ഒടുവിൽ മൗനം വെടിഞ്ഞു, കെകെആറിൽ നിന്ന് പുറത്തേക്ക് പോയത് അതുകൊണ്ട്; തുറന്നുപറഞ്ഞ് ശ്രേയസ് അയ്യർ

Authored by: അനുഷ ഗംഗാധരൻ|Samayam Malayalam•9 Sept 2025, 3:49 pm

ഇന്ത്യൻ ക്രിക്കറ്റ് ആരാധകർ ഒരു മാമാങ്കം പോലെ ആഘോഷമാക്കുന്ന ഒന്നാണ് ഇന്ത്യൻ പ്രീമിയർ ലീഗ്. ഓരോ സീസണുകൾ കഴിഞ്ഞ് പുതിയ സീസണുകൾ ആരംഭിക്കുമ്പോൾ ഒട്ടനവധി മാറ്റങ്ങളുമായി ആകും പല ടീമുകളും എത്തുക. അത്തരത്തിൽ 2024 ൽ നടന്ന മെഗാ താരലേലവുമായി ബന്ധപ്പെട്ട് വമ്പൻ മാറ്റങ്ങളാണ് ടീമുകളിൽ നടന്നത്. എന്നാൽ ഈ മാറ്റങ്ങളിൽ ആരാധകർ ഏറ്റവും കൂടുതൽ ഞെട്ടിയ ഒരു കാര്യം എന്തെന്നാൽ കൊൽക്കത്ത നൈറ്റ് റൈഡേഴ്‌സ് ശ്രേയസ് അയ്യരെ താരലേലത്തിലേക്ക് വിട്ടയച്ചതാണ്. ഏറെ കാത്തിരിപ്പിന് ശേഷം 2024 ഐപിഎൽ സീസണിൽ കൊൽക്കത്തയ്ക്ക് കിരീടം നേടിക്കൊടുത്ത ക്യാപ്റ്റൻ ആയിരുന്നിട്ടുപോലും ശ്രേയസ് അയ്യരെ ടീം ഒഴിവാക്കിയത് ആരാധകരെ തീർത്തും അത്ഭുതപ്പെടുത്തി.
Asia Cup 2025: സഞ്ജു സാംസൺ പ്ലേയിങ് 11ൽ ഉണ്ടാകുമോ? ഇന്ത്യയുടെ പദ്ധതി എന്താണ്? സൂര്യയുടെ മറുപടി വെെറൽ
താരലേലത്തിൽ 26.75 എന്ന ഐപിഎൽ ചരിത്രത്തിലെ തന്നെ ഏറ്റവും വലിയ രണ്ടാമത്തെ തുകയ്ക്ക് പഞ്ചാബ് കിങ്‌സ് സ്വന്തമാക്കുകയും ചെയ്‌തു. എന്നാൽ എന്തുകൊണ്ടാണ് കിരീടം നേടിക്കൊടുത്ത ഒരു ക്യാപ്റ്റനെ കൊൽക്കത്ത വിട്ടയച്ചത് എന്ന സംശയം ആരാധകരിൽ ഉണ്ടായിരുന്നു.

കൊൽക്കത്തയിൽ നിന്ന് പുറത്തുവന്ന ശ്രേയസ് അയ്യരും ഈ വിഷയത്തിൽ പ്രതികരിച്ചിരുന്നില്ല. ഇപ്പോഴിതാ താരം ഈ വിഷയത്തിൽ ഒടുവിൽ മൗനം വെടിഞ്ഞിരിക്കുകയാണ്. ജിക്യുവിന് നൽകിയ അഭിമുഖത്തിലാണ് ശ്രേയസ് അയ്യർ മൗനം വെടിഞ്ഞത്. നിലവിൽ തനിക്ക് പഞ്ചാബ് കിങ്സിൽ നിന്ന് ഒരു ബഹുമാനം ലഭിക്കുന്നുണ്ട്. എന്നാൽ അത്തരത്തിൽ ഒന്ന് കെകെആറിൽ നിന്ന് ലഭിച്ചിരുന്നില്ല എന്നാണ് ശ്രേയസ് പറഞ്ഞത്.

'ഒരു ക്യാപ്റ്റനെന്ന നിലയിലും പ്ലേയർ എന്ന നിലയിലും എനിക്ക് ധാരാളം കാര്യങ്ങൾ വാഗ്ദാനം ചെയ്യാൻ കഴിയും. എനിക്ക് ബഹുമാനം ലഭിച്ചാൽ എന്തും നേടാൻ കഴിയും, പഞ്ചാബിൽ സംഭവിച്ചത് ഇതാണ്. പരിശീലകരായാലും മാനേജ്‌മെന്റായാലും കളിക്കാരായാലും എനിക്ക് ആവശ്യമായ എല്ലാ പിന്തുണയും അവർ എനിക്ക് നൽകി' എന്ന് ശ്രേയസ് പറഞ്ഞു.

അതേസമയം പഞ്ചാബ് കിങ്‌സ് തനിക്ക് നൽകിയ പിന്തുണയെ കുറിച്ച് വാചാലനായ ശ്രേയസ് കെകെആറിൽ നിന്ന് തൻ അത്തരത്തിൽ ഉള്ള യാതൊന്നും അനുഭവിച്ചിട്ടില്ലെന്നും ക്യാപ്റ്റൻ എന്നതിൽ പൂർണത അനുഭവിക്കാൻ സാധിച്ചിട്ടില്ല എന്നും ടീമുമായി കൂടുതൽ ഇഴകിച്ചേരാൻ സാധിച്ചില്ലെന്നും ശ്രേയസ് തുറന്നുപറഞ്ഞു.

'ഞാൻ അവരുടെ സംഭാഷണത്തിന്റെ ഭാഗമായിരുന്നു, പക്ഷേ പൂർണ്ണമായും അതിൽ ഉണ്ടായിരുന്നില്ല. ഞാൻ ഇപ്പോൾ ഉള്ള സ്ഥാനത്ത് എത്താൻ എനിക്ക് എന്റെ വഴിയിൽ കഠിനാധ്വാനം ചെയ്യേണ്ടിവന്നു' എന്നും അയ്യർ വെളിപ്പെടുത്തി.

അതേസമയം ഓസ്‌ട്രേലിയയിൽ നടക്കുന്ന അന്വദ്യോഗിക ടെസ്റ്റ് മത്സരത്തിൽ ഇന്ത്യയെ നയിക്കുക ശ്രേയസ് അയ്യരാകും. മികച്ച ഫോമിലുള്ള താരം മിന്നും പ്രകടനം കാഴ്ചവെച്ചാൽ ഇന്ത്യൻ ടെസ്റ്റ് ടീമിലേക്ക് എൻട്രി ലഭിക്കാനുള്ള സാധ്യതയും കൂടുതലാണ് എന്നാണ് വിദഗ്ധർ പറയുന്നത്. എന്നാൽ ഇന്ത്യ - ഓസ്ട്രേലിയ അനൗദ്യോഗിക ഏകദിന പരമ്പരയ്ക്കായുള്ള ഇന്ത്യ എ ടീമിനെ ഇതുവരെ പ്രഖ്യാപിച്ചിട്ടില്ല. ഈ ടീമിലും ശ്രേയസ് അയ്യർ ഉൾപ്പെടാൻ സാധ്യത ഉണ്ട് എന്നാണ് ലഭിക്കുന്ന സൂചന.

ഇന്ന് ആരംഭിക്കുന്ന ഏഷ്യ കപ്പ് 2025 ടൂർണമെന്റിനായുള്ള ഇന്ത്യ സ്‌ക്വാഡിൽ നിന്ന് ശ്രേയസ് അയ്യരെ മാറ്റിനിർത്തിയതിൽ വലിയ രീതിയിലുള്ള പ്രതിഷേധം ഉയർന്നിരുന്നു. ചാമ്പ്യൻസ് ട്രോഫിയിൽ ഇന്ത്യയെ കിരീടത്തിലേക്ക് നയിച്ചതിലും നീണ്ട വർഷങ്ങൾക്ക് ശേഷം പഞ്ചാബ് കിങ്സിനെ ഐപിഎൽ 2025 ൽ ഫൈനലിൽ എത്തിക്കുകയും ചെയ്‌ത ഒരു താരത്തെ ഏഷ്യ കപ്പ് പോലൊരു ടൂർണമെന്റിൽ നിന്ന് മാറ്റി നിർത്തിയത് എന്തുകൊണ്ടാണ് എന്ന ചോദ്യം ആരാധകർ ഇപ്പോഴും ഉയർത്തുന്നുണ്ട്.