കിടിലൻ നീക്കത്തിന് മുംബൈ ഇന്ത്യൻസ്, പകരക്കാരനായി ആ സൂപ്പർ താരത്തെ ടീമിൽ എത്തിച്ചേക്കും; സുപ്രധാന സൂചനകൾ പുറത്ത്

Curated by: ഗോകുൽ എസ്|Samayam Malayalam•16 May 2025, 6:20 pm

2025 സീസൺ ഐപിഎൽ അവസാന ഘട്ടത്തിലേക്ക് കടക്കുമ്പോൾ പല ഫ്രാഞ്ചൈസികളും ആശങ്കയിലാണ്. ടൂർണമെന്റിന്റെ പ്ലേ ഓഫിൽ പല വിദേശ താരങ്ങളും സെലക്ഷന് ലഭ്യമാകില്ലെന്നതാണ് ടീമുകൾക്ക് തലവേദനയാകുന്നത്‌. ദേശീയ ടീമുകൾക്ക് ഒപ്പം മത്സരങ്ങൾ ഉള്ളതാണ് ഇതിന് കാരണം. ഇന്ത്യ - പാക്‌ സംഘർഷങ്ങളുടെ പശ്ചാത്തലത്തിൽ ഐപിഎൽ കുറച്ചുനാൾ നിർത്തിവെക്കേണ്ടി വന്നതാണ് ഈ അവസ്ഥയിലേക്ക് ടീമുകളെ എത്തിച്ചത്. പല ടീമുകൾക്കും വിദേശ താരങ്ങളെ നഷ്ടമാകുന്ന സാഹചര്യത്തിൽ ഇവർക്ക് പകരക്കാരെ സൈൻ ചെയ്യാൻ ഫ്രാഞ്ചൈസികൾക്ക് ബിസിസിഐ അനുവാദം നൽകിയിട്ടുണ്ട്.വിദേശ താരങ്ങൾ നാട്ടിലേക്ക് മടങ്ങുന്നത് മൂലം ഏറ്റവും വലിയ തിരിച്ചടി ലഭിക്കുന്ന ടീമുകളിലൊന്നാണ് മുംബൈ ഇന്ത്യൻസ്. ടീം പ്ലേ ഓഫിൽ കടന്നാൽ വിൽ ജാക്സ്, റിയാൻ റിക്കിൾട്ടൺ, കോർബിൻ ബോഷ് എന്നിവരുടെ സേവനം അവർക്ക് ലഭിക്കില്ല. ഇത് മുന്നിൽക്കണ്ട് വിദേശ താരങ്ങളെ പകരക്കാരായി സൈൻ ചെയ്യാനുള്ള നീക്കങ്ങൾ ഫ്രാഞ്ചൈസി ആരംഭിച്ചിട്ടുണ്ട്.


ശ്രീലങ്കൻ സൂപ്പർ താരം ചരിത് അസലങ്കയെ ഇത്തരത്തിൽ പകരക്കാരനായി സൈൻ ചെയ്യാൻ മുംബൈ ഇന്ത്യൻസിന് പദ്ധതികളുണ്ടെന്നാണ് റിപ്പോർട്ട്. കരാറുമായി മുംബൈ ഇന്ത്യൻസ് താരത്തെ സമീപിച്ചെന്നാണ് സൂചനകൾ. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണങ്ങളൊന്നും വന്നിട്ടില്ല.

പ്ലേ ഓഫിന് മുൻപ് മുംബൈ ഇന്ത്യൻസിന് കനത്ത തിരിച്ചടി; ആ മൂന്ന് സൂപ്പർ താരങ്ങൾ സുപ്രധാന മത്സരങ്ങൾക്കില്ല?
ശ്രീലങ്കൻ വൈറ്റ് ബോൾ ടീമിന്റെ നായകനായ ചരിത് അസലങ്ക 58 അന്താരാഷ്ട്ര ടി20 മത്സരങ്ങളാണ് കളിച്ചിട്ടുള്ളത്. ഇതിൽ 24.45 ബാറ്റിങ് ശരാശരിയിൽ 1247 റൺസാണ് അദ്ദേഹത്തിന്റെ സമ്പാദ്യം. മൊത്തം ടി20 കരിയർ എടുത്താൽ 137 കളികളിൽ നിന്ന് 2767 റൺസാണ് അസലങ്കയുടെ സമ്പാദ്യം.

2025 സീസൺ ഇന്ത്യൻ പ്രീമിയർ ലീഗിൽ രണ്ട് ശ്രീലങ്കൻ താരങ്ങളെയാണ് ഇതുവരെ പകരക്കാരായി ഫ്രാഞ്ചൈസികൾ സൈൻ ചെയ്തത്. ദാസുൻ ഷനകയെയും, കുശാൽ മെൻഡിസിനെയും ഗുജറാത്ത് ടൈറ്റൻസാണ് ടീമിലെടുത്തത്. ചരിത് അസലങ്ക ലിസ്റ്റിലെ മൂന്നാമനാകുമോ എന്ന് കാത്തിരുന്ന് കാണാം.

WTC Final: ദക്ഷിണാഫ്രിക്കൻ ടീമിനെ പ്രഖ്യാപിച്ചു, പ്രധാന പണി മുംബൈ ഇന്ത്യൻസിന്; രണ്ട് സൂപ്പർ താരങ്ങളെ നഷ്ടമായേക്കും
2025 സീസൺ ഐപിഎൽ പോയിന്റ് പട്ടികയിൽ നിലവിൽ നാലാം സ്ഥാനത്താണ് ഹാർദിക് പാണ്ഡ്യ നയിക്കു‌ന്ന മുംബൈ ഇന്ത്യൻസ്. 12 കളികളിൽ നിന്ന് 14 പോയിന്റാണ് അവരുടെ സമ്പാദ്യം. ലീഗ് ഘട്ടത്തിൽ ഇനി രണ്ട് മത്സരങ്ങളാണ് അവർക്ക് ബാക്കിയുള്ളത്. 21 ന് ഡെൽഹി ക്യാപിറ്റൽസിന് എതിരെയും, 26 ന് പഞ്ചാബ് കിങ്സിന് എതിരെയുമാണ് ഇത്.