ആരും അപ്പീല്‍ ചെയ്തില്ല, അമ്പയര്‍ ഔട്ടാക്കിയുമില്ല, സ്വയം പുറത്തുപോയി ഇഷാന്‍ കിഷന്‍; അള്‍ട്രാ-എഡ്ജ് വീഡിയോ വന്നതോടെ വിവാദം

Authored byനിഷാദ് അമീന്‍ | Samayam Malayalam | Updated: 24 Apr 2025, 12:52 am

മുംബൈ ഇന്ത്യന്‍സും സണ്‍റൈസേഴ്സ് ഹൈദരാബാദും തമ്മിലുള്ള ഐപിഎല്‍ 2025 മല്‍സരത്തില്‍ വിവാദത്തിന് തിരികൊളുത്തി ഇഷാന്‍ കിഷന്‍. എസ്ആര്‍ച്ച് താരമായ ഇഷാന്‍ ബാറ്റ് ചെയ്യവെ അമ്പയര്‍ നോട്ടൗട്ടായി കണക്കാക്കിയിട്ടും പുറത്ത്‌പോയതാണ് വിവാദമായത്.

ഇഷാന്റെ ബാറ്റില്‍ എഡ്ജ് ചെയ്ത് പന്ത് വിക്കറ്റ് കീപ്പറുടെ കൈകളില്‍ എത്തിയെന്നാണ് കരുതിയിരുന്നത്. എന്നാല്‍, മുംബൈ താരങ്ങള്‍ പരസ്പരം ചെറിയ അന്വേഷണം നടത്തിയതല്ലാതെ മറ്റൊരു അപ്പീലും നല്‍കിയില്ല. തുടര്‍ന്ന് അമ്പയര്‍ അദ്ദേഹത്തെ നോട്ടൗട്ട് ആയി പ്രഖ്യാപിച്ചു. എന്നാല്‍ ഇഷാന്‍ കിഷന്‍ സ്വയം പുറത്തുപോയി.

എന്ത് എഡ്ജ് ചെയ്തിരുന്നോ എന്ന് അറിയാന്‍ കാത്തുനില്‍ക്കാതെയാണ് ഇഷാന്‍ പോയത്. ഇതോടെ പന്ത് ബാറ്റില്‍ തട്ടിയെന്ന സ്വയം ബോധ്യത്തിന്റെ അടിസ്ഥാനത്തില്‍ അദ്ദേഹം മടങ്ങിയതാവുമെന്ന് കരുതി. എന്നാല്‍ എള്‍ട്രാ എഡ്ജ് പരിശോധനയുടെ ചിത്രം വന്നതോടെ എല്ലാവരും അമ്പരന്നു.

അള്‍ട്രാ-എഡ്ജ് കിഷന്റെ ബാറ്റിന്റെ ഒരു സ്‌പൈക്ക് പോലും കാണിച്ചില്ല എന്നതാണ് വിചിത്രം. റീപ്ലേയില്‍ പന്ത് ബാറ്റില്‍ തട്ടിയില്ലെന്ന് വ്യക്തം. ദീപക് ചാഹര്‍ എറിഞ്ഞ ഇന്നിങ്‌സിലെ മൂന്നാം ഓവറിലെ ആദ്യ പന്തിലാണ് ഇഷാന്‍ പുറത്തായത്. നാല് പന്തില്‍ ഒരു റണ്‍സുമായാണ് മടക്കം. കഴിഞ്ഞ മാച്ചിലും ഇഷാന്‍ ചെറിയ സ്‌കോറിന് പുറത്തായിരുന്നു.

ഇഷാന്‍ പുറത്തായതോടെ എസ്ആര്‍എച്ചിന്റെ ടോപ് ഓര്‍ഡര്‍ തകര്‍ന്നു. ഇതോടെ അദ്ദേഹം ക്രിക്കറ്റ് ആരാധകരുടെ വിമര്‍ശനങ്ങള്‍ ഏറ്റുവാങ്ങുകയാണ്. സ്വയം പുറത്തുപോവുന്ന ഇഷാനെ എംഐ താരം ഓടിയെത്തി അഭിനന്ദിച്ചു. അതേസമയം, ഇഷാന്‍ സ്വയം തന്റെ വിക്കറ്റ് മുംബൈ ഇന്ത്യന്‍സിന് സമ്മാനിച്ചത് എസ്ആര്‍എച്ച് ആരാധകരെ ചൊടിപ്പിച്ചു. തുടര്‍ തോല്‍വികളുമായി പോയിന്റ് നിലയില്‍ ഏറെ പിന്നിലായിപ്പോയ എസ്ആര്‍എച്ചിന് തിരിച്ചുവരാനുള്ള അവസരമായിരുന്നു ഈ മല്‍സരം.

സഞ്ജുവിന് ഒളിമ്പിക്‌സ് മെഡല്‍ നേടാന്‍ സുവര്‍ണാവസരം...! 2028 ഒളിമ്പിക്‌സില്‍ ടി20 ക്രിക്കറ്റും; ഉള്‍പ്പെടുത്തിയത് 128 വര്‍ഷങ്ങള്‍ക്ക് ശേഷം
ഒരു വിജയത്തിനായി എസ്ആര്‍എച്ച് പാടുപെടുമ്പോള്‍ ഇഷാന്‍ എന്തിനാണ് ഈ ത്യാഗം ചെയ്തതെന്നാണ് അറിയേണ്ടത്. ട്രാവിസ് ഹെഡ് പൂജ്യത്തിന് പുറത്തായതിന് തൊട്ടുപിന്നാലെയാണ് ഇഷാനും മടങ്ങിയത്. അഭിഷേക് ശര്‍മയും (8) നിതീഷ് റെഡ്ഡിയും (2) കൂടി പുറത്തായതോടെ എസ്ആര്‍എച്ച് 4.1 ഓവറില്‍ നാലിന് 13 എന്ന നിലയിലേക്ക് കൂപ്പുകുത്തി.

പിന്നീട് ഹെന്റിച്ച് ക്ലാസെനും അഭിനവ് മോഹറും ചേര്‍ന്ന് മികച്ച കൂട്ടുകെട്ടുണ്ടാക്കി മാനംകാത്തു. ക്ലാസെന്‍ 44 പന്തില്‍ 71 റണ്‍സും അഭിനവ് 37 പന്തില്‍ 43ഉം റണ്‍സെടുത്തു. എങ്കിലും 20 ഓവറില്‍ എട്ടിന് 143 എന്ന നിലയില്‍ ഇന്നിങ്‌സ് അവസാനിപ്പിക്കേണ്ടി വന്നു. 15.4 ഓവറില്‍ മൂന്ന് വിക്കറ്റ് നഷ്ടത്തില്‍ മുംബൈ ലക്ഷ്യം മറികടക്കുകയും ചെയ്തു.

ഒത്തുകളി ആരോപണത്തിന് പിന്നിലെ ഞെട്ടിക്കുന്ന കാരണം വെളിപ്പെടുത്തി രാജസ്ഥാന്‍ റോയല്‍സ്; മുഖ്യമന്ത്രിക്ക് പരാതി നല്‍കി
ഇഷാന്‍ കിഷന്‍ സീസണിലെ ആദ്യ മാച്ചില്‍ രാജസ്ഥാന്‍ റോയല്‍സിനെതിരെ സെഞ്ചുറിയോടെയാണ് തുടങ്ങിയതെങ്കിലും ശേഷം ഏഴ് ഇന്നിങ്‌സുകളില്‍ ആറെണ്ണത്തിലും രണ്ടക്കം തികച്ചില്ല. ഒരു തവണ 17 റണ്‍സ് നേടി. എട്ട് മത്സരങ്ങളില്‍ നിന്ന് 139 റണ്‍സ് മാത്രമേ ഇഷാന് നേടാനായുള്ളൂ.