എനിക്ക് എന്തിന് മാന്‍ ഓഫ് ദ മാച്ച് അവാര്‍ഡ്? ആശ്ചര്യം പ്രകടിപ്പിച്ച് വിരാട് കോഹ്ലി

Authored byനിഷാദ് അമീന്‍ | Samayam Malayalam | Updated: 21 Apr 2025, 1:55 am

പഞ്ചാബ് കിങ്സിനെതിരായ ഐപിഎല്‍ 2025 മത്സരത്തില്‍ ആര്‍സിബിയുടെ വിജയത്തിന് ശേഷം മാന്‍ ഓഫ് ദ മാച്ച് അവാര്‍ഡ് ലഭിച്ചതില്‍ വിരാട് കോഹ്ലി (Virat Kohli) ആശ്ചര്യം പ്രകടിപ്പിച്ചു. ആര്‍സിബി ഏഴ് വിക്കറ്റിന് ജയിച്ച മാച്ചില്‍ കോഹ്‌ലി 54 പന്തില്‍ പുറത്താവാതെ 73 റണ്‍സ് നേടിയിരുന്നു.

എന്തുകൊണ്ടാണ് മാന്‍ ഓഫ് ദ മാച്ച് അവാര്‍ഡ് തനിക്ക് നല്‍കിയതെന്ന് അറിയില്ലെന്നാണ് മല്‍സര ശേഷം കോഹ്‌ലിയുടെ പ്രതികരണം. സഹതാരം ദേവദത്ത് പടിക്കലിനാണ് മത്സരത്തിലെ മികച്ച കളിക്കാരനുള്ള പുരസ്‌കാരത്തിന് തന്നേക്കാള്‍ അര്‍ഹതയെന്നും അദ്ദേഹം അഭിപ്രായപ്പെട്ടു.

ചണ്ഡീഗഡിലെ മുള്ളന്‍പൂരില്‍ നടന്ന മല്‍സരത്തില്‍ ആര്‍സിബയുടെ ടോപ് സ്‌കോററാണ് കോഹ്‌ലി. കോഹ്ലി പുറത്താവാതെ 73 റണ്‍സ് നേടിയപ്പോള്‍ ദേവ്ദത്ത് പടിക്കല്‍ ഉയര്‍ന്ന സ്‌ട്രൈക്ക് റേറ്റില്‍ 61 റണ്‍സ് നേടി. ടീമിന്റെ ഇന്നിങ്‌സ് ഭദ്രമാക്കുന്നതിനും സഹതാരങ്ങളെ അഭിവൃദ്ധിപ്പെടുത്തുന്നതിനുമാണ് കോഹ്ലി ഊന്നല്‍ നല്‍കിയത്.

35 പന്തില്‍ നിന്ന് 61 റണ്‍സ് നേടിയ ദേവ്ദത്ത് 5 ഫോറുകളും 4 ബൗണ്ടറികളും അടക്കം 174.29 എന്ന സ്‌ട്രൈക്ക് റേറ്റ് നേടിയിരുന്നു. ഏഴ് ഫോറുകളും ഒരു സിക്‌സറും സഹിതം 135 എന്ന സ്‌ട്രൈക്ക് റേറ്റിലാണ് ഇന്നിങ്‌സ് അവസാനിപ്പിച്ചത്.

കറ്റാല വന്നു, കളി മാറി... കേരള ബ്ലാസ്റ്റേഴ്‌സ് സൂപ്പര്‍ കപ്പ് ക്വാര്‍ട്ടറില്‍; ഈസ്റ്റ് ബംഗാളിനെ ഇരട്ട ഗോളിന് തകര്‍ത്തു
'ഈ അവാര്‍ഡ് ദേവദത്തിന് നല്‍കണം. എന്തുകൊണ്ടാണ് അവര്‍ എനിക്ക് അത് നല്‍കിയതെന്ന് എനിക്കറിയില്ല. ബാറ്റിങിനിടെ എനിക്ക് കൂടുതല്‍ വേഗത കൈവരിക്കണമെന്ന് തോന്നിയിരുന്നു. ദേവ് ഇന്ന് വേഗത്തില്‍ സ്‌കോര്‍ ചെയ്തു. ഒരു എന്‍ഡില്‍ പിടിച്ചുനിന്ന് സ്ഥിരത കൈവരിക്കാനായിരുന്നു എന്റെ ശ്രമം. സ്‌കോറിങ് ഉയര്‍ത്താന്‍ എനിക്ക് സാധിക്കുമായിരുന്നു. എന്നാല്‍ ഒരു എന്‍ഡ് ശക്തമായി നിര്‍ത്തുന്നതാണ് ഞങ്ങള്‍ക്ക് ഗുണമെന്ന് മനസിലാക്കി. മറ്റ് കളിക്കാരുടെ ശക്തികള്‍ പുറത്തെടുക്കാന്‍ സാഹചര്യമൊരുക്കി'- കോഹ്‌ലി പറഞ്ഞു.

ആര്‍സിബിയുടെ മൊത്തത്തിലുള്ള പ്രകടനത്തെയും ആക്രമണാത്മക ശൈലിയേയും കോഹ്ലി പ്രശംസിച്ചു. ടീമംഗങ്ങളുടെ പോരാട്ടവീര്യം കാണാന്‍ ശരിക്കും സന്തോഷമുണ്ട്. അങ്ങനെ കളിക്കുമ്പോള്‍ വിജയസാധ്യത കൂടുതലാണ്. ഞങ്ങള്‍ക്ക് വളരെ പ്രധാനപ്പെട്ട മത്സരമായിരുന്നു ഇത്. ഒരു വിജയം പോയിന്റ് പട്ടികയില്‍ വലിയ വ്യത്യാസമുണ്ടാക്കും. ഓരോ കളിയിലും രണ്ട് പോയിന്റുകള്‍ നേടുക എന്നതായിരിക്കണം മാനസികാവസ്ഥയെന്നും അദ്ദേഹം വിശദീകരിച്ചു.

ധോണിയുടെ ചെന്നൈക്ക് ആറാം തോല്‍വി; രോഹിതിന് സിക്‌സര്‍ റെക്കോഡ്, മുംബൈ മുന്നോട്ട്
മല്‍സരത്തിനിടെ നെഹാല്‍ വധേരയെ റണ്ണൗട്ടാക്കിയതില്‍ പ്രധാന പങ്കുവഹിച്ച ശേഷമുള്ള കോഹ്ലിയുടെ ആഘോഷം സോഷ്യല്‍ മീഡിയയില്‍ വൈറലായിട്ടുണ്ട്. പഞ്ചാബ് കിങ്‌സിന്റെ സോഷ്യല്‍ മീഡിയ പോസ്റ്റിനുള്ള പ്രതികരണമാണിതെന്ന് പലരും അഭിപ്രായപ്പെട്ടു. മൂന്ന് ദിവസത്തിനുള്ളില്‍ ആര്‍സിബി ശ്രേയസ് അയ്യര്‍ നയിക്കുന്ന പഞ്ചാബ് കിങ്സിനെ രണ്ടാം തവണയാണ് നേരിടുന്നത്. ഏപ്രില്‍ 18 വെള്ളിയാഴ്ച ചിന്നസ്വാമി സ്റ്റേഡിയത്തില്‍ മഴ കാരണം ഓവറുകള്‍ ചുരുക്കിയ മാച്ചില്‍ പിബികെഎസ് ആര്‍സിബിയെ അഞ്ച് വിക്കറ്റിന് തോല്‍പ്പിച്ചിരുന്നു.

നെഹാല്‍ വഡേരയുടെ വിക്കറ്റിന് ശേഷമുള്ള കോഹ്ലിയുടെ 'കോള്‍ഡ് സെലിബ്രേഷന്‍' ആണ് സോഷ്യല്‍ മീഡിയയില്‍ വൈറലായത്. പിബികെഎസിന്റെ ഔദ്യോഗിക ഇന്‍സ്റ്റാഗ്രാം അക്കൗണ്ടിലെ കോഹ്ലിയെ പരിഹസിക്കുന്ന പോസ്റ്റിനുള്ള പ്രതികരണമാണിതെന്ന് ചിലര്‍ ചൂണ്ടിക്കാട്ടി.

https://www.instagram.com/reel/DIq3VGkpP-D/?utm_source=ig_web_copy_link&igsh=MzRlODBiNWFlZA==https://www.instagram.com/reel/DIq3VGkpP-D/?utm_source=ig_web_copy_link&igsh=MzRlODBiNWFlZA==