ആർസിബിക്ക് വമ്പൻ തിരിച്ചടി, ഇന്ത്യൻ സൂപ്പർ താരം ഈ സീസണിൽ ഇനി കളിച്ചേക്കില്ല; നിരാശയിൽ ആരാധകർ

Curated byഗോകുൽ എസ് | Samayam Malayalam | Updated: 13 May 2025, 3:39 pm

2025 സീസൺ ഇന്ത്യൻ പ്രീമിയർ ലീഗിൽ ഉജ്ജ്വല ഫോമിലുള്ള റോയൽ ചലഞ്ചേഴ്സ് ബംഗളൂരു തങ്ങളുടെ ആദ്യ കിരീടമാണ് ഇത്തവണ ലക്ഷ്യം വെക്കുന്നത്. ഇന്ത്യ - പാക് സംഘർഷങ്ങളുടെ പശ്ചാത്തലത്തിൽ ഐപിഎൽ ഒരാഴ്ചത്തേക്ക് നിർത്തിവെക്കുമ്പോൾ പോയിന്റ് പട്ടികയിൽ രണ്ടാം സ്ഥാനത്താണ് അവർ. ചെറിയ ഇടവേളക്ക് ശേഷം ഈ മാസം 17 ന് ഐപിഎൽ പുനരാരംഭിക്കുമ്പോൾ ഫോം തുടരാമെന്ന പ്രതീക്ഷയിലാണ് അവർ. അതിനിടെ ഇപ്പോളിതാ ടീമിന് കരുത്ത തിരിച്ചടി സമ്മാനിക്കുന്ന ഒരു വാർത്ത പുറത്തുവന്നിരിക്കുന്നു. നായകൻ രജത് പാട്ടിദാർ പരിക്കിന്റെ പിടിയിലാണെന്നും ഈ സീസണിൽ താരം ഇനി കളിക്കുന്ന കാര്യം സംശയത്തിലാണെന്നുമുള്ള വാർത്തകളാണ് ആർസിബി ആരാധകരെ ആശങ്കപ്പെടുത്തുന്നത്.


ചെന്നൈ സൂപ്പർ കിങ്സിന് എതിരെ നടന്ന കളിയിലാണ് രജത് പാട്ടിദാറിന് പരിക്ക് പറ്റിയത്‌‌. പരിക്കിൽ നിന്ന് പൂർണമായി മോചിതനാവാൻ താരത്തിന് കുറച്ച് സമയം ആവശ്യമാണെന്നാണ് സൂചനകൾ. ഇത് കൊണ്ടു തന്നെ ഇംഗ്ലണ്ട് പര്യടനത്തിനുള്ള ഇന്ത്യ എ ടീമിലേക്കും പാട്ടിദാറിനെ സെലക്ടർമാർ പരിഗണിച്ചേക്കില്ലെന്നാണ് സൂചന. പരിക്കിനെ തുടർന്ന് പാട്ടിദാറിന് ഈ സീസണിൽ ഇനി കളിക്കാനായില്ലെങ്കിൽ ആർസിബിക്ക് അത് വമ്പൻ തിരിച്ചടിയായിരിക്കുമെന്ന കാര്യത്തിൽ സംശയമില്ല.

ഐപിഎല്‍ 2025 മെയ് 17ന് പുനരാരംഭിക്കും; ഫൈനല്‍ ജൂണ്‍ മൂന്നിന്
അതേ സമയം സീസണിന്റെ അവസാന ഘട്ടത്തിലെങ്കിലും രജത് പാട്ടിദാറിന് കളിക്കാനാകുമെന്ന പ്രതീക്ഷയിലാണ് ആർസിബി മാനേജ്മെന്റ്. ഇമ്പാക്ട് താരമായെങ്കിലും അദ്ദേഹത്തെ കളിപ്പിക്കുന്നതിനുള്ള സാധ്യതകളാവും ആർസിബി നോക്കുക. നിലവിൽ ബാറ്റിങ് പരിശീലനം നടത്തരുതെന്ന് താരത്തിന് ഡോക്ടർമാരുടെ നിർദേശമുണ്ടെന്നും അതിനിടെ റിപ്പോർട്ടുകളുണ്ട്.

2025 സീസണിൽ ആർസിബിയുടെ നായകനായി ചുമതലയേറ്റ രജത് പാട്ടിദാർ, ടീമിനെ മികച്ച രീതിയിലാണ് നയിക്കുന്നത്. പോയിന്റ് പട്ടികയിൽ ആർസിബി രണ്ടാം സ്ഥാനത്ത് നിൽക്കുന്നുണ്ടെങ്കിൽ പാട്ടിദാറിന്റെ ക്യാപ്റ്റൻസിക്ക് അതിൽ നിർണായക പങ്കുണ്ട്. 2025 സീസണിൽ 11 മത്സരങ്ങളിൽ ഇറങ്ങിയ പാട്ടിദാർ, 23.90 ബാറ്റിങ് ശരാശരിയിൽ 239 റൺസ് നേടിയിട്ടുണ്ട്‌.

ആർസിബിക്ക് കനത്ത തിരിച്ചടി, ആ സൂപ്പർ താരം ഈ സീസണിൽ ഇനി കളിക്കില്ല? ടീമിന്റെ കരുത്തിനെ ബാധിക്കും
ഈ സീസണിൽ ഇനി മൂന്ന് മത്സരങ്ങൾ കൂടിയാണ് ലീഗ് ഘട്ടത്തിൽ ആർസിബിക്ക് ബാക്കിയുള്ളത്. 17 ന് കെകെആറിന് എതിരെയും, 23 ന് സൺ റൈസേഴ്സ് ഹൈദരാബാദിന് എതിരെയും, 27 ന് ലക്നൗ സൂപ്പർ ജയന്റ്സിന് എതിരെയുമാണ് ഇത്. ഇതിൽ ഒരു കളിയിൽ വിജയിച്ചാൽ ടീമിന് പ്ലേ ഓഫിലേക്ക് യോഗ്യത നേടാൻ സാധിക്കുമെന്നാണ് കരുതപ്പെടുന്നത്.