IPL 2026: സിഎസ്കെയ്ക്ക് വീണ്ടും പരിക്കിന്റെ പണി, ഖലീൽ അഹമ്മദ് പുറത്ത്, പകരക്കാരനായി ആര്? രണ്ട് മലയാളികൾ പരി​ഗണനയിൽ?

ഇന്ത്യൻ പ്രീമിയർ ലീഗിന്റെ 19ാം സീസൺ ആവേശകരമായി മുന്നോട്ട് പോകവെ ചെന്നെെ സൂപ്പർ കിങ്സിന് വീണ്ടും പരിക്കിന്റെ പണി. ഇത്തവണ സൂപ്പർ പേസറായ ഖലീൽ അഹമ്മദാണ് പരിക്കേറ്റ് പുറത്തായിരിക്കുന്നത്. കൊൽക്കത്ത നെെറ്റ് റെെഡേഴ്സിനെതിരായ മത്സരത്തിന്റെ 17ാം ഓവറിലാണ് ഖലീലിന് പരിക്കേറ്റത്. താരത്തിന്റെ കാൽ മസിലിന് ഗുരുതരമായി പരിക്കേറ്റുവെന്നാണ് സിഎസ്കെ ഔദ്യോഗിക വാർത്താ കുറിപ്പിലൂടെ അറിയിച്ചിരിക്കുന്നത്.സിഎസ്കെയുടെ ബൗളിങ് നിര ഇത്തവണ ദുർബലമാണ്. ഇപ്പോൾ പതിയെ താളം കണ്ടെത്തി വരുന്നതിനിടെയാണ് ഖലീൽ അഹമ്മദ് പരിക്കേറ്റ് പുറത്താവുന്നത്. പവർപ്ലേയിലെ ഖലീൽ അഹമ്മദിന്റെ പ്രകടനം സിഎസ്കെയെ സംബന്ധിച്ച് വളരെ പ്രധാനപ്പെട്ടതായിരുന്നു. അതുകൊണ്ടുതന്നെ ഖലീലിന്റെ അഭാവം സിഎസ്കെയെ കാര്യമായി ബാധിക്കുമെന്ന് തന്നെ പറയാം.

ഖലീലിന് പൂർണ്ണ ഫിറ്റ്നസിലേക്കെത്താൻ 10-12 ആഴ്ചത്തെ വിശ്രമമെങ്കിലും വേണ്ടിവരുമെന്നാണ് വിവരം. ഖലീലിന് അഞ്ച് മത്സരത്തിൽ നിന്ന് രണ്ട് വിക്കറ്റുകളാണ് വീഴ്ത്താനായത്. ഖലീലിന്റെ അഭാവത്തിൽ മുകേഷ് ചൗധരിയെ പ്ലേയിങ് 11ലേക്ക് കൊണ്ടുവരാനാവും സിഎസ്കെ തയ്യാറാവുക. എന്നാൽ ഖലീലിന് പകരക്കാരനെ സിഎസ്കെയ്ക്ക് കണ്ടെത്തേണ്ടതായുണ്ട്.

സിഎസ്കെ ആഭ്യന്തര ക്രിക്കറ്റിൽ മികവ് കാട്ടുന്ന പല യുവതാരങ്ങളേയും നോട്ടമിടാൻ സാധ്യതയുണ്ട്. മലയാളി താരം കെ എം ആസിഫിനെ സിഎസ്കെ വീണ്ടും പരിഗണിക്കുമോയെന്നതാണ് ആരാധകർ ഉറ്റുനോക്കുന്നത്. നേരത്തെ സിഎസ്കെയ്ക്കായി കളിച്ചിട്ടുള്ള താരമാണ് ആസിഫ്. ആഭ്യന്തര ടി20 ക്രിക്കറ്റിൽ കേരളത്തിനായി ശോഭിക്കാൻ ആസിഫിന് സാധിച്ചിട്ടുണ്ട്.
ISL 2026: പടിക്കൽ കലമുടച്ച് കേരള ബ്ലാസ്റ്റേഴ്സ്, നോർത്ത് ഈസ്റ്റ് യുണെെറ്റഡിനോട് സമനിലക്കുരുക്ക്; കൊച്ചിയിൽ അവസാന നിമിഷം കാലിടറി
മറ്റൊരു മലയാളി പേസറായ ഏദൻ ആപ്പിൾ ടോമും പ്രതീക്ഷയിലാണ്. സിഎസ്കെ യുവ പേസറെ പരിഗണിക്കുമോയെന്നതാണ് കാത്തിരുന്ന് കണ്ടറിയേണ്ടത്. മറ്റ് ചില താരങ്ങളേയും സിഎസ്കെയുടെ പരിഗണനാ പട്ടികയിലുണ്ടെന്നാണ് സ്ഥിരീകരിക്കാത്ത സൂചനകൾ വരുന്നത്. ഇടം കെെയൻ പേസർ ചേതൻ സക്കറിയയെ സിഎസ്കെയ്ക്ക് പരിഗണിക്കാൻ സാധിക്കുന്നതാണ്. 75 ലക്ഷമാണ് താരത്തിന്റെ അടിസ്ഥാന വില.

മുൻ സിഎസ്കെ പേസറായിരുന്ന സിമൻജീത് സിങ്ങിനേയും പരിഗണിക്കാം. അൺസോൾഡായ ആകാശ് മധ് വാൾ നിലവിൽ മുംബെെയുടെ നെറ്റ് ബൗളറാണ്. സിഎസ്കെയ്ക്ക് കരാർ നൽകി ആകാശിനെ കൊണ്ടുവരാൻ സാധിക്കുന്നതാണ്.ദീപേഷ് ദേവേന്ദ്ര, മോണി ജെറിവാൾ, രാജ് വർദ്ധൻ ഹംഗർഗേക്കർ, ഉദവ് മോഹൻ, മോഹിത് റാത്തി, ഇർഫാൻ ഉമ്മർ, സണ്ണി സിങ്, ആയുഷ് വർതക് എന്നിവരെയെല്ലാം സിഎസ്കെയ്ക്ക് പരിഗണിക്കാവുന്ന പേസർമാരാണ്.

IPL 2026: കരുത്തുകാട്ടി ബൗളർമാർ, മികവ് കാട്ടി വിരാട് കോഹ്ലി; ലഖ്നൗവിനെ അനായാസം തകർത്ത് ആർസിബി മുന്നോട്ട്

സിഎസ്കെയെ സംബന്ധിച്ച് വലിയ വെല്ലുവിളിയാണ് ഇനിയുള്ള മത്സരങ്ങളിൽ കാത്തിരിക്കുന്നത്. ആദ്യത്തെ മൂന്ന് മത്സരവും തോറ്റ സിഎസ്കെ അവസാന രണ്ട് മത്സരത്തിലും വിജയം നേടി ശക്തമായ തിരിച്ചുവരവാണ് നടത്തിയത്. എന്നാൽ ഖലീലിന്റെ പരിക്ക് സിഎസ്കെയെ എങ്ങനെ പ്രതികൂലമായി ബാധിക്കുമെന്നതാണ് കാത്തിരുന്ന് കാണേണ്ടത്. സിഎസ്കെയുടെ അടുത്ത എതിരാളി സൺറെെസേഴ്സ് ഹെെദരാബാദാണ്.

ഇതിന് ശേഷം ചിരവെെരികളായ മുംബെെ ഇന്ത്യൻസിനെതിരായ മത്സരവും സിഎസ്കെയെ കാത്തിരിക്കുകയാണ്. ഈ സാഹചര്യത്തിൽ പുതിയ ബൗളറെ ടീമിലേക്ക് കൊണ്ടുവന്ന് എത്രയും വേഗം ടീം കരുത്ത് ശക്തിപ്പെടുത്താനാവും സിഎസ്കെ ശ്രമിക്കുകയെന്നുറപ്പ്.