WTC Final: ദക്ഷിണാഫ്രിക്കൻ ടീമിനെ പ്രഖ്യാപിച്ചു, പ്രധാന പണി മുംബൈ ഇന്ത്യൻസിന്; രണ്ട് സൂപ്പർ താരങ്ങളെ നഷ്ടമായേക്കും

Curated byഗോകുൽ എസ് | Samayam Malayalam | Updated: 13 May 2025, 5:13 pm

അടുത്ത മാസം ഇംഗ്ലണ്ടിൽ നടക്കാനിരിക്കുന്ന ലോക ടെസ്റ്റ് ചാമ്പ്യൻഷിപ്പിന്റെ ഫൈനലിനുള്ള 15 അംഗ ടീമിനെ പ്രഖ്യാപിച്ച് ദക്ഷിണാഫ്രിക്ക. ഓസ്ട്രേലിയയാണ് കലാശ പോരാട്ടത്തിൽ ടെംബ ബാവുമയുടെയും സംഘത്തിന്റെയും എതിരാളികൾ‌. ജൂൺ 11 മുതൽ 15 വരെ ലോർഡ്സിലാണ് ലോക ടെസ്റ്റ് ചാമ്പ്യൻഷിപ്പിന്റെ കലാശ പോരാട്ടം നടക്കുക.അതേ സമയം ദക്ഷിണാഫ്രിക്കയുടെ ടീം ലിസ്റ്റ് പുറത്തുവന്നതോടെ ആശങ്കയിലായിരിക്കുന്നത് ഐപിഎൽ ഫ്രാഞ്ചൈസികളാണ്. നിലവിൽ ഐപിഎല്ലിൽ കളിച്ചുകൊണ്ടിരിക്കുന്ന എട്ട് താരങ്ങളാണ് ടെസ്റ്റ് ചാമ്പ്യൻഷിപ് ഫൈനലിനുള്ള 15 അംഗ ദക്ഷിണാഫ്രിക്കൻ സ്ക്വാഡിൽ ഇടം പിടിച്ചിട്ടുള്ളത്. ഫൈനലിന് മുമ്പ് മെയ് 31 ന് ഒത്തുചേരുന്ന ദക്ഷിണാഫ്രിക്കൻ ടീം ജൂൺ മൂന്ന് മുതൽ ആറ് വരെ സിംബാബ്‌വെയുമായി ഒരു പരിശീലന മത്സരവും കളിക്കുന്നുണ്ട്.

മെയ് 29 നാണ് 2025 സീസൺ ഐപിഎല്ലിലെ പ്ലേ ഓഫ് മത്സരങ്ങൾ ആരംഭിക്കുന്നത്. ജൂൺ മൂന്നാം തീയതി ഫൈനൽ നടക്കും. ഐപിഎൽ പ്ലേ ഓഫിൽ ദക്ഷിണാഫ്രിക്കൻ താരങ്ങളുടെ പങ്കാളിത്തം സംശയത്തിലാണെന്ന് വ്യക്തം.


ടെസ്റ്റ് ചാമ്പ്യൻഷിപ്പ് ഫൈനലിനുള്ള ദക്ഷിണാഫ്രിക്കൻ ടീം ലിസ്റ്റ് പുറത്തുവന്നതോടെ ഏറ്റവും വലിയ തിരിച്ചടിയേറ്റിരിക്കുന്ന ഐപിഎൽ ടീം മുംബൈ ഇന്ത്യൻസാണ്. മുംബൈയുടെ രണ്ട് താരങ്ങളാണ് ഈ ടീമിൽ ഇടം പിടിച്ചിരിക്കുന്നത്. സ്റ്റാർ വിക്കറ്റ് കീപ്പർ ബാറ്റർ റിയാൻ റിക്കിൾട്ടണും, ഓൾ റൗണ്ടർ കോർബിൻ ബോഷുമാണ് ഇത്. ഈ സീസണിൽ മുംബൈ ഇന്ത്യൻസിനായി കിടിലൻ ഫോമിൽ കളിക്കുന്ന താരമാണ് റിക്കിൾട്ടൺ.

ഐപിഎല്‍ 2025 മെയ് 17ന് പുനരാരംഭിക്കും; ഫൈനല്‍ ജൂണ്‍ മൂന്നിന്
ദേശീയ ടീമിനൊപ്പം ചേരേണ്ടതിനാൽ ഇവർക്ക് ഐപിഎല്ലിനിടെ നാട്ടിലേക്ക് മടങ്ങേണ്ടി വന്നാൽ മുംബൈയുടെ ടീം കരുത്തിനെ അത് പ്രതികൂലമായി ബാധിക്കും. പ്ലേയിങ് ഇലവനിലടക്കം വലിയ മാറ്റങ്ങൾക്ക് ടീം നിർബന്ധിതരാവുകയും ചെയ്യും. ലുങ്കി എംഗിഡി ( റോയൽ ചലഞ്ചേഴ്സ് ബംഗളൂരു ), ട്രിസ്റ്റൻ സ്റ്റബ്സ് ( ഡെൽഹി ക്യാപിറ്റൽസ് ), ഐഡൻ മാർക്രം ( ലക്നൗ സൂപ്പർ ജയന്റ്സ് ), മാർക്കോ ജാൻസൻ ( പഞ്ചാബ് കിങ്സ് ), കാഗിസോ റബാദ ( ഗുജറാത്ത് ടൈറ്റൻസ് ), വിയാൻ മൾഡർ ( സൺ റൈസേഴ്സ് ഹൈദരാബാദ് ) എന്നിവരാണ് ലോക ടെസ്റ്റ് ചാമ്പ്യൻഷിപ്പ് ഫൈനലിനുള്ള ദക്ഷിണാഫ്രിക്കൻ ടീമിലുള്ള മറ്റ് ഐപിഎൽ താരങ്ങൾ. ഇവരും പ്ലേ ഓഫ് മുതൽ ഐപിഎൽ മത്സരങ്ങൾക്ക് ലഭ്യമാകാൻ സാധ്യത കുറവാണ്.

തോൽവിക്ക് ശേഷം അക്കാര്യം തുറന്ന് സമ്മതിച്ച് മുംബൈ ഇന്ത്യൻസ് പരിശീലകൻ; ടീമിന് ഇനി എല്ലാ മത്സരങ്ങളും പ്ലേ ഓഫെന്നും വിലയിരുത്തൽ
ലോക ടെസ്റ്റ് ചാമ്പ്യൻഷിപ്പ് ഫൈനലിനുള്ള ദക്ഷിണാഫ്രിക്ക സ്ക്വാഡ്: ടെംബ ബാവുമ ( ക്യാപ്റ്റൻ ), ഡേവിഡ് ബെഡിങ്ഹാം, കോർബിൻ ബോഷ്, ടോണി ഡി സോർസി, മാർക്കോ ജാൻസൻ, കേശവ് മഹാരാജ്, ഐഡൻ മാർക്രം, വിയാൻ മൾഡർ, സേനുരാൻ മുത്തുസാമി, ലുങ്കി എംഗിഡി, ഡെയിൻ പാറ്റേഴ്സൺ, കാഗിസോ റബാദ, റിയാൻ റിക്കിൾട്ടൺ, ട്രിസ്റ്റൻ സ്റ്റബ്സ്, കൈൽ വെറെയ്ൻ.