ആ വമ്പൻ നാണക്കേടിൽ നിന്ന് കഷ്ടിച്ച് രക്ഷപ്പെട്ട് സഞ്ജുവിന്റെ രാജസ്ഥാൻ റോയൽസ്; ജയിച്ചിട്ടും പണി വാങ്ങി ചെന്നൈ സൂപ്പർ കിങ്സ്

Curated by: ഗോകുൽ എസ്|Samayam Malayalam•26 May 2025, 12:28 am

2025 സീസൺ ഇന്ത്യൻ പ്രീമിയർ ലീഗിലെ ( IPL 2025 ) തങ്ങളുടെ അവസാന മത്സരത്തിൽ കിടിലൻ ജയമാണ് ചെന്നൈ സൂപ്പർ കിങ്സ് നേടിയത്‌. അഹമ്മദാബാദിൽ ഗുജറാത്ത് ടൈറ്റൻസിന് എതിരെ നടന്ന കളിയിൽ 83 റൺസിന്റെ ജയമാണ് ധോണിപ്പട സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത ചെന്നൈ, 20 ഓവറിൽ 230/5 എന്ന പടുകൂറ്റൻ സ്കോർ നേടിയപ്പോൾ, ഗുജറാത്ത് ടൈറ്റൻസിന്റെ മറുപടി 147 ൽ അവസാനിച്ചു. അവസാന മത്സരത്തിൽ കിടിലൻ ജയം നേടിയെങ്കിലും പോയിന്റ് പട്ടികയിൽ അവസാന സ്ഥാനത്ത് മാത്രമാണ് ചെന്നൈക്ക് ഫിനിഷ് ചെയ്യാനായത്. ഇതോടെ രക്ഷപ്പെട്ടത് സഞ്ജു സാംസണിന്റെ രാജസ്ഥാൻ റോയൽസാണ്‌.‌ അവസാന സ്ഥാനക്കാരെന്ന നാണക്കേടിൽ നിന്ന് കഷ്ടിച്ചാണ് ഇക്കുറി രാജസ്ഥാൻ റോയൽസ് രക്ഷപ്പെട്ടത് എന്നതാണ് ശ്രദ്ധേയം. രാജസ്ഥാൻ റോയൽസിനും ചെന്നൈ സൂപ്പർ കിങ്സിനും ഇക്കുറി എട്ട് പോയിന്റാണ് നേടാനായത്. എന്നാൽ ചെന്നൈയേക്കാൾ മികച്ച നെറ്റ് റൺ റേറ്റുള്ളത് രാജസ്ഥാനെ ഒൻപതാം സ്ഥാനത്ത് ഫിനിഷ് ചെയ്യാൻ സഹായിക്കുകയായിരുന്നു.

ഞായറാഴ്ച നടന്ന കളിയിൽ പടുകൂറ്റൻ സ്കോർ നേടിയതോടെ ചെന്നൈക്ക് ഒൻപതാം സ്ഥാനത്ത് ഫിനിഷ് ചെയ്യാൻ മികച്ച അവസരം ലഭിച്ചതാണ്‌‌. എന്നാൽ ഇതിന് ഗുജറാത്തിനെ 121 നോ അതിൽ കുറഞ്ഞ സ്കോറിനോ അവർക്ക് ഒതുക്കണമായിരുന്നു. ഗുജറാത്ത് ടൈറ്റൻസിന്റെ സ്കോർ 147 എത്തിയതോടെ ചെന്നൈക്ക് നെറ്റ് റൺ റേറ്റിൽ രാജസ്ഥാനെ മറികടക്കാനുള്ള അവസരം നഷ്ടമായി.


അതേ സമയം ദയനീയ പ്രകടനമായിരുന്നു 2025 സീസൺ ഇന്ത്യൻ പ്രീമിയർ ലീഗിൽ ചെന്നൈ സൂപ്പർ കിങ്സും രാജസ്ഥാൻ റോയൽസും കാഴ്ച വെച്ചത്. 14 ലീഗ് മത്സരങ്ങളിൽ നാല് കളികളിൽ മാത്രമാണ് ഇരു ടീമുകൾക്കും ജയിക്കാനായത്.‌ ഇതിൽ രാജസ്ഥാൻ റോയൽസിന്റെ നെറ്റ് റൺ റേറ്റ് -0.549 ഉം, ചെന്നൈയുടെ നെറ്റ് റൺ റേറ്റ് -0.647 ഉം ആണ്. പരിക്കുകൾ രണ്ട് ടീമുകൾക്കും പണി കൊടുത്തു. പരിക്കിനെ തുടർന്ന് ഇരു ടീമുകൾക്കും അവരുടെ ക്യാപ്റ്റന്മാരുടെ സേവനവും സീസണിൽ ഉടനീളം ലഭിച്ചില്ല.

നാണംകെട്ട് ചാമ്പ്യന്‍മാര്‍; കെകെആറിന് ചരിത്രത്തിലെ വമ്പന്‍ തോല്‍വി; എസ്ആര്‍എച്ചിന്റെ രണ്ടാം വന്‍ വിജയം
അതേ സമയം ഐപിഎല്ലിൽ ഇതാദ്യമായാണ് ചെന്നൈ സൂപ്പർ കിങ്സ് അവസാന സ്ഥാനത്ത് സീസൺ അവസാനിപ്പിക്കുന്നത്. അഞ്ച് തവണ ഐപിഎൽ കിരീടം ചൂടിയ ധോണിയും സംഘവും ലീഗിന്റെ ചരിത്രത്തിലെ തന്നെ ഏറ്റവും സ്ഥിരതയുള്ള ടീമെന്നാ‌ണ് അറിയപ്പെടുന്നത്. 2008 മുതൽ 2019 വരെ കളിച്ച എല്ലാ സീസണുകളിലും പ്ലേ ഓഫിലെത്താൻ അവർക്ക് കഴിഞ്ഞു. 2020 ലാണ് ചെന്നൈ ആദ്യമായി ലീഗ് ഘട്ടത്തിൽ പുറത്താകുന്നത്. എട്ട് ടീമുകൾ മത്സരിച്ച സീസണിൽ ഏഴാം സ്ഥാനക്കാരായിരുന്നു ചെന്നൈ. 2021 ൽ ശക്തമായ തിരിച്ചുവരവ് നടത്തിയ ധോണിയും സംഘവും കിരീടം സ്വന്തമാക്കി.

രാജസ്ഥാൻ റോയൽസിൽ ആ മൂന്ന് സുപ്രധാന മാറ്റങ്ങൾ വന്നേക്കും; സഞ്ജുവിന്റെ ടീം ലേലത്തിൽ ശ്രദ്ധിക്കേണ്ടത് ഇക്കാര്യങ്ങൾ
2022 ൽ ടീം വീണ്ടും തകർന്നു. ദയനീയ പ്രകടനം കാഴ്ച വെച്ച ടീം ഒൻപതാം സ്ഥാനത്താണ് ഫിനിഷ് ചെയ്തത്. 10 ടീമുകളാണ് ഈ സീസണിൽ മത്സരിച്ചത്. 2023 ൽ വീണ്ടും വമ്പൻ തിരിച്ചുവരവ് നടത്തിയ ധോണിപ്പട അഞ്ചാം ഐപിഎൽ കിരീടം സ്വന്തമാക്കി. 2024 സീസൺ ഐപിഎല്ലിൽ അഞ്ചാം സ്ഥാനമായിരുന്നു ചെന്നൈക്ക് ലഭിച്ചത്. ഇത്തവണയും ലീഗ് ഘട്ടത്തിൽ വീണതോടെ ഇതാദ്യമായി തുടർച്ചയായ രണ്ട്‌ സീസണുകളിൽ പ്ലേ ഓഫ് കാണാതെ ചെന്നൈ പുറത്താകുന്നതിനും ആരാധകർക്ക് സാക്ഷ്യം വഹിക്കേണ്ടി വന്നു.