ഇനിയുള്ള ജീവിതം നിന്നോടൊപ്പം ജീവിക്കുന്നതിനെക്കാൾ വലിയ സന്തോഷം എനിക്ക് മറ്റൊന്നില്ല; അച്ഛന് മുന്നിൽ മകളെ പ്രപ്പോസ് ചെയ്ത് സിഡ് വിൽസൺ

Authored by: അശ്വിനി പി|Samayam Malayalam•8 Jul 2025, 3:26 pm

അമേരിക്കൻ ഡിജെയും കീബോർഡിസ്റ്റുമായ സിഡ് വിൽസൺ വിവാഹിതനാവുന്നു. ഗായകൻ ഓസി ഓസ്ബേണിന്റെ മകളും ടെലിവിഷൻ താരവുമായ കെല്ലി ഓസ്ബേൺ ആണ് വധു. 2022 മുതൽ ഇരുവരും ഡേറ്റിങിൽ ആയിരുന്നുലെങ്കിലും, ആ ബന്ധം ഇപ്പോൾ വിവാഹത്തിലേക്ക് നീങ്ങുകയാണ്. അച്ഛനെ സാക്ഷി നിർത്തിയാണ് സിഡ് വിൽസൺ കെല്ലി ഓസ്ബേണിനോട് വിവാഹാഭ്യർത്ഥന നടത്തിയത്.

ഇംഗ്ലണ്ടിലെ വില്ല പാർക്കിൽ നടന്ന ബ്ലാക്ക് സാബത്തുമായുള്ള തന്റെ പിതാവ് ഓസി ഓസ്ബേണിന്റെ അവസാന കച്ചേരിയിൽ വച്ചാണ് സ്ലിപ്‌നോട്ട് അംഗമായ സിഡ് വിൽസൺ കെല്ലിയോട് വിവാഹാഭ്യർത്ഥന നടത്തിയത്. ഇൻസ്റ്റഗ്രാമിൽ പങ്കുവച്ച വീഡിയോയിലൂടെ ആരാധകരും അതിന് സാക്ഷിയായി.

Also Read: സൂപ്പർ ജോഡികൾ, എന്ത് സുന്ദരിയാണ് മോണിക്ക; പ്രണയം പരസ്യപ്പെടുത്തി ആൻഡ്രൂ ഗാർഫീൽഡും മോണിക്ക ബാർബറോയും

കെല്ലി, ഈ ലോകത്ത് എന്തിനേക്കാളും ഞാൻ നിന്നെ സ്നേഹിക്കുന്നുവെന്ന് നിനക്കറിയാമല്ലോ- എന്ന് പറഞ്ഞുകൊണ്ട് സിഡ് ആരംഭിച്ചതും, ഓസ്ബേൺ തമാശയോടെ ഉറക്കെ വിളിച്ചു പറഞ്ഞ്, പോടാ നീ എന്റെ മകളെ കെട്ടുന്നില്ല എന്ന്. ചിരിച്ചുകൊണ്ട് സിഡ് വിൽസൺ വീണ്ടും പറഞ്ഞു, എന്റെ ജീവിതകാലം മുഴുവൻ ഇനി നിന്നോടൊപ്പം ജീവിക്കുന്നതിനെക്കാൾ വലിയ സന്തോഷം എനിക്ക് മറ്റൊന്നില്ല. അതുകൊണ്ട് നിന്റെ കുടുംബത്തിന്റെയും നമ്മുടെ സുഹൃത്തുക്കളുടെയും മുന്നിൽ വച്ച് ചോദിയ്ക്കുന്നു, കെല്ലി നീ എന്നെ വിവാഹം കഴിക്കാമോ.

സന്തോഷവും ആശ്ചര്യവുമായിരുന്നു കെല്ലിയുടെ മുഖത്ത്. അതെ എന്ന് തലയാട്ടി കെല്ലി സിഡ് വിൽസണെ മുറുക്കെ കെട്ടിപ്പിടിച്ചു. അമ്മ ഷാരോൺ ഓസ്ബോണും സഹോദരൻ ജാക്ക് ഓസ്ബോണും അടക്കം എല്ലാവരും ആ നിമിഷം സന്തോഷത്തോടെ അതിന് സാക്ഷ്യം വഹിച്ചതും വീഡിയോയിൽ കാണാം.


1999 മുതൽ കെല്ലി ഓസ്ബേണും സിഡ് വിൽസണും പരസ്പരം അറിയുന്നവരാണ്. ഓസി ഓസ്ബേണും ഷാരോൺ ഓസ്ബേണും ചേർന്ന് ആരംഭിച്ച സംഗീതമേളയായ ഓസ്ഫെസ്റ്റിനൊപ്പം സ്ലിപ്‌നോട്ട് പര്യടനം നടത്തിയപ്പോഴാണ് ഇരുവരും ആദ്യമായി കണ്ടുമുട്ടിയത്. വർഷങ്ങളോളം സുഹൃത്തുക്കളായിരുന്നെങ്കിലും, 2022 ജനുവരിയിലാണ് അവർ തങ്ങളുടെ പ്രണയം ഔദ്യോഗികമായി എല്ലാവരെയും അറിയിച്ചത്.


ഒരുമിച്ചുള്ള ആദ്യത്തെ വാലന്റൈൻസ് ഡേയിൽ, കെല്ലി ഹൃദയസ്പർശിയായ ഒരു ഇൻസ്റ്റാഗ്രാം പോസ്റ്റ് പങ്കുവെച്ചു. 23 വർഷത്തെ സൗഹൃദത്തിന് ശേഷം ഞങ്ങൾ എവിടെയാണ് എത്തിച്ചേർന്നതെന്ന് എനിക്ക് വിശ്വസിക്കാൻ കഴിയുന്നില്ല! നിങ്ങൾ എന്റെ ഉറ്റസുഹൃത്തും, എന്റെ ആത്മമിത്രവും ആണ്, സിഡ് ജോർജ്ജ് വിൽസൺ, ഞാൻ നിങ്ങളെ അഗാധമായി സ്നേഹിക്കുന്നു- എന്നായിരുന്നു അത്