അവസാന ഓവർ വരെ നീണ്ട ത്രില്ലർ പോരാട്ടം, ഫോറടിച്ച് കളി തീർത്ത് രാധാ യാദവ്; ആർസിബിക്ക് രണ്ടാം കിരീടം

റെക്കോർഡ് കൂട്ട് !വഡോദര സ്റ്റേഡിയത്തിലെ ഉയർന്ന വിജയലക്ഷ്യം ഉയർത്തിയാണ് ആദ്യം ബാറ്റു ചെയ്ത ഡൽഹി ബെംഗളൂരുവിനെ വെല്ലുവിളിച്ചത്. രണ്ടാം ഓവറിൽ ഓപ്പണർ ഗ്രേസ് ഹാരിസിനെ (9) ഷിനല്ലി ഹെൻറി പുറത്താക്കിയതോടെ ‍ഡൽഹി ടീം കൂടുതൽ ആവേശത്തിലായി. എന്നാൽ ജോർജിയ വോളും (79) സ്മൃതി മന്ഥനയും (87) ചേർന്നുള്ള രണ്ടാം വിക്കറ്റ് കൂട്ടുകെട്ട് ഡൽഹിയുടെ വിജയ സ്വപ്നങ്ങൾക്കു മുന്നിൽ മതിൽകെട്ടി മുന്നേറി. പേസ്, സ്പിൻ വ്യത്യാസമില്ലാതെ ബോളർമാരെ അടിച്ചൊതുക്കി മുന്നേറിയ സഖ്യം 92 പന്തിൽ അടിച്ചെടുത്തത് 165 റൺസ്. വനിതാ പ്രിമിയർ ലീഗ് ചരിത്രത്തിലെ ഏറ്റവും മികച്ച ബാറ്റിങ് കൂട്ടുകെട്ട്. ബെംഗളൂരു അനായാസ വിജയത്തിലേക്കു മുന്നേറുന്നതിനിടെ 17–ാം ഓവറിൽ ജോർജിയ വോളിനെ പുറത്താക്കിയ മിന്നു മണി ഡൽഹിക്കു പ്രതീക്ഷ നൽകി. 18–ാം ഓവറിൽ റിച്ച ഘോഷും (6) മടങ്ങി. ഷിനല്ലി ഹെൻറിയുടെ 19–ാം ഓവറിലെ നാലാം പന്തിൽ സ്മൃതി പുറത്തായപ്പോൾ ബെംഗളൂരു ഒന്നു വിറച്ചു. രാധ യാദവ് ഉയർത്തിയടിച്ച തൊട്ടടുത്ത പന്ത് കവറിൽ മിന്നു മണിയുടെ കയ്യിൽനിന്നു ചോർന്നതോടെ ബെംഗളൂരുവിന് ‘ശ്വാസം’ തിരിച്ചുകിട്ടി. ജയിക്കാൻ 10 റൺസ് വേണ്ടിയിരുന്ന അവസാന ഓവറിൽ തുടരെ 2 ഫോറുകളുമായി രാധ യാദവ് ആർസിബിയുടെ കിരീടം ഉറപ്പിച്ചു.

ജമീമയുടെ പോരാട്ടംനേരത്തേ ക്യാപ്റ്റൻ ജമീമ റോഡ്രീഗ്സിന്റെ അർധ സെഞ്ചറിയുടെ (37 പന്തിൽ 57) കരുത്തിലാണ്, ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഡൽഹി മികച്ച സ്കോർ നേടിയത്. ലിസ് ലീ (30 പന്തിൽ 37), ഷഫാലി വർമ (13 പന്തിൽ 20), ലോറ വോൾവാർട്ട് (25 പന്തിൽ 44), ഷിനല്ലി ഹെൻറി (15 പന്തിൽ 35 നോട്ടൗട്ട്) എന്നിവരും ഡൽഹി ബാറ്റിങ്ങിൽ തിളങ്ങി. 16–ാം ഓവറിലെ അവസാന പന്തിൽ ജമീമ പുറത്താകുമ്പോൾ 148 റൺസായിരുന്നു ഡൽഹിയുടെ അക്കൗണ്ടിൽ. ഡെത്ത് ഓവറിൽ തകർത്തടിച്ച ഷിനല്ലി ഹെൻറിയും ലോറ വോൾവർട്ടും ചേർന്ന് അവസാന 4 ഓവറിൽ നേടിയത് 68 റൺസാണ്.

വനിതാ പ്രിമിയർ ലീഗിലെ ഏറ്റവും ഉയർന്ന റൺചേസ് വിജയമാണ് ഇന്നലെ ബെംഗളൂരൂ നേടിയത് (204). കഴിഞ്ഞ സീസണിൽ ഗുജറാത്തിനെതിരെ 202 റൺസ് വിജയം നേടിയ ബെംഗളൂരു  റെക്കോർഡ് മെച്ചപ്പെടുത്തി.