കളിക്കിടെ ബഡോനിയെ വഴക്കിട്ട് പന്ത്, അതും അനാവശ്യ കാര്യത്തിന്; ലക്നൗ ക്യാപ്റ്റൻ കട്ട കലിപ്പിൽ

Curated byഗോകുൽ എസ് | Samayam Malayalam | Updated: 5 May 2025, 4:26 am

2025 സീസൺ ഐപിഎല്ലിൽ ഒരിക്കൽക്കൂടി പരാജയപ്പെട്ടിരിക്കുകയാണ് ലക്നൗ സൂപ്പർ ജയന്റ്സ്. ഞായറാഴ്ച വൈകിട്ട് നടന്ന മത്സരത്തിൽ കരുത്തരായ പഞ്ചാബ് കിങ്സിനോട് 37 റൺസിനാണ് ലക്നൗവിന്റെ പരാജയം‌. മത്സരത്തിൽ ആദ്യം ബാറ്റ് ചെയ്ത പഞ്ചാബ് കിങ്സ് 236/5 എന്ന കൂറ്റൻ സ്കോർ നേടിയപ്പോൾ, ലക്നൗവിന്റെ മറുപടി 199/7 ൽ അവസാനിച്ചു. അതേ സമയം ഈ തോൽവി ടീമിന്റെ പ്ലേ ഓഫ് പ്രതീക്ഷകൾക്കും കനത്ത തിരിച്ചടി സമ്മാനിക്കുന്നതാണ്.ഈ സീസണിൽ ദയനീയ ഫോമിലുള്ള ലക്നൗ സൂപ്പർ ജയന്റ്സ് നായകൻ ഋഷഭ് പന്തിന്റെ മറ്റൊരു ഫ്ലോപ്പ് പ്രകടനമാണ് ഇന്നലെ കണ്ടത്. പടുകൂറ്റൻ വിജയലക്ഷ്യം പിന്തുടർന്ന മത്സരത്തിൽ 17 പന്തിൽ നിന്ന് 18 റൺസ് മാത്രം നേടിയാണ് താരം പുറത്തായത്. മികച്ച സ്ട്രൈക്ക് റേറ്റിൽ ബാറ്റ് വീശാനും ആത്മവിശ്വാസത്തോടെ റൺ നേടാനും പന്തിനായില്ല. ചഹലിന്റെ ഷോട്ട് ബോളുകൾ ശിക്ഷിക്കാൻ പോലും താരത്തിനായില്ല.

ബാറ്റിങ്ങ് സമയത്ത് സഹ താരം ആയുഷ് ബഡോനിയെ പ‌ന്ത് വഴക്കിടുന്നതും ക്രിക്കറ്റ് ലോകം ക‌ണ്ടു. ഇല്ലാത്ത സിംഗിളുകൾ ഓടാത്തതിനായിരുന്നു ബഡോനിക്ക്, പന്തി‌ന്റെ ശകാരം കേൾക്കേണ്ടി വന്നത്. തീർത്തും അനാവശ്യമായ ഒന്നായിരുന്നു ഇത്. മൊത്തത്തിൽ താരം അസ്വസ്ഥനായിരുന്നുവെന്ന് അദ്ദേഹത്തിന്റെ രീതികളിൽ നിന്ന് വ്യക്തമായിരുന്നു.


അതേ സമയം 2025 സീസൺ ഇന്ത്യൻ പ്രീമിയർ ലീഗിൽ ദയനീയമാണ് പന്തിന്റെ പ്രകടനം. 18, 4, 0, 3, 63, 21, 2, 2, 15 എന്നിങ്ങനെയാണ് പന്തിന്റെ സ്കോറുകൾ. പന്തിന്റെ ഈ ദയനീയ പ്രകടനം ലക്നൗവിനെയും ബാധിച്ചു. ഐപിഎല്ലിൽ ഇക്കുറി മികച്ച പ്രകടനം കാഴ്ച വെച്ച് ഇന്ത്യയുടെ ടി20 ടീമിലേക്ക് തിരിച്ചെത്താമെന്ന പ്രതീക്ഷയിലായിരുന്നു പന്ത്. എന്നാൽ നിലവിലെ ഫോമിൽ അക്കാര്യം നടക്കില്ലെ‌ന്ന് ഉറപ്പ്.

27 കോടി വെറുതെയായോ? പന്തിന് സംഭവിച്ചത് ഇതോ; പ്രതീക്ഷകൾ തകർത്ത് സൂപ്പർ താരം
അതേ സമയം ഈ സീസണിൽ കളിച്ച ആദ്യ ആറ് കളികളിൽ നാലെണ്ണത്തിലും വിജയം നേടിയ ടീമാണ് ലക്നൗ സൂപ്പർ ജയന്റ്സ്. ഇതിന് ശേഷം പക്ഷേ ടീമിന്റെ ഫോം മോശമായി. പിന്നീട് കളിച്ച അഞ്ച് മത്സരങ്ങളിൽ ഒരു ജയം മാത്രമാണ് പന്തും സംഘവും നേടിയത്. നിലവിൽ 11 കളികളിൽ 10 പോയിന്റുമായി ലീഗിൽ ഏഴാമതാണ് ലക്നൗ സൂപ്പർ ജയന്റ്സ്.‌ ശേഷിക്കുന്ന മൂന്ന് മത്സരങ്ങളിലും ജയിച്ചാലാണ് അവർക്ക് ഇനി പ്ലേ ഓഫിലെത്താ‌ൻ സാധിക്കുക.