MS Dhoni: ധോണി പൂർണ്ണ ഫിറ്റ്നസിലേക്കെത്തി, പക്ഷെ ​ഗുജറാത്തിനെതിരേ കളിക്കില്ല? പറയുന്നത് ഈ വിചിത്ര കാരണം

ഇന്ത്യൻ പ്രീമിയർ ലീഗിന്റെ 2026 സീസണിൽ ആരാധകർ വളരെ പ്രതീക്ഷയോടെ കാത്തിരിക്കുന്നത് എംഎസ് ധോണിയുടെ തിരിച്ചുവരവിനായാണ്. ചെന്നെെ സൂപ്പർ കിങ്സിന്റെ ഇതിഹാസ നായകനും മുൻ ക്യാപ്റ്റനുമായ ധോണി ഈ സീസണോടെ കളിച്ച് വിരമിക്കുമെന്നായിരുന്നു റിപ്പോർട്ട് ഉണ്ടായിരുന്നത്. എന്നാൽ പരിക്ക് വില്ലനായതോടെ ധോണിക്ക് ഇതുവരെ കളത്തിലിറങ്ങാൻ സാധിച്ചില്ല.കഴിഞ്ഞ പല മത്സരത്തിന് മുമ്പും പരിശീലനം നടത്തുന്ന ധോണിയുടെ വീഡിയോയും ചിത്രങ്ങളും പുറത്ത് വന്നിരുന്നു. എന്നാൽ ധോണി കളിച്ചിരുന്നില്ല. ഈ സീസണിൽ ധോണി ഇനി കളിക്കുമോ ഇല്ലെയോ എന്നത് സംബന്ധിച്ച് പല അഭ്യൂഹങ്ങളും നിലനിൽക്കുകയാണ്. ധോണി കളിക്കുന്നതുമായി ബന്ധപ്പെട്ടുള്ള വ്യക്തമായ ഒരു വിവരവും സിഎസ്കെ ടീമും നൽകുന്നില്ല.

എന്നാൽ ഇപ്പോൾ സിഎസ്കെ ആരാധകർക്ക് നിരാശയുണ്ടാക്കുന്ന റിപ്പോർട്ടാണ് പുറത്തുവരുന്നത്. ധോണി പൂർണ്ണ ഫിറ്റ്നസിലേക്ക് എത്തിയെങ്കിലും വരുന്ന മത്സരത്തിലും അദ്ദേഹം കളിക്കില്ലെന്നാണ് ഇപ്പോൾ പുറത്തുവരുന്ന വിവരം. ഇന്ന് ഗുജറാത്ത് ടെെറ്റൻസിനെതിരേയാണ് സിഎസ്കെയുടെ മത്സരം. തട്ടകത്തിൽ നടക്കുന്ന മത്സരത്തിൽ ധോണി ഉണ്ടാകില്ലെന്നും ഇതിന്റെ കാരണം ഫിറ്റ്നസ് പ്രശ്നമല്ലെന്നുമാണ് റിപ്പോർ‌ട്ട്.

ധോണിക്ക് ഇപ്പോൾ പൂർണ്ണ ഫിറ്റ്നസുണ്ടെങ്കിലും നിലവിലെ വിജയ കൂട്ടുകെട്ട് പൊളിക്കേണ്ടന്ന കാരണത്താലാണ് ധോണി കളിക്കാത്തത് എന്നാണ് ദി ഇന്ത്യൻ എക്സ്പ്രസ് റിപ്പോർട്ട് ചെയ്തിരിക്കുന്നത്. മുംബെെ ഇന്ത്യൻസിനെതിരേ 103 റൺസിന്റെ തകർപ്പൻ ജയം നേടിയാണ് ചെന്നെെ സൂപ്പർ കിങ്സ് മുന്നോട്ട് പോകുന്നത്. ഈ കൂട്ടുകെട്ടിനെ തകർത്ത് ഇപ്പോൾ കളിക്കാൻ താൽപര്യമില്ലെന്ന് ധോണി അറിയിച്ചുവെന്നാണ് വിവരം.
IPL 2026: അടിയുടെ പൊടിപൂരം, 36 പന്തിൽ സെഞ്ചുറി നേടി വെെഭവ് സൂര്യവംശി; മറ്റാർക്കുമില്ലാത്ത ലോക റെക്കോഡിട്ട് യുവതാരം
സിഎസ്കെയ്ക്ക് ഇന്നത്തെ മത്സരം വളരെ പ്രധാനപ്പെട്ടതാണ്. സ്വന്തം തട്ടകത്തിൽ ഗുജറാത്തിനെ തോൽപ്പിക്കാൻ സിഎസ്കെയ്ക്ക് സാധിക്കേണ്ടതായുണ്ട്. ഏഴ് മത്സരത്തിൽ നിന്ന് മൂന്ന് ജയവും നാല് തോൽവിയുമാണ് സിഎസ്കെയുടെ അക്കൗണ്ടിലുള്ളത്. അഞ്ചാം സ്ഥാനത്തുള്ള സിഎസ്കെയ്ക്ക് പ്ലേ ഓഫ് നിലനിർത്താൻ ഇനിയുള്ള മത്സരങ്ങളിലെല്ലാം ജയം അനിവാര്യമാണ്.

സഞ്ജു സാംസണിന്റെ ഫോമിലേക്കാണ് സിഎസ്കെ ഉറ്റുനോക്കുന്നത്. സിഎസ്കെ ജയിച്ച മൂന്ന് മത്സരത്തിൽ രണ്ട് സെഞ്ചുറി ഉൾപ്പെടെ നേടി തിളങ്ങാൻ സഞ്ജുവിന് സാധിച്ചു. സഞ്ജു ഫ്ളോപ്പായ ഒറ്റ മത്സരത്തിൽ പോലും സിഎസ്കെ ജയിച്ചിട്ടില്ല. അതുകൊണ്ടുതന്നെ ഇന്നത്തെ മത്സരത്തിലും സഞ്ജുവിന്റെ ഫോമാണ് സിഎസ്കെയ്ക്ക് നിർണ്ണായകം. സഞ്ജു മികവ് കാട്ടുമെന്ന് തന്നെയാണ് ആരാധകർ പ്രതീക്ഷിക്കുന്നത്.

IPL 2026: അന്ന് ഗോൾഡൻ ഡക്കാക്കി, ഇന്ന് ഒരോവറിൽ നാല് സിക്സർ; ഇത് വെെഭവിന്റെ പ്രതികാരം, തല്ലുവാങ്ങി പ്രഫുൽ ഹിൻഗെ

എന്നാൽ ക്യാപ്റ്റൻ റുതുരാജ് ഗെയ്ക് വാദിന് ഫോമിലേക്കെത്താൻ സാധിക്കാത്തത് സിഎസ്കെയെ കാര്യമായി ബാധിക്കുന്നുണ്ട്. റുതുരാജുകൂടി ഫോമിലേക്കെത്തിയാൽ സിഎസ്കെയ്ക്കത് വലിയ കരുത്തായി മാറും. സിഎസ്കെയുടെ മധ്യനിരയിൽ ചില പ്രശ്നങ്ങളുണ്ട്. ധോണി കളിച്ചാലും വലിയൊരു ഇംപാക്ട് സൃഷ്ടിക്കാൻ സാധിക്കുമെന്ന് കരുതാനാവില്ല.

എന്നാൽ ഉർവിൽ പട്ടേലിനെ സിഎസ്കെ കളിപ്പിച്ചാൽ അത് ഗുണകരമായേക്കും. ഫിനിഷർ റോളിലേക്ക് വമ്പനടിക്കാരനായ താരത്തെ സിഎസ്കെയ്ക്ക് ഇപ്പോൾ അത്യാവശ്യമാണ്. സിഎസ്കെയുടെ സ്പിന്നർമാർ ഫോമിലേക്കെത്തിയത് ടീമിന്റെ ആത്മവിശ്വാസം ഉയർത്തുന്ന കാര്യമാണ്. ഗുജറാത്തിനെ തോൽപ്പിച്ച് മുന്നേറാൻ സിഎസ്കെയ്ക്ക് സാധിക്കുമോയെന്നതാണ് കാത്തിരുന്ന് കണ്ടറിയേണ്ടത്.