ആരും മനക്കോട്ട കെട്ടണ്ട, ആർആർ തനിക്ക് എന്തെന്ന് തുറന്നുപറഞ്ഞ് സഞ്ജു സാംസൺ; റോയൽസ് ആരാധകർ ഡബിൾ ഹാപ്പി

Authored by: അനുഷ ഗംഗാധരൻ|Samayam Malayalam•10 Aug 2025, 9:42 am

ഇന്ത്യൻ പ്രീമിയർ ലീഗിൽ ഒരുപക്ഷെ മലയാളികൾ ഏറ്റവും കൂടുതൽ ഇഷ്ടപ്പെടുന്ന ടീം രാജസ്ഥാൻ റോയൽസ് ആയിരിക്കും. ഇതിന് കാരണം സഞ്ജു സാംസൺ ആണ്. മലയാളികളുടെ ഈ പ്രിയപ്പെട്ട താരം രാജസ്ഥാൻ റോയൽസ് വിടുകയാണ് എന്ന റിപോർട്ടുകൾ ശക്തമായി പ്രചരിക്കുകയാണ്‌. സഞ്ജു രാജസ്ഥാൻ വിടുകയാണ് എങ്കിൽ സഞ്ജുവിനെ സ്വന്തമാക്കാൻ മുൻപന്തിയിൽ നിൽക്കുന്ന രണ്ട് ടീമുകളാണ് ചെന്നൈ സൂപ്പർ കിങ്‌സും കൊൽക്കത്ത നൈറ്റ് റൈഡേഴ്സും. ഇത്തരത്തിൽ സഞ്ജു രാജസ്ഥാൻ വിടുകയാണെങ്കിൽ അത് ടീമിന് വലിയ നഷ്ടമാകും നൽകുക. സഞ്ജുവിന്റെ ക്യാപ്റ്റൻസിയ്ക്ക് ശേഷം മികച്ച പ്രകടനമാണ് റോയൽസ് കാഴ്ചവെച്ചിട്ടുള്ളത്. അതുകൊണ്ടുതന്നെ സഞ്ജു പോയാൽ ഒരു നല്ല നായകനെ കൂടിയാകും ടീമിന് നഷ്ടമാകുക.
'അവന്റെ ഷോട്ടുകൾ എന്നെ ശെരിക്കും ഞെട്ടിച്ചു'; വൈഭവിന്റെ പ്രകടനത്തെക്കുറിച്ച് വാചാലനായി സഞ്ജു സാംസൺ
എന്നാൽ സഞ്ജു ടീം വിടുന്നതുമായി ബന്ധപ്പെട്ട് ഇതുവരെ യാതൊരു ഔദ്യോഗിക റിപ്പോർട്ടും പുറത്തുവന്നിട്ടില്ല. ഈ സാഹചര്യത്തിൽ ചില കാര്യങ്ങൾ സഞ്ജു തന്നെ ഇപ്പോൾ തുറന്നുപറഞ്ഞിരിക്കുകയാണ്. ആർ അശ്വിന്റെ യൂട്യൂബ് ചാനലിൽ സംസാരിക്കവെയാണ് സഞ്ജു രാജസ്ഥാൻ റോയൽസിനെ കുറിച്ച് സംസാരിച്ചത്.

ഇന്ത്യയുടെ ടി20 സ്റ്റാർ വിക്കറ്റ് കീപ്പർ ബാറ്റ്സ്മാൻ സഞ്ജുവും ഐപിഎൽ ടീമായ രാജസ്ഥാൻ റോയൽസും തമ്മിലുള്ള ബന്ധത്തെ കുറിച്ചാണ് സഞ്ജു വാചാലനായത്. രാജസ്ഥാൻ റോയൽസാണ് തന്റെ ലോകം എന്ന് പറഞ്ഞ സഞ്ജു മുഖ്യ പരിശീലകൻ രാഹുൽ ദ്രാവിഡിന്റെയും ടീം ഉടമ മനോജ് ബദലെയെയും പ്രശംസിച്ചു.

'എനിക്ക് ( സഞ്ജു സാംസൺ ) ആർആർ എന്റെ ലോകം തന്നെയാണ്. കേരളത്തിലെ ഒരു ഗ്രാമത്തിൽ നിന്ന് വരുന്ന ഒരു കൊച്ചുകുട്ടി തന്റെ കഴിവ് പ്രകടിപ്പിക്കാൻ ആഗ്രഹിക്കുന്നു. പിന്നെ രാഹുൽ സാറും മനോജ് ബദലെ സാറും എനിക്ക് ഞാൻ എന്താണെന്ന് ലോകത്തിന് കാണിച്ചുകൊടുക്കാൻ ഒരു വേദി തന്നു. ആ സമയത്ത്, അവർ എന്നെ പൂർണമായി വിശ്വസിച്ചു. റോയൽസുമായുള്ള യാത്ര ശരിക്കും മികച്ചതായിരുന്നു, അത്തരമൊരു ഫ്രാഞ്ചൈസിയിൽ കളിക്കാൻ കഴിഞ്ഞതിൽ ഞാൻ വളരെ നന്ദിയുള്ളവനാണ്. ആർആർ എനിക്ക് എല്ലാം ആണ്' എന്നാണ് സഞ്ജു സാംസൺ പറഞ്ഞത്.

സഞ്ജു രാജസ്ഥാൻ റോയൽസ് വിടുമെന്ന കിംവദന്തികൾ നിലനിൽക്കുമ്പോഴാണ് ടീമിനെ കുറിച്ച് വാചാലനായി സഞ്ജു തന്നെ ഇപ്പോൾ രംഗത്തെത്തിയിരിക്കുന്നത്. റോയൽസ് ആരാധകർക്ക് സഞ്ജുവിന്റെ ഈ വാക്കുകൾ കൂടുതൽ പ്രതീക്ഷ നൽകുകയാണ്. ഐപിഎൽ 2026 സീസണിലും റോയൽസിനെ നയിക്കാൻ സഞ്ജു അമരത്തുണ്ടാകും എന്ന പ്രതീക്ഷയിലേക്ക് എത്തിയിരിക്കുകയാണ് ആരാധകർ.