ആ ഐപിഎൽ നിയമം കൃത്യമായി ഉപയോഗിച്ച് സഞ്ജുവിന്റെ രാജസ്ഥാൻ റോയൽസ്; അടുത്ത സീസണിൽ ഇക്കാര്യം ടീമിന് ഗുണം ചെയ്യും

Curated byഗോകുൽ എസ് | Samayam Malayalam | Updated: 9 May 2025, 4:25 pm

2025 സീസൺ ഇന്ത്യൻ പ്രീമിയർ ലീഗിൽ പ്ലേ ഓഫിലെത്താതെ പുറത്തായി കഴിഞ്ഞ ടീമുകളിൽ ഒന്നാണ് രാജസ്ഥാൻ റോയൽസ്. ആദ്യ 12 കളികളിൽ മൂന്ന് വിജയങ്ങൾ മാത്രം നേടാനായ അവർ പോയിന്റ് പട്ടികയിൽ ഒൻപതാം സ്ഥാനത്താണ്. ലീഗിൽ ഇനി ഒരു പ്രതീക്ഷകളും അവർക്ക് ബാക്കിയില്ല. എന്നാൽ പ്ലേ ഓഫിലെത്താതെ പുറത്തായി കഴിഞ്ഞ അവർ കഴിഞ്ഞ ദിവസം രണ്ട് താരങ്ങളെ പുതുതായി സൈൻ ചെയ്തിരുന്നു. സീസണിന്റെ അവസാന ഘട്ടമെത്തിയപ്പോളേക്ക് അവർ എന്തിനാണ് രണ്ട് സൈനിങ്ങുകൾ നടത്തിയതെന്ന സംശയം ആരാധകർക്കുമുണ്ടായി. എന്നാൽ അടുത്ത സീസണിലേക്കുള്ള മുന്നൊരുക്കത്തിന്റെ ഭാഗമാണ് ഈ നീക്കങ്ങളെന്നതാണ് ശ്രദ്ധേയം. ഐപിഎൽ നിയമം അനുസരിച്ച് പരിക്കേറ്റ് സീസണിൽ നിന്ന് പുറത്താകുന്ന താരങ്ങൾക്ക് പകരക്കാരെ സൈൻ ചെയ്യാൻ ഫ്രാഞ്ചൈസികൾക്ക് സാധിക്കും. അങ്ങനെ സൈൻ ചെയ്യുന്ന കളിക്കാരെ അടുത്ത സീസണിൽ ടീമിൽ റിട്ടെയിൻ ചെയ്യാനും നിയമം ടീമുകളെ അനുവദിക്കുന്നുണ്ട്. ഈ നിയമം കൃത്യമായി ഉപയോഗപ്പെടുത്തുകയാണ് രാജസ്ഥാൻ റോയൽസ് ഇവിടെ ചെയ്തത്.



പരിക്കേറ്റ് പുറത്തായ സന്ദീപ് ശർമക്ക് പകരം, ദക്ഷിണാഫ്രിക്കൻ പേസർ നാന്ദ്രെ ബർഗറിനെയും, നിതീഷ് റാണക്ക് പകരം ഡി പ്രിട്ടോറിയസിനെയുമാണ് രാജസ്ഥാൻ റോയൽസ് സൈൻ ചെയ്തത്. മെഗാ ലേലത്തിന് ശേഷം രണ്ട് വിദേശ താരങ്ങളുടെ ഒഴിവ് സ്ക്വാഡിൽ ഉണ്ടായിരുന്നതിനാലാണ് ഇന്ത്യൻ താരങ്ങൾക്ക് പകരക്കാരായി വിദേശ താരങ്ങളെ സൈൻ ചെയ്യാൻ രാജസ്ഥാൻ റോയൽസിന് സാധിച്ചത്‌. മറ്റു ചില കളിക്കാരെ റിലീസ് ചെയ്ത് പേഴ്സിൽ പണം ലഭ്യമാക്കിയാൽ ഈ നാല് കളിക്കാരെയും ( നാന്ദ്രെ ബർഗർ, ഡി പ്രിട്ടോറിയസ്, നിതീഷ് റാണ, സന്ദീപ് ശർമ) അടുത്ത തവണ റിട്ടെയിൻ ചെയ്യാൻ രാജസ്ഥാൻ റോയൽസിനാകും.

സഞ്ജു സാംസൺ അടക്കം പണി കിട്ടിയത് മൂന്ന് പേർക്ക്; രാജസ്ഥാൻ റോയൽസിന് ഇത് വമ്പൻ തിരിച്ചടി ലഭിച്ച സീസൺ
അതേ സമയം രാജസ്ഥാൻ റോയൽസിന് പുറമെ മറ്റ് ചില ടീമുകളും ഇത്തരത്തിൽ പകരക്കാരൻ സൈനിങ്ങുകൾ നടത്തിയിട്ടുണ്ട്. ഇതിൽ ചെന്നൈ സൂപ്പർ കിങ്സാണ് ഏറ്റവും മികച്ച നീക്കങ്ങൾ നടത്തിയത്‌. പരിക്കേറ്റ് പുറത്തായ ക്യാപ്റ്റൻ റുതുരാജ് ഗെയിക്ക്വാദിന് പകരം കൗമാര താരം ആയുഷ് മാത്രെയെ സൈൻ ചെയ്ത അവർ, ഗുജൻപ്രീതിന് പകരം ഡിവാൾഡ് ബ്രെവിസിനെയും ടീമിലെത്തിച്ചു. ആയുഷ് മാത്രെയും ബ്രെവിസും ടീമിനായി മിന്നും പ്രകടനം കാഴ്ച വെച്ചു. ഇവരെ അടുത്ത സീസണിൽ സി എസ് കെ റിട്ടെയിൻ ചെയ്യുമെന്ന കാര്യം ഉറപ്പാണ്‌.

സഞ്ജു സാംസണിന്റെ ബാറ്റിങ് പൊസിഷനിൽ നിർണായക മാറ്റം വരും? അടുത്ത കളിയിൽ തിരിച്ചെത്തുമ്പോൾ പുതിയ റോളിൽ കണ്ടേക്കാം
അതേ സമയം ആദ്യ സീസൺ മുതൽ ഐപിഎല്ലിൽ നിലവിലുള്ളതാണ് പരിക്കേറ്റ താരങ്ങൾക്ക് പകരക്കാരെ സൈൻ ചെയ്യാൻ സാധിക്കുന്ന നിയമം. 2011 ൽ ക്രിസ് ഗെയിലിനെ റോയൽ ചലഞ്ചേഴ്സ് ബംഗളൂരു സൈൻ ചെയ്തത് പകരക്കാരനായിട്ടായിരിന്നു. അന്ന് ഡിർക് നാനിസിന് പകരം ആർസിബിയിൽ എത്തിയ ഗെയിൽ, അവരുടെ എക്കാലത്തെയും മികച്ച കളിക്കാരിൽ ഒരാളായി മാറുന്നത് ക്രിക്കറ്റ് ലോകം കണ്ടു. നിലവിൽ ആർസിബിയുടെ നായകനായ രജത് പാട്ടിദാറും, പകരക്കാരനായി ടീമിലെത്തിയ താരമാണ്. 2022 ൽ ലുവ്നിത് സിസോദിയക്ക് പരിക്കേറ്റപ്പോളായിരുന്നു രജത് പാട്ടിദാർ ആർസിബിയിൽ എത്തിയത്‌.