IPL 2026: സിഎസ്കെയിലെത്തി, സഞ്ജുവിനെ ആ ഭാ​ഗ്യം കെെവിട്ടു; ആറ് വർഷത്തിന് ശേഷം എലെെറ്റ് ക്ലബ്ബിൽ നിന്ന് പുറത്ത്, ടീമും തകർന്നടിഞ്ഞു

ഇന്ത്യൻ പ്രീമിയർ ലീഗിന്റെ 2026 സീസണിൽ ചെന്നെെ സൂപ്പർ കിങ്സിനൊപ്പമുള്ള അരങ്ങേറ്റത്തിൽ നിരാശപ്പെടുത്തി സഞ്ജു സാംസൺ . രാജസ്ഥാൻ റോയൽസ് നായകസ്ഥാനമൊഴിഞ്ഞ് സിഎസ്കെയിലെത്തിയ സഞ്ജുവിന് രാജസ്ഥാനെതിരേ ആദ്യ മത്സരം തന്നെ കളിക്കേണ്ടി വന്നു എന്നതാണ് കൗതുകം. വലിയ പ്രകടനം സഞ്ജുവിൽ നിന്ന് എല്ലാവരും പ്രതീക്ഷിച്ചെങ്കിലും ഏഴ് പന്തിൽ ആറ് റൺസാണ് സഞ്ജുവിന് നേടാനായത്.നാന്ദ്രെ ബർഗർ സഞ്ജുവിനെ ക്ലീൻബൗൾഡാക്കുകയായിരുന്നു. സിഎസ്കെയിലേക്കുള്ള സഞ്ജുവിന്റെ വരവോടെ നിർഭാഗ്യം താരത്തെ ബാധിച്ചോ എന്നാണ് ആരാധകർ ആശങ്കപ്പെടുന്നത്. കാരണം സിഎസ്കെയ്ക്കെതിരായ ആദ്യ മത്സരത്തിലൂടെ എലെെറ്റ് ക്ലബ്ബിൽ നിന്ന് സഞ്ജു പുറത്തായിരിക്കുകയാണ്. 2020 മുതൽ 2025 വരെയുള്ള ആറ് സീസണുകളിലെ ആദ്യ മത്സരത്തിൽ സഞ്ജു 50ലധികം റൺസ് നേടിയിരുന്നു. ഒരു തവണ സെഞ്ചുറിയും നേടി.

ഈ സൂപ്പർ ക്ലബ്ബിൽ സഞ്ജു രാജാവായി വാണിരുന്നെങ്കിലും സിഎസ്കെയിലേക്കെത്തിയതോടെ ഈ റെക്കോഡ് കെെവിട്ടിരിക്കുകയാണ്. ഇത്തവണ ആദ്യ മത്സരത്തിൽ ഒറ്റ സംഖ്യയിൽ സ‍ഞ്ജു പുറത്തായി എന്നതാണ് എടുത്തു പറയേണ്ട കാര്യം. സഞ്ജുവിന്റെ വരവ് സിഎസ്കെയുടെ പവർപ്ലേയിലെ പ്രശ്നങ്ങൾ മാറ്റുമെന്ന് എല്ലാവരും വിശ്വസിച്ചെങ്കിലും ആദ്യ മത്സരത്തിലെ പ്രകടനം പ്രതീക്ഷക്കൊത്തായില്ല.

സഞ്ജുവിന്റെ അരങ്ങേറ്റ മത്സരത്തിലൂടെ ചില നാണക്കേടിലേക്കും സിഎസ്കെയ്ക്ക് പേര് ചേർക്കേണ്ടി വന്നു. സഞ്ജു സാംസണും ക്യാപ്റ്റൻ റുതുരാജ് ഗെയ്ക് വാദും ക്ലീൻബൗൾഡായാണ് മടങ്ങിയത്. 11 പന്തിൽ ആറ് റൺസെടുത്ത റുതുരാജിനെ ജോഫ്രാ ആർച്ചറാണ് ക്ലീൻബൗൾഡാക്കിയത്. ചരിത്രത്തിൽ ഇതാദ്യമായാണ് സിഎസ്കെയുടെ രണ്ട് ഓപ്പണർമാരും ക്ലീൻബൗൾഡായി പുറത്താവുന്നത്. സഞ്ജുവിന്റെ ക്ലീൻബൗൾഡ് മികച്ച ബൗളിലായിരുന്നെങ്കിൽ അനാവശ്യ ഷോട്ട് കളിച്ചാണ് റുതുരാജ് വിക്കറ്റ് നഷ്ടപ്പെടുത്തിയത്.
IPL 2026: തോറ്റ് തുടങ്ങുന്ന മുംബെെയെ ഭയക്കണം, പക്ഷെ ആദ്യ മത്സരം ജയിച്ചാലോ? കപ്പ് പ്രതീക്ഷിക്കണോ, ചരിത്രം ഇങ്ങനെ
സിഎസ്കെയുടെ ടോപ് 4 ചേർന്ന് ഒരു ഐപിഎൽ മത്സരത്തിലെടുക്കുന്ന കുറഞ്ഞ മൂന്നാമത്തെ സ്കോർ എന്ന നാണക്കേടിലേക്കും ടീമിന് എത്തേണ്ടി വന്നു. 14 റൺസാണ് സിഎസ്കെയുടെ ടോപ് ഫോറിന് നേടാനായത്. സഞ്ജു സാംസൺ 6, റുതുരാജ് 6, ആയുഷ് മാത്രെ 0, മാത്യു ഷോർട്ട് 2 എന്നിങ്ങനെ സ്കോർ നേടിയാണ് പുറത്തായത്. 2020ൽ മുംബെെ ഇന്ത്യൻസിനെതിരേ സിഎസ്കെയുടെ ടോപ് 4 മൂന്ന് റൺ‌സ് മാത്രമെടുത്ത് പുറത്തായിട്ടുണ്ട്.

2022ൽ മുംബെെക്കെതിരേ എട്ട് റൺസിനും സിഎസ്കെയുടെ ടോപ് 4 പുറത്തായിട്ടുണ്ട്. 2011ൽ ആർസിബിക്കെതിരേയും 14 റൺസിന് ടീമിന്റെ ടോപ് 4 തകർന്നിട്ടുണ്ട്. ഇത്തവണ സഞ്ജു സാംസണിന്റെ ബാറ്റിങ്ങിനെ അമിതമായി വിശ്വസിക്കുന്ന സിഎസ്കെയെയാണ് കാണാനായത്. സഞ്ജുവിൽ അമിത പ്രതീക്ഷവെച്ചത് തിരിച്ചടിയായെന്ന് പറയാം.

IPL 2026: കെകെആറിനെ പഞ്ഞിക്കിട്ട് രോഹിത് ശർമ, സിക്സറിൽ മറ്റൊരു ഏഷ്യക്കാരനുമില്ലാത്ത നേട്ടം; ഫിഫ്റ്റിയിലും ചരിത്ര റെക്കോഡ്

രാജസ്ഥാൻ തന്റെ മുൻ ടീമാണെന്ന വെെകാരികത സഞ്ജുവിനെ ബാധിച്ചുവെന്ന് ഉറപ്പാണ്. സഞ്ജുവിനെ വലിയ സന്തോഷത്തോടെയല്ല ബാറ്റിങ്ങിന്റെ സമയത്ത് കാണപ്പെട്ടത്. സമ്മർദ്ദം സഞ്ജുവിന്റെ മുഖത്ത് വ്യക്തമായിരുന്നു. എന്നാൽ ഇതിലും വലിയ വെല്ലുവിളികളെ മറികടന്ന താരമാണ് സഞ്ജു. അതുകൊണ്ടുതന്നെ തകർപ്പൻ തിരിച്ചുവരവ് നടത്തി എല്ലാവരുടേയും കെെയടി നേടാൻ മലയാളി താരത്തിന് സാധിക്കുമെന്ന് തന്നെ പ്രതീക്ഷിക്കാം.