അടുത്ത കളിക്ക് മുൻപ് സുപ്രധാന നീക്കവുമായി സഞ്ജു സാംസൺ; രാജസ്ഥാൻ റോയൽസ് ഡബിൾ സ്ട്രോങ്ങാവാൻ പോകുന്നു

Curated byഗോകുൽ എസ് | Samayam Malayalam | Updated: 31 Mar 2025, 3:05 pm

Samayam Malayalamസഞ്ജു സാംസൺ

2025 സീസൺ ഇന്ത്യൻ പ്രീമിയർ ലീഗിന്റെ ആദ്യ മൂന്ന് കളികളിലും സ്പെഷ്യലിസ്റ്റ് ബാറ്റർ മാത്രമായിട്ടാണ് രാജസ്ഥാൻ റോയൽസ് താരം സഞ്ജു സാംസൺ കളിച്ചത്‌. ഫിറ്റ്നസ് പ്രശ്നങ്ങളെ തുടർന്ന് വിക്കറ്റ് കീപ്പറാകാൻ ബിസിസിഐയുടെ അനുമതി ലഭിക്കാതെ വ‌ന്നതാണ് വെറുമൊരു ബാറ്റർ മാത്രമായി കളിക്കാൻ സഞ്ജുവിനെ നിർബന്ധിതനാക്കിയത്. സഞ്ജു പൂർണമായും ലഭ്യമാകാതെ വന്നതോടെ റിയാൻ പരാഗിനെ ആദ്യ മൂന്ന് മത്സരങ്ങൾക്കുള്ള ടീമിന്റെ നായകനായി രാജസ്ഥാൻ റോയൽസ് നിയമിക്കുകയും ചെയ്തു.2025 സീസണിൽ രാജസ്ഥാൻ റോയൽസിന്റെ ആദ്യ മൂന്ന് മത്സരങ്ങൾ കഴിഞ്ഞു. അടുത്ത കളിയിൽ സഞ്ജു‌ ടീമിന്റെ നായക സ്ഥാനത്തേക്ക് വരുമെന്നാണ് കരുതപ്പെടുന്നത്. എന്നാൽ ഇതിനായി ബിസിസിഐയുടെ ഫിറ്റ്നസ് ക്ലിയറൻസ് ലഭിക്കേണ്ടതുണ്ട്. വിക്കറ്റ് കീപ്പറാകാനുള്ള അനുമതി ബിസിസിഐയിൽ നിന്ന് ലഭിച്ചാൽ മാത്രമേ സഞ്ജു അടുത്ത കളിയിൽ രാജസ്ഥാൻ റോയൽസിന്റെ ക്യാപ്റ്റൻസിയിലേക്കും തിരിച്ചെത്തൂ.

ഇപ്പോളിതാ ഈ അനുമതിക്കായി ബിസിസിഐയുടെ സെന്റർ ഓഫ് എക്സലൻസിലേക്ക് പോയിരിക്കുകയാണ് സഞ്ജു. ഞായറാഴ്ച ഗുവാഹത്തിയിൽ ചെന്നൈ സൂപ്പർ കിങ്സിന് എതിരെ നടന്ന മത്സരത്തിന് ശേഷമാണ് ബംഗളൂരുവിലെ ബിസിസിഐ സെന്റർ ഓഫ് എക്സലൻസിലേക്ക് സഞ്ജു പോയത്. അവിടെ നിന്ന് വിക്കറ്റ് കീപ്പറാകുന്നതിനുള്ള ഫിറ്റ്നസ് ക്ലിയറൻസ് ലഭിച്ചുകഴിഞ്ഞാൽ ക്യാപ്റ്റനായും സഞ്ജു തിരിച്ചെത്തും.

Also Read: രാജസ്ഥാൻ റോയൽസിന്റെ ആ സർപ്രൈസ് നീക്കം വൻ വിജയം; സഞ്ജുവിന്റെ ടീമിന്റെ ബാറ്റിങ് ഓർഡർ ഇനി ഇങ്ങനെ തന്നെ

നേരത്തെ ഇംഗ്ലണ്ടിന് എതിരായ ടി20 പരമ്പരയിലെ അവസാന മത്സരത്തിനിടെയായിരുന്നു സഞ്ജു സാംസണിന്റെ വിരലിന് പരിക്കേറ്റത്. ഇതേത്തുടർന്ന് ശസ്ത്രക്രിയക്ക് താരം വിധേയനാവുകയും ചെയ്തു. വിരലിനേറ്റ പരിക്കിൽ നിന്ന് സഞ്ജു പൂർണമായും സുഖപ്പെട്ടെന്നാണ് വിവരം. നിലവിൽ ലഭിക്കുന്ന സൂചനകൾ പ്രകാരം അടുത്ത കളിയിൽ രാജസ്ഥാൻ റോയൽസിന്റെ ക്യാപ്റ്റൻസിയിലേക്ക് സഞ്ജു തിരിച്ചെത്തും. ടീമിന് വലിയ ആവേശം സമ്മാനിക്കുന്ന കാര്യമാണിത്.

2025 സീസണിലെ ആദ്യ മൂന്ന് കളികളിലും ബാറ്റർ മാത്രമായി കളിച്ച സഞ്ജു ആകെ 99 റൺസാണ് നേടിയത്. സൺ റൈസേഴ്സ് ഹൈദരാബാദിന് എതിരായ കളിയിൽ 66 റൺസ് സ്കോർ ചെയ്ത സഞ്ജു, രണ്ടാം മത്സരത്തിൽ കൊൽക്കത്ത നൈറ്റ് റൈഡേഴ്സിന് എതിരെ 13 റൺസിൽ വീണു. ചെന്നൈ സൂപ്പർ കിങ്സിന് എതിരായ മൂന്നാം മത്സരത്തിൽ 20 റൺസ് നേടിയാണ് സഞ്ജു പുറത്തായത്.

Also Read: ജയിച്ചിട്ടും രാജസ്ഥാൻ റോയൽസിനെ നിരാശരാക്കി അക്കാര്യം; സഞ്ജുവിന്റെ ടീമിന്റെ പ്രധാന തലവേദന ഇങ്ങനെ

2025 സീസൺ ഐപിഎല്ലിൽ അത്ര മികച്ച തുടക്കമല്ല രാജസ്ഥാൻ റോയൽസിന് ലഭിച്ചിരിക്കുന്നത് എന്നതും ശ്രദ്ധേയം. ആദ്യ കളിയിൽ സൺ റൈസേഴ്സ് ഹൈദരാബാദിനോടും രണ്ടാമത്തെ കളിയിൽ കൊൽക്കത്ത നൈറ്റ് റൈഡേഴ്സിനോടും അവർ തോറ്റു. ചെന്നൈ സൂപ്പർ കിങ്സിന് എതിരെ നടന്ന മൂന്നാം മത്സരത്തിലാണ് റോയൽസ് ആദ്യ ജയം നേടിയത്. സീസണിൽ റോയൽസിന്റെ അടുത്ത മത്സരം ഏപ്രിൽ അ‌ഞ്ചാം തീയതിയാണ്. പഞ്ചാബ് കിങ്സാണ് എതിരാളികൾ. ഇതിന് ശേഷം ഏപ്രിൽ ഒൻപതിന് അഹമ്മദാബാദിൽ ഗുജറാത്ത് ടൈറ്റൻസിന് എതിരെ കളിക്കുന്ന രാജസ്ഥാൻ 13 ന് ജയ്പൂരിൽ ആർസിബിക്ക് എതിരെയും ഇറങ്ങും.