ഇന്നത്തെ കളിയിൽ ആ വമ്പൻ റെക്കോഡ് സ്വന്തമാക്കാൻ രോഹിത് ശർമ; വിരാട് കോഹ്ലിക്ക് മുന്നേ ആ നേട്ടത്തിലെത്താൻ അവസരം

Curated byഗോകുൽ എസ് | Samayam Malayalam | Updated: 6 May 2025, 3:17 pm

ഐപിഎല്ലിൽ ഇന്ന് നടക്കാനിരിക്കുന്ന കിടിലൻ പോരാട്ടത്തിൽ മുംബൈ ഇന്ത്യൻസും ഗുജറാത്ത് ടൈറ്റൻസും തമ്മിൽ ഏറ്റുമുട്ടാൻ ഒരുങ്ങുകയാണ്. മുംബൈ ഇന്ത്യൻസിന്റെ ഹോം ഗ്രൗണ്ടായ വാംഖഡെയിലാണ് ഈ മത്സരം നടക്കുക. തുടർച്ചയായ ആറ് മത്സരങ്ങളിൽ വിജയം നേടിയ മുംബൈ ഇന്ത്യൻസ് വിജയ പരമ്പര തുടരാമെന്ന പ്രതീക്ഷയിലാണ്. ഒരു ജയം കൂടി നേടാനായാൽ പ്ലേ ഓഫിന് വളരെ അടുത്തെത്താൻ അവർക്കാകും.രോഹിത് ശർമ കൂടി ഫോമിലേക്ക് ഉയർന്നതോടെ മുംബൈ ഇന്ത്യൻസിന്റെ കരുത്ത് ഇരട്ടിയായിട്ടുണ്ട്. സീസണിന്റെ തുടക്കത്തിൽ ഫോം കണ്ടെത്താൻ കഷ്ടപ്പെട്ടിരുന്ന രോഹിത്, കഴിഞ്ഞ കളികളിൽ തിളങ്ങിയിരുന്നു. അതേ സമയം ഇന്നത്തെ മത്സരത്തിന് ഇറങ്ങുമ്പോൾ ഐപിഎല്ലിലെ ഒരു കിടിലൻ റെക്കോഡ് സ്വന്തമാക്കാനുള്ള അവസരമാണ് രോഹിതിനെ കാത്തിരിക്കുന്നത്‌. വിരാട് കോഹ്ലിക്ക് മുന്നേ രോഹിത് ഈ നേട്ടം കൈവരിക്കുന്നത് കാണാനുള്ള ആകാംക്ഷയിലാണ് താരത്തിന്റെ ആരാധകർ എന്നതും ശ്രദ്ധേയം.


ഐപിഎല്ലിൽ 297 സിക്സറുകളാണ് ഇതുവരെ രോഹിത് ശർമയുടെ സമ്പാദ്യം. ഇന്ന് ഗുജറാത്ത് ടൈറ്റൻസിന് എതിരെ നടക്കാനിരിക്കുന്ന മത്സരത്തിൽ മൂന്ന് സിക്സറുകൾ നേടാനായാൽ ഐപിഎല്ലിൽ 300 സിക്സറുകൾ നേടുന്ന ആദ്യ ഇന്ത്യൻ ബാറ്ററെന്ന റെക്കോഡ് രോഹിതിന് സ്വന്തമാകും. മൊത്തത്തിൽ ഈ നേട്ടത്തിലെത്തുന്ന രണ്ടാമത്തെ താരമായും രോഹിതിന് മാറാം. 357 സിക്സറുകൾ ഐപിഎല്ലിൽ നേടിയിട്ടുള്ള ക്രിസ് ഗെയിലാണ് ഈ നേട്ടത്തിലെത്തിയ ആദ്യ താരം. ഇന്ത്യക്കാരിൽ കൂടുതൽ സിക്സറുകൾ നേടിയ കളിക്കാരിൽ രണ്ടാം സ്ഥാനത്തുള്ളത് വിരാട് കോഹ്ലിയാണ്. 290 സിക്സറുകളാണ് താരത്തിന്റെ സമ്പാദ്യം.

MI vs GT; എറിഞ്ഞിടാൻ ആളുണ്ടെങ്കിലും ഗുജറാത്തിനെ മുംബൈ ഭയക്കണം; മുംബൈ ഇന്ത്യൻസ് - ഗുജറാത്ത് ടൈറ്റൻസ് മത്സരത്തിൽ ടീമുകൾ ശ്രദ്ധിക്കേണ്ടത് ഇതൊക്കെ
ഐപിഎല്ലിൽ കൂടുതൽ സിക്സറുകൾ നേടിയ താരങ്ങൾ

1. ക്രിസ് ഗെയിൽ - 142 കളികളിൽ 357 സിക്സറുകൾ
2. രോഹിത് ശർമ - 267 കളികളിൽ 297 സിക്സറുകൾ
3. വിരാട് കോഹ്ലി - 263 കളികളിൽ 290 സിക്സറുകൾ
4. എം എസ്‌ ധോണി - 275 കളികളിൽ 262 സിക്സറുകൾ
5. എബി ഡിവില്ലിയേഴ്സ് - 184 കളികളിൽ 251 സിക്സറുകൾ
6. ഡേവിഡ് വാർണർ - 184 കളികളിൽ 236 സിക്സറുകൾ.

രോഹിത് ശർമ ഇമ്പാക്ട് പ്ലേയറായി കളിക്കുന്നതിന് കാരണം ഇതാണ്; അവസാനം വെളിപ്പെടുത്തി മുംബൈ ഇന്ത്യൻസ് പരിശീലക‌ൻ
അതേ സമയം 2025 സീസൺ ഐപിഎല്ലിൽ പതിയേ ഫോമിലേക്ക് എത്തിയ താരമാണ് രോഹിത് ശർമ. 10 മത്സരങ്ങളിൽ നിന്ന് 293 റൺസാണ് ഇത്തവണ താരത്തിന്റെ സമ്പാദ്യം. മൂന്ന് അർധസെഞ്ചുറികളും താരം ഇക്കുറി നേടിയിട്ടുണ്ട്.