അമ്മയെ കളിയാക്കി ഞാനിനി ഒരിക്കലും കോമഡി പറയില്ല, അച്ഛൻ വീട്ടിൽ നിന്ന് ഇറക്കിവിടാനുണ്ടായ കാരണം; ഇതുവരെ പറയാത്തത് പലതും ധ്യാൻ തുറന്ന് പറയുന്നു

Authored by: അശ്വിനി പി|Samayam Malayalam•24 May 2025, 12:50 pm

അഭിമുഖങ്ങളുടെ കാര്യത്തിൽ സൂപ്പർ സ്റ്റാറാണ് മലയാളത്തിലെ ധ്യാൻ ശ്രീനിവാസൻ എന്ന് നിസംശയം പറയാൻ സാധിക്കും. ധ്യാനിന്റെ സിനിമകളെക്കാൾ സൂപ്പർ ഹിറ്റാണ് താരത്തിന്റെ പല അഭിമുഖങ്ങളും. കള്ളത്തരങ്ങൾ ഇല്ലാതെ, എല്ലാം വെട്ടിത്തുറന്ന് പറയുന്ന സ്വഭാവം. ആളുകളെ ചിരിപ്പിക്കാൻ വേണ്ടി സ്വന്തം കുറവുകളും വീട്ടുകാരുടെ കുറവുകളും ധ്യാൻ വിഷയമാക്കും. ചിലതൊക്കെ ചർച്ചയാവുമെങ്കിലും, ധ്യാനും ധ്യാനിനെ ഇഷ്ടപ്പെടുന്നവരും അതാസ്വദിക്കാറുണ്ട്. എന്നാൽ ഇത്രയും കാല്യം ധ്യാൻ നൽകിയ അഭിമുഖങ്ങൾ പോലെയായിരുന്നില്ല പേളി മാണി ഷോയിൽ വന്നപ്പോൾ. ഇത്രയും കാലം പറയാത്തത് പലതും ആ അഭിമുഖത്തിൽ ധ്യാൻ സംസാരിച്ചിട്ടുണ്ട്.

ഒരു കോമഡി പറയുമ്പോൾ പോലും എത്രത്തോളം ധ്യാൻ ശ്രദ്ധിക്കുന്നുണ്ട് എന്നതും, എന്തുകൊണ്ട് ഇങ്ങനെ സംസാരിക്കുന്നു എന്നും ആ അഭിമുഖം കാണുന്നവർക്ക് ബോധ്യമാവും. തന്റെ അഭിമുഖം പലർക്കും ഡിപ്രഷനിൽ നിന്നും മറ്റ് പല മാനസികാവസ്ഥകളിൽ നിന്നും മുക്തി നൽകി എന്ന് കേൾക്കുമ്പോഴുള്ള സന്തോഷവും ധ്യാൻ പങ്കുവച്ചു. അതിനൊക്കെ കാരമം ഞാൻ അഭിനയിച്ച പരാജയ സിനിമകളാണ്. ആ സിനിമകൾ തിരഞ്ഞെടുക്കാനും ധ്യാനിന് കാരണങ്ങളുണ്ട്.

Also Read: അഹാനയ്ക്ക് 29, ഇഷാനിക്ക് 24; ആരുടെ കല്യാണമായിരിക്കും ആദ്യ? എല്ലാവരുടെയും ചോദ്യത്തിന് ഇഷാനിയുടെ മറുപടി

എനിക്ക് ചില ദുഃശ്ശീലങ്ങൾ ഉണ്ടായിരുന്നു. മകൾ ജനിച്ചപ്പോൾ അത് ഒഴിവാക്കണം എന്ന് തോന്നി. ഞാൻ മറ്റെന്തെങ്കിലും കാര്യത്തിൽ എൻഗേജ്ഡ് ആയാൽ മാത്രമേ അത് മാറൂ എന്ന് എനിക്കറിയാം. അതിന് വേണ്ടിയാണ് സിനിമകളിൽ അഭിനയിക്കാൻ തീരുമാനിച്ചത്. പക്ഷേ എന്റെ ആ തീരുമാനം അച്ഛന് ഇഷ്ടപ്പെട്ടില്ല. അഭിനയത്തെ അത്ര നിസ്സാരമായി കാണുന്നതിന്റെ പേരിലാണ് അച്ഛനുമായി വഴക്കായതും എന്നെ വീട്ടിൽ നിന്ന് ഇറക്കിവിട്ടതും. ഇപ്പോഴും എനിക്ക് അഭിനയത്തോട് താത്പര്യമില്ല. എന്നെ കാസ്റ്റ് ചെയ്യുന്നവരോട് ഞാനത് പറയാറുണ്ട്. എന്റെ മേഖല ഡയരക്ഷനാണ്. ഞാനതിലേക്ക് തന്നെ മാറും. എന്ത് ഉദ്ദേശിച്ചാണോ ഞാൻ അഭിനയത്തിലേക്ക് വന്നത് അത് എനിക്ക് സാധിച്ചിട്ടുണ്ട്. അതുകൊണ്ട് ഞാൻ സക്സസ്ഫുൾ ആണെന്നേ പറയൂ. എന്തിനെയും പോസിറ്റീവായിട്ട് മാത്രമേ കാണുന്നുള്ളൂ എന്നും ധ്യാൻ ശ്രീനിവാസൻ പറഞ്ഞു.

അമ്മയെ കുറിച്ച് എനിയൊരിക്കലും കോമഡി പറയില്ല എന്നും ആ അഭിമുഖത്തിൽ ധ്യാൻ പറയുന്നുണ്ട്. ഒരാളെ കുറിച്ച് നമ്മൾ കോമഡി പറയുമ്പോൾ, അവർ അത്രയും നമുക്ക് കംഫർട്ട് ആണ് എന്ന ബോധ്യം ഉണ്ടാവണം. ദിലീപേട്ടനെ കുറിച്ച് അഭിമുഖങ്ങളിൽ കളിയാക്കി പറഞ്ഞത് അതുകൊണ്ടാണ്. അദ്ദേഹം ഏത് സെൻസിൽ എടുക്കും എന്നെനിക്കറിയാം. അല്ലാത്തവരെ കളിയാക്കി പറയുമ്പോൾ, രണ്ട് വാക്ക് പ്രശംസിച്ചും പറയണം. അല്ലെങ്കിൽ അത് അവർക്ക് വല്ലാത്ത പ്രയാസവും, നമ്മളോട് വിദ്വേഷത്തിനും കാരണമാവും. അമ്മയെ കുറിച്ച് കളിയാക്കി പറയില്ല എന്ന് പറഞ്ഞത്, അമ്മ അത് ആസ്വദിക്കുന്നില്ല എന്ന് പറഞ്ഞതുകൊണ്ടാണ്.

നാട്ടിൽ അത്യാവശ്യം വിലയും നിലയും ഉള്ള ആളാണ് അമ്മ. ഞാൻ കളിയാക്കി സംസാരിച്ചപ്പോൾ ആ ഇമേജ് ഇടിഞ്ഞു. കളിയാക്കി സംസാരിക്കുന്നത് അമ്മയ്ക്ക് ആസ്വദിക്കാൻ പറ്റുന്നില്ല എന്ന് പറഞ്ഞു, അതോടെ അമ്മയെ കുറിച്ച് സംസാരിക്കുന്നത് നിർത്തി- ധ്യാൻ ശ്രീനിവാസൻ പറഞ്ഞു