അടുത്ത കളിയിൽ രാജസ്ഥാൻ റോയൽസ് ടീമിൽ നിർണായക മാറ്റം വരും? വിദേശ താരം പുറത്തായേക്കും, രണ്ടും കൽപ്പിച്ച് പിങ്ക് പട

Curated byഗോകുൽ എസ് | Samayam Malayalam | Updated: 3 May 2025, 2:33 pm

2025 സീസൺ ഇന്ത്യൻ പ്രീമിയർ ലീഗിൽ ( IPL 2025 ) അതിദയനീയ പ്രകടനമാണ് രാജസ്ഥാൻ റോയൽസിന്റേത്‌. ആദ്യ 11 കളികളിൽ മൂന്നെണ്ണത്തിൽ മാത്രമാ‌ണ് അവർക്ക് വിജയം നേടാനായത്. ഇതോടെ ടീം പ്ലേ ഓഫിലെത്താതെ പുറത്താവുകയും ചെയ്തു. പ്ലേ ഓഫ് പ്രതീക്ഷകൾക്ക് അവസാനമായ സ്ഥിതിക്ക് ഇനി ശേഷിക്കുന്ന മൂന്ന് മത്സരങ്ങൾ ജയിച്ച് സീസൺ അവസാനിപ്പിക്കുകയാവും രാജസ്ഥാൻ റോയൽസിന്റെ ലക്ഷ്യം. ഞായറാഴ്ച കൊൽക്കത്ത നൈറ്റ് റൈഡേഴ്സിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. കെകെആറി‌ന്റെ ഹോം ഗ്രൗണ്ടായ ഈഡൻ ഗാർഡൻസിലാണ് ഈ മത്സരം നടക്കുക. മുംബൈ ഇന്ത്യൻസിന് എതിരായ അവസാന നത്സരത്തിൽ കളിച്ച ടീമിൽ നിർണായക മാറ്റം വരുത്തിയാകും രാജസ്ഥാൻ ഈ മത്സരത്തിന് ഇറങ്ങുകയെന്ന കാര്യം ഏറെക്കുറെ ഉറപ്പാണ്‌.


പരിക്കിന്റെ പിടിയിലുള്ള നായകൻ സഞ്ജു സാംസണെ ധൃതി പിടിച്ച് കളിക്കളത്തിലേക്ക് തിരിച്ചുകൊണ്ടുവരാൻ രാജസ്ഥാൻ റോയൽസ് ആഗ്രഹിക്കുന്നില്ലെന്നാണ് കഴിഞ്ഞ കളിക്ക് മുൻപ് സംസാരിക്കവെ പരിശീലകൻ രാഹുൽ ദ്രാവിഡ് പറഞ്ഞത്‌‌. അതിനാൽ അടുത്ത കളിയിലും സഞ്ജു കളിക്കുന്ന കാര്യം സംശയമാണ്‌. സഞ്ജുവിന്റെ അഭാവത്തിൽ യശസ്വി ജയ്സ്വാളും വൈഭവ് സൂര്യവംശിയും ചേർന്നാകും രാജസ്ഥാന്റെ ബാറ്റിങ് ഓപ്പൺ ചെയ്യുക. കഴിഞ്ഞ കളിയിൽ നിരാശപ്പെടുത്തിയ ഈ ജോഡിയിൽ നിന്ന് മികച്ചൊരു പ്രകടനം ആരാധകർ പ്രതീക്ഷിക്കുന്നുണ്ട്.

വൈഭവിൻ്റെ പുറത്താകൽ; നിരാശ മറയ്ക്കാനാകാതെ രാഹുൽ ദ്രാവിഡ്; ഹോം വർക്ക് ചെയുന്ന കോച്ചിനെ ഇനി ഡഗ്‌ ഔട്ടിൽ കാണാനാകില്ലെന്ന് സോഷ്യൽ മീഡിയ
നിതീഷ് റാണയാകും മൂന്നാം നമ്പരിൽ ഇറങ്ങുക. ഈ സീസണിൽ പ്രതീക്ഷക്ക് ഒത്തുയരാൻ സാധിച്ചിട്ടില്ലാത്ത താരമാണ് നിതീഷ് റാണ. ധ്രുവ് ജൂറൽ തന്നെയാകും വിക്കറ്റ് കീപ്പർ. മോശം ഫോമിലാണെങ്കിലും 14 കോടി രൂപക്ക് നിലനിർത്തിയ താരത്തെ രാജസ്ഥാൻ റോയൽസ് പുറത്താക്കില്ല. വെസ്റ്റിൻഡീസ് സൂപ്പർ താരം ഷിംറോൺ ഹെറ്റ്മെയർ തന്നെയാകും ഫിനിഷർ‌. മോശം ഫോമിലുള്ള ഹെറ്റിയുടെയും മികച്ച തിരിച്ചുവരവാണ് ആരാധകർ കാത്തിരിക്കുന്നത്. ഒരു പരാജയം കൂടി സംഭവിച്ചാൽ ടീമിൽ ഹെറ്റിയുടെ ഭാവിയും അനിശ്ചിതത്വത്തിലാകുമെന്ന കാര്യം ഉറപ്പ്‌.

എക്സ്പ്രസ് പേസർ ജോഫ്ര ആർച്ചർ തന്നെയാകും പേസ് നിരയെ നയിക്കുക. കഴിഞ്ഞ കളിയിൽ ഫ്ലോപ്പായ അഫ്ഗാനിസ്താൻ പേസർ ഫസൽഹഖ് ഫാറൂഖി ടീമിൽ നിന്ന് പുറത്താകുമെന്ന കാര്യം ഉറപ്പ്. അദ്ദേഹത്തിന് പകരം ദക്ഷിണാഫ്രിക്കൻ കൗമാര പേസർ ക്വെന മഫാക്ക ടീമിലെത്താൻ സാധ്യതയുണ്ട്. ആകാശ് മധ്വലാകും മറ്റൊരു പേസർ. കഴിഞ്ഞ കളിയിൽ മികച്ച രീതിയിൽ പന്തെറിഞ്ഞ താരമാണ് അദ്ദേഹം. സ്പിൻ നിരയിൽ മഹീഷ് തീക്ഷണ, വനിന്ദു ഹസരംഗ എന്നിവരിൽ ഒരാളും, കുമാർ കാർത്തികേയയും കളിച്ചേക്കും.

എന്തൊരു പതനം...! രാജസ്ഥാന്‍ റോയല്‍സ് നാണംകെട്ടു; റെക്കോഡ് തോല്‍വിയുമായി ഐപിഎല്ലില്‍ നിന്ന് പുറത്ത്
രാജസ്ഥാൻ റോയൽസിന്റെ സാധ്യത പ്ലേയിങ് ഇലവൻ ഇങ്ങനെ: യശസ്വി ജയ്സ്വാൾ, വൈഭവ് സൂര്യവംശി, നിതീഷ് റാണ, റിയാൻ പരാഗ്, ധ്രുവ് ജൂറൽ, ഷിംറോൺ ഹെറ്റ്മെയർ, ജോഫ്ര ആർച്ചർ, ക്വെന മഫാക്ക, മഹീഷ് തീക്ഷണ / വനിന്ദു ഹസരംഗ, കുമാർ കാർത്തികേയ, ആകാശ് മധ്വാൽ.

അതേ സമയം രാജസ്ഥാൻ റോയൽസിനെപ്പോലെ ഈ സീസണിൽ മോശം ഫോമിലുള്ള ടീമാണ് കൊൽക്കത്ത നൈറ്റ് റൈഡേഴ്സും. 10 കളികളിൽ ഒൻപത് പോയിന്റ് മാത്രമാണ് ടീമിന്റെ സമ്പാദ്യം. നാല് കളികളിൽ മാത്രം വിജയിച്ചല അവർ അഞ്ച് കളികളിൽ തോറ്റു. ഒരു മത്സരത്തിൽ ഫലമുണ്ടായില്ല. നിലവിൽ പോയിന്റ് പട്ടികയിൽ ഏഴാമതാണ് അവർ. പ്ലേ ഓഫ് പ്രതീക്ഷ നിലനിർത്താൻ രാജസ്ഥാൻ റോയൽസിന് എതിരെ കെകെആറിന് വിജയം അനിവാര്യമാണ്.