ഇന്ന് ജയിച്ചാൽ ആർസിബിക്ക് കോളടിക്കും, കാരണം ഇങ്ങനെ; ഇനി ടീമിന്റെ ലക്ഷ്യം ഇക്കാര്യം

Curated by: ഗോകുൽ എസ്|Samayam Malayalam•23 May 2025, 12:53 pm

2025 സീസൺ ഇന്ത്യൻ പ്രീമിയർ ലീഗിൽ കിടിലൻ ഫോമിൽ കളിക്കുന്ന‌ ടീമാണ് റോയൽ ചലഞ്ചേഴ്സ് ബംഗളൂരു. ഉജ്ജ്വല പ്രകടനങ്ങൾ കാഴ്ച വെച്ച് പ്ലേ ഓഫിലെത്തിയ അവർ ആദ്യ കിരീടമാണ് ഇക്കുറി ലക്ഷ്യം വെക്കുന്നത്. നിലവിൽ 12 കളികളിൽ 17 പോയിന്റുമായി ലീഗിൽ രണ്ടാം സ്ഥാനത്താണ് ആർസിബി. ഇന്ന് സൺ റൈസേഴ്സ് ഹൈദരാബാദിന് എതിരെ ആർസിബി കളിക്കുന്നുണ്ട്. ഈ സീസണിൽ അവരുടെ പതിമൂന്നാമത് മത്സരമാണ് ഇത്. നിലവിൽ പ്ലേ ഓഫിൽ എത്തിക്കഴിഞ്ഞെങ്കിലും ഇന്നത്തെ കളിയിൽ അവർക്ക് വിജയം അനിവാര്യമാണ്‌. ഇതിന് കാരണം എന്തെന്ന് നോക്കാം.ആദ്യ രണ്ട് സ്ഥാനങ്ങളിൽ ഫിനിഷ് ചെയ്യുകയാണ് ഇനി ആർസിബിയുടെ ലക്ഷ്യം. ടോപ്‌ 2 വിൽ ഫിനിഷ് ചെയ്യുന്ന ടീമുകൾ ആദ്യ ക്വാളിഫയറിലേക്ക് യോഗ്യത നേടും. ഇവർക്ക് ഫൈനലിലെത്താൻ രണ്ട് അവസരങ്ങൾ ലഭിക്കും. ഏത് വിധേനയും ആദ്യ രണ്ട് സ്ഥാനങ്ങളിലൊന്ന് സ്വന്തമാക്കുക എന്നതാണ് അതുകൊണ്ടു തന്നെ ഇപ്പോൾ ആർസിബിയുടെ ലക്ഷ്യം.

നിലവിൽ പോയിന്റ് പട്ടികയിൽ രണ്ടാമതുള്ള ആർസിബിക്ക് ഇന്ന് ജയിക്കാനായാൽ ഗുജറാത്ത് ടൈറ്റൻസിനെ ‌പിന്തള്ളി ഒന്നാം സ്ഥാനത്തേക്ക് കയറാം. ലക്നൗവിന് എതിരായ ഒരു മത്സരം കൂടിയാണ് ഇന്നത്തെ കളിക്ക് ശേഷം ആർസിബിക്ക് ബാക്കിയുള്ളത്. ഈ രണ്ട് കളികളിലും ജയിക്കാനായാൽ ആർസിബിക്ക്‌ ടോപ് 2 ഫിനിഷ് ഉറപ്പാണ്. അവസാന രണ്ട് കളികളിൽ ഒന്നിൽ ജയിച്ചാലും അവർക്ക് ടോപ്‌ 2 ലഭിക്കാൻ സാധ്യതകൾ നിലനിൽക്കും, എന്നാൽ അതിന് മറ്റ് ചില മത്സരഫലങ്ങൾ അനുകൂലമാകണം.

Also Read: പുതിയ വിദേശ താരത്തെ ടീമിലെത്തിച്ച് ആർസിബി. പ്ലേ ഓഫിന് മുൻപ് കിടിലൻ നീക്കം.

ഇനിയുള്ള രണ്ട് കളികളിൽ ഒന്നിൽ മാത്രം വിജയിച്ചാൽ ആർസിബിയുടെ പോയിന്റ് നേട്ടം 14 കളികളിൽ 19 പോയിന്റായിരിക്കും. ഇങ്ങനെ വരുമ്പോൾ ടോപ് 2 ഫിനിഷ് ലഭിക്കാൻ ഗുജറാത്ത് അവരുടെ അവസാന മത്സരം തോൽക്കുന്നതിന് വേണ്ടി ആർസിബിക്ക് കാത്തിരിക്കേണ്ടി വരും.

ആർസിബി അവസാന രണ്ട് കളികളിലും പരാജയപ്പെടുകയാണെങ്കിൽ ടോപ് ‌2 വിൽ ഫിനിഷ് ചെയ്യാനുള്ള അവരുടെ സാധ്യതകൾ മങ്ങും.‌ ഗുജറാത്ത് ടൈറ്റൻസിന് ഇപ്പോൾത്തന്നെ 18 പോയിന്റുണ്ടെന്നതും, അവസാന രണ്ട് കളികളിൽ ഒന്നിൽ വിജയിച്ചാൽ പഞ്ചാബ് കിങ്സിന് ടോപ്‌ 2 ഉറപ്പാണെന്നതുമാണ് ഇതിന് കാരണം.

IPL 2025: ആര്‍സിബി ഡബിള്‍ സ്‌ടോങ് ആവുന്നു; തിരിച്ചെത്തുന്നത് ഒന്നാം നമ്പര്‍ വിക്കറ്റ് വേട്ടക്കാരന്‍
അതേ സമയം നഷ്ടപ്പെടാൻ ഒന്നുമില്ലാത്ത ടീമാണ് ഇന്നത്തെ കളിയിൽ റോയൽ ചലഞ്ചേഴ്സ് ബംഗളൂരുവിന്റെ എതിരാളികളായ സൺ റൈസേഴ്സ് ഹൈദരാബാദ്‌. ഇത് തന്നെയാണ് അവരെ കരുത്തരാക്കുന്നതും. 12 കളികളിൽ ഒൻപത് പോയിന്റ് മാത്രമുള്ള അവർ നിലവിൽ പോയിന്റ് പട്ടികയിൽ എട്ടാമതാണ്. അവസാന മത്സരത്തിൽ ലക്നൗ സൂപ്പർ ജയന്റ്സിനെ തകർത്തതിന് ശേഷമാ‌ണ് ഹൈദരാബാദ് സംഘം ഇന്നത്തെ കളിക്ക് ഇറങ്ങുന്നത്.