ആ സ്പെഷ്യൽ റെക്കോഡ് സ്വന്തമാക്കി മിച്ചൽ മാർഷ്, ഐപിഎല്ലിൽ ഇതാദ്യം; നീണ്ട 15 വർഷത്തെ കാത്തിരിപ്പും അവസാനിപ്പിച്ച് ഓസീസ് താരം

Curated by: ഗോകുൽ എസ്|Samayam Malayalam•23 May 2025, 3:31 am

ഓസ്ട്രേലിയൻ സൂപ്പർ താരം മിച്ചൽ മാർഷിന്റെ അഴിഞ്ഞാട്ടമാണ് ഐപിഎല്ലിൽ ഇന്നലെ കണ്ടത്. ലക്നൗ സൂപ്പർ ജയന്റ്സിന്റെ ഓപ്പണറായ അദ്ദേഹം വ്യാഴാഴ്ച ഗുജറാത്ത് ടൈറ്റൻസിന് എതിരെ നടന്ന കളിയിൽ വെടിക്കെട്ട് സെഞ്ചുറിയാണ് നേടിയത്. വെറും 64 പന്തുകളിൽ നിന്ന് 117 റൺസാണ് മാർഷ് അടിച്ചുകൂട്ടിയത്. 10 ഫോറുകളും എട്ട് സിക്സറുകളും ഈ കളിയിൽ താരത്തിന്റെ ബാറ്റിൽ നിന്ന് പിറന്നു.

ഐപിഎല്ലിൽ സെഞ്ചുറി നേടിയതോടെ ഒരു സ്പെഷ്യൽ റെക്കോഡിലെത്താനും മിച്ചൽ മാർഷിനായി. നേരത്തെ ഐപിഎല്ലിന്റെ ആദ്യ സീസണിൽ മിച്ചൽ മാർഷിന്റെ സഹോദരനായ ഷോൺ മാർഷും സെഞ്ചുറി നേടിയിരുന്നു. പ്രഥമ ഐപിഎല്ലിലെ ചാമ്പ്യന്മാരായ രാജസ്ഥാൻ റോയൽസിന് എതിരെയായിരുന്നു മാർഷിന്റെ സെഞ്ചുറി. ഇപ്പോൾ മിച്ചലും സെഞ്ചുറി നേടിയതോടെ ഐപിഎല്ലിൽ സെഞ്ചുറി നേടുന്ന ആദ്യ സഹോദര ജോഡിയായി ഇവർ മാറി‌.

ഇതുവരെ ഒമ്പത് സഹോദര ജോഡികളാണ് ഐപിഎല്ലിൽ കളിച്ചിട്ടുള്ളത്. ( ഹസി സഹോദരങ്ങൾ, പത്താൻ സഹോദരങ്ങൾ, കറൻ സഹോദരങ്ങൾ, മോർക്കൽ സഹോദരങ്ങൾ, ചഹർ സഹോദരങ്ങൾ, ജാൻസൻ സഹോദരങ്ങൾ, മക്കല്ലം സഹോദരങ്ങൾ എന്നിവരാണിത്. എന്നാൽ ഇവരിൽ മാർഷ് സഹോദര ജോഡിയിൽ മാത്രമാണ് രണ്ട് പേർക്കും സെഞ്ചുറി നേടാനായത്.

Also Read: ലക്‌നൗ സൂപ്പർ ജെയ്ന്റ്‌സിന് ജയം; തുണയായത് മാർഷ് - പൂരൻ കൂട്ടുകെട്ട്

ഐപിഎൽ കരിയറിൽ മിച്ചൽ മാർഷിന്റെ ആദ്യ സെ‌ഞ്ചുറി കൂടിയാണ് ഇന്നലെ പിറന്നത്. 2010 ൽ ഐപിഎല്ലിൽ അരങ്ങേറ്റം കുറിച്ച മിച്ചൽ മാർഷിന് 15 വർഷങ്ങളാണ് ആദ്യ സെഞ്ചുറിയിലേക്ക് വേണ്ടി വന്നത്. ഇതുമൊരു റെക്കോഡാണ്. ഐപിഎല്ലിലെ അരങ്ങേറ്റത്തിന് ശേഷം ആദ്യ സെഞ്ചുറിയിലേക്ക് ഏറ്റവും കൂടുതൽ സമയമെടുക്കുന്ന താരമെന്ന റെക്കോഡാണ് മാർഷിന്റെ പേരിലായത്. നേരത്തെ, അരങ്ങേറി 12 വർഷത്തിന് ശേഷം ആദ്യ സെഞ്ചുറി നേടിയ സുനിൽ നരൈൻ, ശിഖർ ധവാൻ എന്നിവരുടെ പേരിലായിരുന്നു ഇത്രയും നാൾ ഈ റെക്കോഡ്.

Also Read: മൈതാനത്ത് വീണ് ഗുജറാത്ത് ടൈറ്റൻസ് താരം

അതേ സമയം 2025 സീസൺ ഇന്ത്യൻ പ്രീമിയർ ലീഗിൽ കിടിലൻ ഫോമിലാണ് മിച്ചൽ മാർഷ്. 12 കളികളിൽ 46.67 ബാറ്റിങ് ശരാശരിയിൽ 560 റൺസാണ് താരത്തിന്റെ സമ്പാദ്യം. 52 ഫോറുകളും, 32 സിക്സറുകളും ഈ സീസണിൽ മാർഷ് നേടിയിട്ടുണ്ട്.