഴിഞ്ഞു.

മിനി താരലേലത്തിൽ 95 ലക്ഷത്തിനാണ് റിസ്വി ഡൽഹിയിലേക്കെത്തിയത്. ലഖ്നൗവിനെതിരേ 47 പന്തിൽ 70 റൺസാണ് സമീർ റിസ്വി ലഖ്നൗവിനെതിരേ നേടിയത്. ഓപ്പണർമാർ പെട്ടെന്ന് മടങ്ങിയപ്പോഴും റിസ്വി കിടിലൻ പ്രകടനത്തോടെ ഡൽഹിയെ വിജയത്തിലേക്കെത്തിച്ചു. ഈ കളിയിലെ താരമാകാനും റിസ്വിക്ക് സാധിച്ചുവെന്നതാണ് ശ്രദ്ധേയം.
IPL 2026: ഹീറോയായി തുഷാർ ദേശ്പാണ്ഡെ, ​ഗുജറാത്തിനെ പൂട്ടി രാജസ്ഥാൻ റോയൽസ്; അവസാന ഓവറിൽ ത്രില്ലിങ് ജയം
ഇതിന് ശേഷം മുംബെെ ഇന്ത്യൻസിനെതിരേയും റിസ്വി കസറിയിരിക്കുകയാണ്. നാലാം നമ്പറിലിറങ്ങി 51 പന്തിൽ 90 റൺസാണ് റിസ്വി നേടിയത്. 7 വീതം ഫോറും സിക്സും ഉൾപ്പെടെയാണ് റിസ്വി മാച്ച് വിന്നറായത്. ഈ കളിയിലും റിസ്വിയാണ് കളിയിലെ താരമായത്. തുടർച്ചയായ രണ്ടാം മത്സരത്തിലും റിസ്വി കസറിയത് ഡൽഹിയുടെ കിരീട പ്രതീക്ഷകളെ സജീവമാക്കുകയാണ്. സിഎസ്കെയുടെ മധ്യനിരയിൽ മികച്ച പ്രകടനം നടത്താൻ താരങ്ങൾ പ്രയാസപ്പെടുമ്പോഴാണ് സിഎസ്കെ കെെവിട്ട റിസ്വി ഡൽഹിക്കായി ശോഭിക്കുന്നത്.

തുഷാർ ദേശ്പാണ്ഡെ ഗുജറാത്ത് ടെെറ്റൻസിനെതിരേ രാജസ്ഥാൻ റോയൽസിന്റെ മാച്ച് വിന്നറായി മാറിയിരിക്കുകയാണ്. 2022ൽ 20 ലക്ഷത്തിന് സിഎസ്കെ ടീമിലെത്തിച്ച ദെശപാണ്ഡെ 2023ൽ 21 വിക്കറ്റുകളോടെ കസറി. എന്നിട്ടും ദേശ്പാണ്ഡെയെ നിലനിർത്താൻ സിഎസ്കെ തയ്യാറായില്ല. രാജസ്ഥാൻ റോയൽസ് 6.5 കോടിക്കാണ് ദേശ്പാണ്ഡെയെ ടീമിലേക്ക് കൊണ്ടുവന്നത്. അവസാന സീസണിൽ ദേശ്പാണ്ഡെ വലിയ മികവ് കാട്ടിയില്ല.

IPL 2026: ഫിലിപ്സ് പറഞ്ഞിട്ടും വിശ്വസിച്ചില്ല, ഹെറ്റ്മെയറുടെ റിവ്യു എടുക്കാതെ റാഷിദ്; ഡക്കിന് പുറത്താക്കാനുള്ള അവസരം നഷ്ടപ്പെടുത്തി

എന്നാൽ ഗുജറാത്തിനെതിരേ അവസാന ഓവറിൽ 11 റൺസ് പ്രതിരോധിച്ചാണ് ദേശ്പാണ്ഡെ കെെയടി നേടുന്നത്. അവസാന ഓവറിൽ വെറും 4 റൺസ് മാത്രം വിട്ടുകൊടുത്ത് ആറ് റൺസിന്റെ ജയം രാജസ്ഥാന് നേടിക്കൊടുക്കാൻ ദേശ്പാണ്ഡെക്ക് സാധിച്ചു. സിഎസ്കെ വിട്ടു കളഞ്ഞ രണ്ട് താരങ്ങളും ഇപ്പോൾ കെെയടി നേടുകയാണ്. എന്നാൽ സീസണിലുടെനീളം ഈ മികവ് നിലനിർത്താൻ ഇവർക്ക് സാധിക്കുമോയെന്നതാണ് കാത്തിരുന്ന് കാണേണ്ടത്.