ആ മണ്ടൻ തീരുമാനം രാജസ്ഥാന് തിരിച്ചടിയായി; തോൽവിക്ക് പിന്നാലെ സഞ്ജുവിന്റെ ടീമിനെതിരെ ആരാധകർ രംഗത്ത്

Curated byഗോകുൽ എസ് | Samayam Malayalam | Updated: 17 Apr 2025, 12:58 am

2025 സീസൺ ഐപിഎല്ലിലെ‌ ദയനീയ ഫോം തുടർന്നിരിക്കുകയാണ് രാജസ്ഥാൻ റോയൽസ്. ബുധനാഴ്ച വൈകിട്ട് നടന്ന മത്സരത്തിൽ കരുത്തരായ ഡെൽഹി ക്യാപിറ്റൽസിനോട് അവർ പരാജയപ്പെടുകയായിരുന്നു. ആവേശം സൂപ്പർ ഓവറിലേക്ക് കടന്ന പോരാട്ടത്തിലായിരുന്നു റോയൽസിന്റെ പരാജയം. നേരത്തെ മത്സരത്തിൽ ആദ്യം ബാറ്റ് ചെയ്ത ഡെൽഹി ക്യാപിറ്റൽസ് 20 ഓവറിൽ 188/5 എന്ന സ്കോർ നേടിയപ്പോൾ, രാജസ്ഥാൻ റോയൽസിന്റെ മറുപടി 20 ഓവറിൽ 188/4 എന്ന സ്കോറിൽ അവസാനിക്കുകയായിരുന്നു. ഇതോടെയാണ് കളി സൂപ്പർ ഓവറിലേക്ക് നീണ്ടതും ഡെൽഹിക്ക് വിജയം സ്വന്തമായതും.അതേ സമയം ഡെൽഹിക്ക് വേണ്ടി സൂപ്പർ ഓവർ എറിഞ്ഞത് അവരുടെ ഏറ്റവും മികച്ച ബൗളറായ മിച്ചൽ സ്റ്റാർക്കായിരു‌ന്നു. എന്നാൽ രാജസ്ഥാനാവട്ടെ അവരുടെ ഏറ്റവും മികച്ച ബൗളറായ ജോഫ്ര ആർച്ചറെ തഴഞ്ഞ് സന്ദീപ് ശർമക്ക് സൂപ്പർ ഓവർ നൽകി. ഈ തീരുമാനം ഡെൽഹിക്ക് അനുഗ്രഹമായി. നിലവിൽ സ്ലോ ബോളുകൾ മാത്രം സ്റ്റോക്കുള്ള സന്ദീപിന് എതിരെ എങ്ങനെ ബാറ്റ് ചെയ്യണമെന്ന് കൃത്യമായ ധാരണ സൂപ്പർ ഓവറിൽ ഡെൽഹിക്കായി ബായ് ചെയ്ത രാഹുലിനും സ്റ്റ്ബ്സിനുമുണ്ടായിരുന്നു. സൂപ്പർ‌ ഓവറിൽ സന്ദീപിന്റെ ബൗളിങ് മോശമാവുകയും ചെയ്തതോടെ ഡെൽഹിക്ക് അനായാസം വിജയത്തിലേക്ക് എത്താനായി.


ജോഫ്ര ആർച്ചർക്ക് നൽകാതെ സന്ദീപിന് സൂപ്പർ ഓവർ നൽകാനുള്ള റോയൽസിന്റെ മണ്ടൻ തീരുമാനം അവർക്ക് കളിയും നഷ്ടപ്പെടുത്തി. ആർച്ചർക്ക് സൂപ്പർ ഓവർ നൽകാതിരുന്ന റോയൽസിന്റെ തീരുമാനം ആരാധകരെയും കട്ടകലിപ്പിലാക്കിയിട്ടുണ്ട്. ആർച്ചർ എറിഞ്ഞിരുന്നെങ്കിൽ സൂപ്പർ ഓവറിൽ ടീമിന്റെ ജയസാധ്യത കൂടുമായിരുന്നുവെന്നാണ് സമൂഹ മാധ്യമങ്ങളിൽ ആരാധകർ കുറിക്കുന്നത്. മത്സരത്തിൽ മികച്ച ഫോമിൽ ബാറ്റ് വീശിയ നിതീഷ് റാണയെ സൂപ്പർ ഓവറിൽ ബാറ്റിങ്ങിന് ഇറക്കാതിരുന്ന റോയൽസ് നീക്കത്തെയും ആരാധകർ വിമർശിക്കുന്നുണ്ട്.

സൂപ്പര്‍ ഓവറില്‍ സഞ്ജുവിന്റെ രാജസ്ഥാന്‍ റോയല്‍സ് വീണു; ഡല്‍ഹി ക്യാപിറ്റല്‍സ് ഒന്നാം സ്ഥാനത്ത്
നേരത്തെ മത്സരത്തിൽ ടോസ് നേടിയ രാജസ്ഥാൻ റോയൽസ് നായകൻ സഞ്ജു സാംസൺ, ഡെൽഹി ക്യാപിറ്റൽസിനെ ബാറ്റിങ്ങിന് അയക്കുകയായിരുന്നു. ഒൻപത് റൺസെടുത്ത ജേക് ഫ്രേസർ മക്ഗർകിനെ വേഗത്തിൽ പുറത്താക്കി ജോഫ്ര ആർച്ചർ രാജസ്ഥാൻ റോയൽസിന് കിടിലൻ തുടക്കം നൽകി. പിന്നാലെ മിന്നും ഫോമിലുള്ള കരുൺ നായർ ( 0 ) റണ്ണൗട്ടാവുക കൂടി ചെയ്തതോടെ ഡെൽഹി 34/2 എന്ന നിലയിലായി. 37 പന്തിൽ 49 റൺസ് നേടിയ അഭിഷേക് പോറൽ, 32 പന്തിൽ 38 റൺസെടുത്ത കെ എൽ രാഹുൽ, 18 പന്തിൽ 34 റൺസ് നേടിയ ട്രിസ്റ്റൻ സ്റ്റബ്സ്, 14 പന്തിൽ 34 റൺസെടുത്ത അക്സർ പട്ടേൽ എന്നിവരുടെ ഇന്നിങ്സുകൾ 188/5 എന്ന മികച്ച സ്കോറിലേക്ക് ഡെൽഹിയെ എത്തിച്ചു.

189 റൺസ് വിജയലക്ഷ്യം പിന്തുടർന്ന രാജസ്ഥാൻ റോയൽസിന് വേണ്ടി ഓപ്പണർമാരായ സഞ്ജു സാംസണും യശസ്വി ജയ്സ്വാളും ചേർന്ന് തീപ്പൊരി തുടക്കമാണ് നൽകിയത്. എന്നാൽ സഞ്ജുവിന് പരിക്ക് പറ്റി റിട്ടയേഡ് ഹർട്ടാവേണ്ടി വന്നു. 19 പന്തുകളിൽ രണ്ട് ഫോറുകളും മൂന്ന് സിക്സറുകളുമടക്കം 31 റൺസ് നേടി നിൽക്കുമ്പോളാണ് പരിക്ക് സഞ്ജുവിന് മുന്നിൽ വില്ലനായത്. പരാഗ് എട്ട് റൺസെടുത്ത് വേഗത്തിൽ മടങ്ങിയെങ്കിലും പിന്നാലെ വന്ന നിതീഷ് റാണ ഫോമിൽ ബാറ്റ് വീശിയതോടെ രാജസ്ഥാൻ സ്കോർ കുതിച്ചു.

111 റണ്‍സിന് ഓള്‍ഔട്ടായിട്ടും കെകെആറിനെ 95 റണ്‍സിന് എറിഞ്ഞിട്ടു; 16 റണ്‍സ് ജയത്തോടെ പഞ്ചാബ് നാലാമത്
ഇതിനിടെ ജയ്സ്വാൾ 37 പന്തിൽ 51 റൺസ് നേടി പുറത്തായി. മൂന്ന് ഫോറും നാല് സിക്സറുകളും അടങ്ങുന്നതായിരുന്നു താരത്തിന്റെ ഇന്നിങ്സ്. നിതീഷ് റാണ 28 പന്തിൽ 51 റൺസ് നേടി. ധ്രുവ് ജൂറലും നിതീഷ് റാണയുമായിരുന്നു അവസാന ഓവറുകളിൽ ക്രീസിൽ. മിച്ചൽ സ്റ്റാർക്ക് എറിഞ്ഞ അവസാന ഓവറിൽ ജയിക്കാൻ 9 റൺസ് വേണ്ടിയിരിക്കെ എട്ട് റൺസ് മാത്രമാണ് റോയൽസിന് നേടാനായത്. ഇതോടെ കളി സൂപ്പർ ഓവറിലേക്ക്. സൂപ്പർ ഓവറിലാകട്ടെ മത്സരം ഡെൽഹി അനായാസം സ്വന്തമാക്കുകയും ചെയ്തു. ജയത്തോടെ ആറ് കളികളിൽ 10 പോയിന്റായ ഡെൽഹി ക്യാപിറ്റൽസ് പോയിന്റ് പട്ടികയിൽ ഒന്നാം സ്ഥാനത്തേക്കുമെത്തി.