അതെന്റെ ക്രെഡിറ്റ് ആണ് എന്ന് പലരും പറയാറുണ്ട്, അങ്ങനെയല്ല; ഞാനൊരാൾ മാത്രം വിചാരിച്ചതുകൊണ്ട് ഒന്നും സംഭവിക്കില്ല എന്ന് കാവ്യ

Authored by: അശ്വിനി പി|Samayam Malayalam•9 Sept 2025, 11:19 am

ദിലീപുമായുള്ള വിവാഹത്തിന് ശേഷം കാവ്യ മാധവൻ പൂർണമായും അഭിനയത്തിൽ നിന്ന് മാറി നിൽക്കുകയാണെങ്കിലും, ആരാധകർക്ക് ഇപ്പോഴും കാവ്യ പ്രിയപ്പെട്ട നടി തന്നെയാണ്. കാവ്യയുടെ പഴയ സിനിമ രംഗങ്ങളും, പഴയ അഭിമുഖങ്ങളും, ഇപ്പോൾ പങ്കെടുക്കുന്ന പരിപാടികളുടെ വീഡിയോകളും ഫോട്ടോകളും എല്ലാം വൈറലാവുന്നതിന്റെ കാരണവും അതാണ്.

വർഷങ്ങൾക്ക് മുൻപ് കാവ്യ മാധവൻ നൽകിയ ഒരു അഭിമുഖത്തിലെ ചില വീഡിയോ ക്ലിപ്പുകളാണ് ഇപ്പോൾ സോഷ്യൽ മീഡിയയിൽ വൈറലാവുന്നത്. അനന്തഭദ്രം സിനിമയിലെ സൗന്ദര്യത്തെ എല്ലാവരും പ്രശംസിക്കുന്നതിനെ കുറിച്ചും ചെയ്തതിൽ ഏറ്റവും അധികം ഇഷ്ടമായ കഥാപാത്രത്തെ കുറിച്ചുമൊക്കെ കാവ്യ സംസാരിക്കുന്നതായ വീഡിയോ ക്ലിപ്പുകളാണ് വൈറലാവുന്നത്.

Also Read: ബന്ധക്കാരിയാണ് ഒൻപത് വയസ് താഴെയും! കല്യാണച്ചിലവ്, സാലറി, ബേബി പ്ലാനിങ്; റൊമാന്റിക് മൊമെന്റ്‌സ്‌ എന്തുകൊണ്ടില്ല; കാർത്തിക് പറയുന്നു

കാവ്യ മാധവൻ ഏറ്റവും സുന്ദരിയായി കാണപ്പെട്ടത് അനന്തഭദ്രം എന്ന സിനിമയിലാണ് എന്നത് പൊതുവെയുള്ള അഭിപ്രായമാണ്. എന്നാൽ അത് തന്റെ മാത്രം ക്രെഡിറ്റ് അല്ല എന്ന് കാവ്യ പറയുന്നു. എല്ലാവരും പറയുന്നത് എന്റെ സൗന്ദര്യം കൊണ്ടാണ് എന്ന തരത്തിലാണ്. എന്നാലല്ല. അതിന് പിന്നിൽ ഒരുപാട് പേരുടെ പ്രയത്നമുണ്ട്. പ്രത്യേകിച്ചും ക്യാമറ ചെയ്ത സന്തോഷ് ശിവൻ എന്നാണ് കാവ്യ പറയുന്നത്.

അനന്തഭദ്രം പോലൊരു സിനിമ ചെയ്യുന്നതിന് കാവ്യയെ തന്നെ തിരഞ്ഞെടുത്തതിന് കാരണം കാവ്യയുടെ സൗന്ദര്യമാണെന്ന് പറഞ്ഞപ്പോഴായിരുന്നു നടിയുടെ മറുപടി. അതാരാണ് ആ സിനിമയുടെ ക്യാമറ മാൻ എന്ന് നമ്മൾ ചിന്തിക്കണം. സന്തോഷേട്ടന്റെ ഫ്രെയിമിലാണ് ഞാൻ വന്നിരിക്കുന്നത്. അനന്തഭദ്രത്തെ കുറിച്ച് സംസാരിക്കുമ്പോൾ എല്ലാവരും എനിക്ക് ക്രെഡിറ്റ് തന്ന് സംസാരിക്കുന്നത് ഒരിക്കലും അംഗീകരിക്കാൻ പറ്റാത്ത ഒരു കാര്യമാണ്. കാരണം, ഞാൻ ഒരാൾ വിചാരിച്ചതുകൊണ്ടു മാത്രം ഒന്നും സംഭവിക്കില്ല.

Also Read: ഡിമോൺ ഹണ്ടേഴ്സ് ഫാനായ പൃഥ്വിരാജിൻറെ മകൾ അല്ലി; പതിനൊന്നാം പിറന്നാളിന്റെ കേക്കിന്റെ പ്രത്യേകത?

പിന്നെ ആ സിനിമയിൽ ഞാൻ ധരിച്ചിരിയ്ക്കുന്ന കോസ്റ്റ്യൂം. എത്രയോ കാലം മുൻപ് വരച്ച രാജ രവിവർമയുടെ എല്ലാ ചിത്രങ്ങളും കലക്ട് ചെയ്ത്, അതിൽ വേണ്ടത് തിരഞ്ഞെടുത്ത്, ആ ചിത്രത്തിലേതു പോലുള്ള ആക്സസറീസ് കലക്ട് ചെയ്ത് എന്നെ ആ രൂപത്തിലേക്ക് എത്തിക്കുകയായിരുന്നു. മേക്കപ്മാനും അതിന്റെ ക്രെഡിറ്റുണ്ട്. ഇങ്ങനെയൊക്കെ ചില ചിത്രങ്ങൾ ഉണ്ട് എന്ന് ഞാൻ മനസ്സിലാക്കിയത് ആ ചിത്രത്തിന്റെ ലൊക്കേഷനിൽ വച്ചാണ്. അത്രയ്ക്ക് പോലും എന്റെ ക്രെഡിറ്റ് പറയാൻ സാധിക്കില്ല എന്നാണ് കാവ്യ മാധവൻ പറഞ്ഞത്. എന്നാൽ ചുമരുണ്ടെങ്കിലേ ചിത്രം വരയാൻ സാധിക്കൂ, കാവ്യയുടെ സൗന്ദര്യം തന്നെയാണ് ഈ ഫ്രെയിമുകൾ അത്രയും ഭംഗിയായി വരാൻ കാരണം എന്ന് ആരാധകർ പറയുന്നു.


ചെയ്തതിൽ ഏറ്റവും ഇഷ്ടപ്പെട്ട കഥാപാത്രങ്ങളെ കുറിച്ച് ചോദിച്ചപ്പോൾ അത് എന്നും ചന്ദ്രനുദിക്കുന്ന ദിക്കിൽ എന്ന ചിത്രത്തിലെ രാധ തന്നെയാണ് എന്ന് കാവ്യ പറയുന്നു. രാധയെക്കാൾ അഭിനയ സാധ്യതകളുള്ള ഒരുപാട് കഥാപാത്രങ്ങൾ ഞാൻ ചെയ്തിട്ടുണ്ട്. ഊമപ്പെണ്ണിന് ഉരിയാടാപയ്യൻ എന്ന സിനിമയ്ക്ക് ശേഷമാണ് പെരുമഴക്കാലം, ശീലാബതി, ഗദ്ദാമ പോലുള്ള സിനിമകളൊക്കെ ചെയ്തത്. പക്ഷേ എല്ലാത്തിനും തുടക്കം രാധയാണല്ലോ, ആദ്യത്തേതിനോട് പ്രത്യേകം ഒരിഷ്ടമുണ്ടാവുമല്ലോ. ചെയ്യേണ്ടായിരുന്നു, എന്തിന് ചെയ്തു എന്നൊക്കെ തോന്നിപ്പോയ സിനിമകളും ചെയ്തിട്ടുണ്ട് എന്ന് കാവ്യ മാധവൻ പറഞ്ഞു.