എന്റെ ജീവിതം തലകീഴായി മറിഞ്ഞ ദിവസം, ഒരു കുടുംബം നോക്കാനുള്ള കഴിവ് എനിക്കില്ല എന്ന് പറഞ്ഞു; ഇപ്പോൾ ഞാൻ എന്നെ തന്നെ പ്രശംസിക്കുന്നു എന്ന് സോണിയ ബോസ്

Authored by: അശ്വിനി പി|Samayam Malayalam•19 May 2025, 5:31 pm

തേന്മാവിൻ കൊമ്പത്ത് എന്ന ചിത്രത്തിലെ കള്ളിപ്പൂങ്കുയിലെ ആരും മറുന്നു കാണില്ല. മോഹൻലാലിനെ കല്യാണം കഴിക്കണം എന്നാഗ്രഹിച്ച് ഗർഭിണിയാണ് എന്ന് കള്ളം പറയുന്ന കുയിൽ! തേന്മാവിൻ കൊമ്പത്ത് മാത്രമല്ല, തമിഴിലും മലയാളത്തിലും നിരവധി സിനിമകളുടെ ഭാഗമായ നടിയാണ് സോണിയ ബോസ്. ബാലതാരമായി സിനിമയിൽ എത്തിയ സോണിയ എൺപതുകൾ മുതൽ തമിഴിലും മലയാളത്തിലും നിരവധി ഹിറ്റ് സിനിമകളിൽ അഭിനയിച്ചിട്ടുണ്ട്. മലയാളത്തിലെ ആദ്യത്തെ ത്രിഡി ചിത്രമായ മൈ ഡിയർ കുട്ടിച്ചാത്തനിൽ അഭിനയിച്ച താരത്തിന് മികച്ച ബാലതാരത്തിനുള്ള ദേശീയ പുരസ്കാരവും ലഭിച്ചിരുന്നു.

സോണിയയുടെ ഭർത്താവ് ബോസ് വെങ്കടും മലയാളികൾക്ക് ഏറെ പരിചിതനാണ്. ലയേൺ, അണ്ണൻ തമ്പി, കളേഴ്സ് പോലുള്ള നിരവധി സിനിമകളിൽ വില്ലനായി അഭിനയിച്ചിട്ടുണ്ട്. സിനിമകളിൽ വില്ലനാണെങ്കിലും യഥാർത്ഥ ജീവിതത്തിൽ അല്പം റൊമാന്റിക് ആണ് ബോസ് വെങ്കട്. രണ്ട് മക്കളാണ് ഇരുവർക്കും. ഇന്ന് ബോസ് വെങ്കടിന്റെയും സോണിയ ബോസിന്റെയും ഇരുപത്തിരണ്ടാം വിവാഹ വാർഷികമാണ്. വിവാഹ വാർഷികത്തിന് സ്വയം പ്രശംയിച്ച് സോണിയ പങ്കുവച്ച ഇൻസ്റ്റഗ്രാം പോസ്റ്റാണ് സോഷ്യൽ മീഡിയയിൽ ശ്രദ്ധ നേടുന്നത്.

Also Read: സ്വപ്നം കണ്ടത് പോലെ സംഭവിക്കുന്നു; അഭിമാനവും സന്തോഷവും പങ്കുവച്ച് അഹാന കൃഷ്ണകുമാർ; നിമിഷിന് ആശംസകൾ

'എന്റെ ജീവിതം തന്നെ തല കീഴായി മറഞ്ഞി ദിവസം, മിസ്സിൽ നിന്ന് മിസിസ്സിലേക്ക് രജിസ്റ്ററായ ദിവസം, ഞാനൊരു ഭാര്യയായി എന്ന് ഗവൺമെന്റ് അപ്രൂവ് ചെയ്ത ദിവസം. ഈ ദിവസത്തെ മുൻപൊന്നും ഇല്ലാത്ത വിധം ഞാൻ എന്നെ തന്നെ പ്രശംസിക്കാൻ ആഗ്രഹിക്കുന്നു. പക്വതയില്ലാത്ത, കുട്ടിത്തമുള്ള ഇവൾക്ക് ഒരു കുടുംബത്തെ നോക്കാനുള്ള കഴിവില്ല എന്നൊക്കെയുള്ള കുറ്റപ്പെടുത്തലുകളും എതിരഭിപ്രായങ്ങളും ഞാൻ കേട്ടു. പക്ഷേ ദൈവാനുഗ്രഹത്താൽ ഒരുപാട് പരീക്ഷണങ്ങൾക്കും ക്ഷമയ്ക്കുമൊക്കെ ഒടുവിൽ അത് നിലനിർത്തി വന്നു. കുടുംബമാണ് ഭൂമിയിലെ ഏറ്റവും മനോഹരമായ ഒരു കാര്യം. ഹാപ്പി ആനിവേഴ്സറി മാമാ, ഇങ്ങനെ തന്നെ മുന്നോട്ടു പോകുക' എന്നാണ് സോണിയ കുറിച്ചത്.


സോണിയയുടെയും ബോസിന്റെയും പ്രണയ വിവാഹമാണ്. സോണിയ അന്ന് തമിഴ് മലയാളം സിനിമകളിൽ നിറഞ്ഞു നിൽക്കുന്ന നടിയായിരുന്നു. ബോസ് വെങ്കട് കരിയറിൽ എന്തെങ്കിലും ആവാനുള്ള ശ്രമത്തിലും. അന്ന് ബോസ് വെങ്കട് ചെയ്തുകൊണ്ടിരുന്ന സീരിയലും ബോസിന്റെ കതാപാത്രവും സോണിയയുടെ അമ്മയ്ക്ക് ഒരുപാട് ഇഷ്ടമായിരുന്നുവത്രെ. പക്ഷേ മകളെ വിവാഹം ചെയ്തുകൊടുക്കാനുള്ള താത്പര്യം ഉണ്ടായിരുന്നില്ല. അവസാനം കുടുംബത്തെ കൺവിൻസ് ചെയ്താണ് ഇരുവരും വിവാഹിതരായത്.