എന്റെ ഭര്‍ത്താവിനെ അത്രയും മോശക്കാരനാക്കി, എനിക്കത് അംഗീകരിക്കാന്‍ കഴിയില്ല, ദേഷ്യം തോന്നി; തുറന്നടിച്ച് ദേവയാനി

Authored byഅശ്വിനി പി | Samayam Malayalam | Updated: 8 May 2025, 5:23 pm

ദേവയാനി എന്നാല്‍ ഇപ്പോഴും സ്വന്തം വീട്ടിലെ പെണ്‍കുട്ടി, സ്ത്രീ എന്ന രീതിയിലാണ് ആളുകള്‍ കാണുന്നത്. എന്നാല്‍ പ്രേക്ഷകര്‍ക്ക് ഒട്ടും വിശ്വസിക്കാന്‍ കഴിയാത്ത വിവാഹമായിരുന്നു ദേവയാനിയുടേത്. സംവിധായകന്‍ രാജ്കുമരനുമായുള്ള പ്രണയവും ഒളിച്ചോട്ടവും വലിയ ചര്‍ച്ചയായി. ഇങ്ങനെ ഒരാള്‍ക്കൊപ്പമാണോ ഒളിച്ചോടി പോയി വിവാഹം ചെയ്തത് എന്ന് ചോദിച്ച് പലരും കളിയാക്കിയിട്ടുണ്ട്. എന്നാല്‍ അവര്‍ക്ക് മുന്നില്‍ ദേവയാനിയും ഭര്‍ത്താവും ജീവിച്ചു കാണിച്ചു. 25 വര്‍ഷത്തെ ദാമ്പത്യവും, രണ്ട് മക്കളും, ദേവയാനി വളയെ ഹാപ്പിയാണ്.

പക്ഷേ ഈ കരിയറില്‍ ദേവയാനിയെ വേദനിപ്പിച്ചത് ഒരു സിനിമ മാത്രമാണ്. 2014 ല്‍ സന്താനത്തെ നായകനാക്കി ശ്രീനാഥ് എന്ന സംവിധായകന്‍ വല്ലവന്ക്ക് പുല്ലും ആയുധം എന്ന ഒരു സിനിമ ചെയ്തിരുന്നു. സംവിധായകനായ ദേവയാനിയുടെ ഭര്‍ത്താവ് രാജ്കുമരന്‍ ചിത്രത്തില്‍ ഒരു കഥാപാത്രമായി എത്തുന്നുണ്ട്. സന്താനം ചെയ്യുന്ന നായക കഥാപാത്രം രാജ്കുമരന്റെ കഥാപാത്രത്തെ രൂപത്തിന്റെ പേരില്‍ കളിയാക്കുന്ന രംഗങ്ങളാണ് സിനിമയില്‍ മുഴുവന്‍. അത് തനിക്കൊട്ടും അംഗീകരിക്കാന്‍ സാധിച്ചിട്ടില്ല എന്ന് ദേവയാനി പറയുന്നു.

Also Read: ആ സിനിമ കണ്ടതിന് ശേഷം ഭര്‍ത്താവ് 10 ദിവസം തന്റെ അടുത്തേക്ക് വന്നില്ല എന്ന് കീര്‍ത്തി സുരേഷ്; പ്രണയം ആരാണ് ആദ്യം പ്രപ്പോസ് ചെയ്തത്?

എനിക്കിപ്പോഴും അത് അംഗീകരിക്കാന്‍ സാധിച്ചിട്ടില്ല. എനിക്ക് ദേഷ്യമാണ് തോന്നിയത്. എന്തിന് അദ്ദേഹം ആ സിനിമ ഏറ്റെടുത്തു എന്നെനിക്കറിയില്ല. ഇതുവരെ ഞാന്‍ ആ സിനിമ കണ്ടിട്ടുമില്ല. പല ക്ലിപ്‌സുകളായി കണ്ടതില്‍ തന്നെ വിഷമം തോന്നി. ഒരു സംവിധായകന്‍ എങ്ങനെ ആകാന്‍ പാടില്ല എന്ന് ഞാന്‍ മനസ്സിലാക്കി. അതിന് ശേഷം രാജ്കുമാര്‍ സര്‍ കടുഗ് എന്ന ചിത്രത്തില്‍ അഭിനയിച്ചിരുന്നു. വിജയ് മില്‍ട്ടണ്‍ ആണ് ചിത്രത്തിന്റെ സംവിധായകന്‍. എത്ര നല്ല റോളിലാണ് അദ്ദേഹം എന്റെ ഭര്‍ത്താവിനെ സിനിമയില്‍ അവതരിപ്പിച്ചത്. എനിക്കതില്‍ ഒരുപാട് ബഹുമാനം തോന്നി- ദേവയാനി പറഞ്ഞു.

വളരെ ഇന്റലിജന്റ് ആയ, ബ്രില്യന്റ് ആയ കഴിവുള്ള കലാകാരനാണ് എന്റെ ഭര്‍ത്താവ് രാജ്കുമരന്‍. പക്ഷേ അദ്ദേഹത്തിന് ആ കഴിവിനൊത്തം വളരാന്‍ സാധിച്ചില്ല. ഇപ്പോഴും നല്ല ഒരു സിനിമ ചെയ്യണം എന്ന ആഗ്രഹത്തിലാണ് അദ്ദേഹം. അത് സംഭവിക്കും എന്ന് ഞാന്‍ വിശ്വസിക്കുന്നു. ഭര്‍ത്താവ് എന്ന നിലയിലും അച്ഛന്‍ എന്ന നിലയിലും രാജ്കുമരന് ദേവയാനി നൂറി നൂറ് മാര്‍ക്ക് നല്‍കും.