ആ ഐപിഎൽ മത്സരം വീണ്ടും നടത്തും? വമ്പൻ ട്വിസ്റ്റ്; സുപ്രധാന സൂചനകൾ പുറത്ത്, മികച്ച നീക്കമെന്ന് വിലയിരുത്തൽ

Curated byഗോകുൽ എസ് | Samayam Malayalam | Updated: 10 May 2025, 5:29 pm

ഇന്ത്യ - പാക് സംഘർഷം ശക്തമായ സാഹചര്യത്തിൽ 2025 സീസൺ ഇന്ത്യൻ പ്രീമിയർ ലീഗ് ഒരാഴ്ചത്തേക്ക് നിർത്തിവെച്ചിരിക്കുകയാണ്. പഞ്ചാബ് കിങ്സും ഡെൽഹി ക്യാപിറ്റൽസും തമ്മിലായിരുന്നു അവസാന മത്സരം. ഈ മത്സരം പക്ഷേ പൂർത്തിയാക്കാൻ സാധിച്ചിരുന്നില്ല. ധരംശാലയിൽ നടന്ന കളി വെറും 10.1 ഓവറുകൾ ആയപ്പോളേക്കും ഉപേക്ഷിക്കുകയായിരുന്നു. സാങ്കേതിക കാരണങ്ങളാൽ മത്സരം ഉപേക്ഷിക്കുകയാണെന്നാണ് അന്ന് റിപ്പോർട്ടുകൾ വന്നത്. എന്നാൽ പിറ്റേ ദിവസം ഐപിഎൽ ഒരാഴ്ചത്തേക്ക് നിർത്തിക്കൊണ്ടുള്ള ബിസിസിഐയുടെ ഔദ്യോഗിക പ്രഖ്യാപനം എത്തി.
ഇപ്പോളിതാ ഒരാഴ്ചക്ക് ശേഷം ഐപിഎൽ പുനരാരംഭിക്കുമ്പോൾ പഞ്ചാബ് കിങ്സും ഡെൽഹി ക്യാപിറ്റൽസും തമ്മിലുള്ള മത്സരം വീണ്ടും നടത്തുമെന്ന് റിപ്പോർട്ടുകൾ വന്നിരിക്കുന്നു. ഇന്ത്യൻ എക്സ്പ്രസാണ് ഇതുസംബന്ധിച്ച സൂചനകൾ പുറത്തുവിട്ടത്. ഒരാഴ്ചക്കുള്ളിൽ വീണ്ടും ഐപിഎല്ലിന് സജ്ജമാകാൻ താരങ്ങൾക്ക് നിർദേശം നൽകണമെന്ന് ബിസിസിഐ, ഫ്രാഞ്ചൈസികളെ അറിയിച്ചതായാണ് വിവരം. എന്നാൽ ഇതിനകം ഇന്ത്യ വിട്ട വിദേശ താരങ്ങൾ ഒരാഴ്ചക്കുള്ളിൽ തിരിച്ചെത്തുമോ എന്ന കാര്യത്തിൽ വലിയ ആശങ്കകൾ നിലനിൽക്കുന്നുണ്ട്.

'രാജ്യ സുരക്ഷയേക്കാള്‍ വലുതല്ല ക്രിക്കറ്റ്'- ഐപിഎല്‍ നിര്‍ത്തിവച്ചു; ഒരു ആഴ്ചയ്ക്ക് ശേഷം പുതിയ ഷെഡ്യൂള്‍
നിലവിൽ പ്ലേ ഓഫ് യോഗ്യത നേടാൻ ശക്തമായി രംഗത്തുള്ള ടീമുകളാണ് പഞ്ചാബ് കിങ്സും ഡെൽഹി ക്യാപിറ്റൽസും. ഇവർ തമ്മിലുള്ള മത്സരം ഇരുടീമുകളുടെയും പ്ലേ ഓഫ് സാധ്യതകളിൽ നിർണായകമാണ്‌. ഈ കളിയിൽ നേടുന്ന പോയിന്റ് ഇരു ടീമുകളുടെയും പ്ലേ ഓഫ് യോഗ്യതയിൽ സുപ്രധാന പങ്ക് വഹിക്കും. അതുകൊണ്ടു തന്നെ പഞ്ചാബ് - ഡെൽഹി മത്സരം വീണ്ടും നടത്തിയേക്കുമെന്നത് ഇരു ടീമുകൾക്കും നല്ല സൂചനയാണ്. ഏതെങ്കിലും കാരണത്താൽ ഐപിഎൽ ഈ മാസം പുനരാരംഭിക്കാൻ സാധിച്ചില്ലെങ്കിൽ സെപ്റ്റംബറിലാകും പിന്നീട് മത്സരങ്ങൾ നടത്തുകയെന്നും റിപ്പോർട്ടുകളുണ്ട്.

ഇവന്‍ കൊള്ളാം, 2025ന്റെ കണ്ടെത്തല്‍; കന്നി ഐപിഎല്ലിനെത്തിയ 24കാരനെ വാഴ്ത്തി റിക്കി പോണ്ടിങ്
അതേ സമയം പഞ്ചാബ് കിങ്സും ഡെൽഹി ക്യാപിറ്റൽസും തമ്മിലുള്ള മത്സരത്തിൽ പഞ്ചാബ് തകർത്തടിച്ച് മുന്നേറുന്നതിനിടെയായിരുന്നു മത്സരം ഉപേക്ഷിക്കാനുള്ള തീരുമാനമെത്തിയത്. ഈ സമയം 10.1 ഓവറുകളിൽ 122/1 എന്ന അതിശക്തമായ നിലയിലായിരുന്നു പഞ്ചാബ് കിങ്സ്. 34 പന്തുകളിൽ അഞ്ച് ഫോറുകളും ആറ് സിക്സറുകളുമടക്കം 70 റൺസ് നേടിയ പ്രിയാൻഷ് ആര്യയായിരുന്നു പഞ്ചാബിന്റെ വെടിക്കെട്ടിനെ മുന്നിൽ നിന്ന് നയിച്ചത്. 28 പന്തിൽ 50 റൺസ് നേടിയ പ്രഭ്സിമ്രാൻ സിങ്ങും റണ്ണൊന്നുമെടുക്കാതെ ശ്രേയസ് അയ്യരുമായിരുന്നു മത്സരം ഉപേക്ഷിക്കുമ്പോൾ ക്രീസിൽ.