ആദ്യ ഏഴിൽ രണ്ട് ഇന്ത്യൻ താരങ്ങൾ, ‌2025 സീസൺ ഐപിഎല്ലിലെ ഏറ്റവും വലിയ‌ സിക്സറുകൾ പറത്തിയത് ഇവർ

Curated byഗോകുൽ എസ് | Samayam Malayalam | Updated: 30 Apr 2025, 6:14 pm

2025 സീസൺ ഇന്ത്യൻ പ്രീമിയർ ലീഗ് രണ്ടാം പകുതിയിലേക്ക് കടന്നുകഴിഞ്ഞു. ആറ് ടീമുകൾ 10 മത്സരങ്ങൾ വീതം കളിച്ചുകഴിഞ്ഞു. നാല് ടീമുകൾ ഒൻപത് കളികളും പൂർത്തിയാക്കി. ആകെ മൊത്തം 48 മത്സരങ്ങളാണ് ടൂർണമെന്റിൽ ഇതുവരെ പൂർത്തിയായത്. ഇതുവരെയുള്ള കണക്കുകൾ നോക്കുമ്പോൾ ഇത്തവണ ഏറ്റവും വലിയ സിക്സർ നേടിയ താരം ആരാണ്. വമ്പൻ സിക്സറുകൾ അടിച്ച ആദ്യ ഏഴ് കളിക്കാരിൽ രണ്ട് ഇന്ത്യൻ താരങ്ങളാണുള്ളത്. ലിസ്റ്റ് പരിശോധിക്കാം.2025 സീസൺ ഐപിഎല്ലിലെ ഏറ്റവും വലിയ സിക്സ് പറത്തിയത് സൺ റൈസേഴ്സ് ഹൈദരാബാദ് താരം ഹെൻറിച്ച് ക്ലാസനാണ്. മുംബൈ ഇന്ത്യൻസിന് എതിരെ നടന്ന കളിയിൽ 107 മീറ്റർ ദൂരത്തേക്കാണ് ക്ലാസന്റെ സിക്സർ ചെന്നെത്തിയത്. കൂറ്റൻ സിക്സറിൽ പിന്നാലെയുള്ളത് കൊൽക്കത്ത നൈറ്റ് റൈഡേഴ്സ് താരം ആന്ദ്രെ റസലാണ്. ഡെൽഹി ക്യാപിറ്റൽസിന് എതിരെ നടന്ന മത്സരത്തിൽ സ്റ്റാർ പേസർ മിച്ചൽ സ്റ്റാർക്കിനെ 106 മീറ്റർ സിക്സറിനാണ് റസൽ പറത്തിയത്.


സൺ റൈസേഴ്സ് ഹൈദരാബാദ് ഓപ്പണർ അഭിഷേക് ശർമയും ഈ സീസണിൽ 106 മീറ്റർ ദൂരത്തേക്ക് സിക്സർ പറത്തി. സൺ റൈസേഴ്സ് ഹൈദരാബാദിന്റെ ട്രാവിസ് ഹെഡും, റോയൽ ചലഞ്ചേഴ്സ് ബംഗളൂരുവിന്റെ ഫിൽ സാൾട്ടും 105 മീറ്റർ ദൂരത്തേക്ക് സിക്സറുകൾ പായിച്ച് ലിസ്റ്റിൽ ആദ്യ അഞ്ചിലുണ്ട്. രാജസ്ഥാൻ റോയൽസിന് എതിരായ കളിയിലാണ് ഓസീസ് താരമായ ഹെഡിന്റെ സിക്സറെങ്കിൽ, ഗുജറാത്ത് ടൈറ്റൻസിന് എതിരെയായിരുന്നു ഫിൽ സാൾട്ടിന്റെ കൂറ്റൻ സിക്സർ.

അടുത്ത കളിയിൽ രാജസ്ഥാൻ റോയൽസ് ടീമിൽ ഈ രണ്ട് മാറ്റങ്ങൾ അനിവാര്യം; യുവതാരങ്ങൾക്ക് അവസരം നൽകണമെന്ന് ആരാധകർ
കൂറ്റൻ സിക്സറുകളിൽ ആറാം സ്ഥാനത്തുള്ളതും ഇന്ത്യക്കാരനാണ്. സൺ റൈസേഴ്സ് ഹൈദരാബാദിന്റെ താരമായ അനികേത് വർമയാണ് ഇത്. ഡെൽഹി ക്യാപിറ്റൽസിന് എതിരെ 102 മീറ്റർ ദൂരത്തേക്കാണ് അനികേതിന്റെ സിക്സർ ചെന്നെത്തിയത്. ലക്നൗ ‌സൂപ്പർ ജയന്റ്സ് താരം നിക്കോളാസ് പുറാനും 102 മീറ്റർ സിക്സർ ഇത്തവണ പറത്തി. കൊൽക്കത്ത നൈറ്റ് റൈഡേഴ്സിന് എതിരായ മത്സരത്തിലായിരുന്നു ഇത്.

രോഹിതിന് കോളടിച്ചു, മറ്റൊരു സൂപ്പർ താരം ടീമിൽ നിന്ന് പുറത്താകും; 35 അംഗ ചുരുക്ക പട്ടിക തെരഞ്ഞെടുത്ത് ബിസിസിഐ
അതേ സമയം ഈ സീസണിൽ കൂടുതൽ സിക്സറുകൾ നേടിയ കളിക്കാരിൽ ഒന്നാമത് നിക്കോളാസ് പുറാനാണ്. 34 സിക്സറുകളാണ് താരം നേടിയത്. സൂര്യകുമാർ യാദവ് 23 സിക്സറുകളുമായി രണ്ടാമതും യശസ്വി ജയ്സ്വാൾ 22 സിക്സറുകളുമായി മൂന്നാമതുമുണ്ട്.