കിരീടം നേടിക്കൊടുത്ത ക്യാപ്റ്റനും കെകെആർ വിടുന്നു; കൊൽക്കത്തയെ രക്ഷിക്കാൻ എത്തുക മുൻ ഇംഗ്ലണ്ട് താരമോ?

Authored by: അനുഷ ഗംഗാധരൻ|Samayam Malayalam•29 Jul 2025, 7:49 pm

കൊൽക്കത്ത നൈറ്റ് റൈഡേഴ്‌സ് ( കെകെആർ ) പരിശീലകൻ ചന്ദ്രകാന്ത് പണ്ഡിറ്റ് 2026 ലെ ഐ‌പി‌എല്ലിന് മുമ്പ് ടീം വിട്ടു. കെകെആറിന് കിറടം നേടിക്കൊടുത്ത ആരാധകരുടെ പ്രിയപ്പെട്ട ക്യാപ്റ്റൻ ആണ് ഇപ്പോൾ ടീം വിട്ടിരിക്കുന്നത്. 2023ൽ ബ്രെൻഡൻ മക്കല്ലത്തിന് പകരം പണ്ഡിറ്റ് മുഖ്യ പരിശീലകനായി ചുമതലയേൽക്കുകയായിരുന്നു. ഐപിഎൽ 2025 സീസണിൽ ടീം ഏറ്റവും മോശം പ്രകടനമാണ് കാഴ്ചവെച്ചത്. ഐപിഎൽ മെഗാ താരലേലത്തിന് മുമ്പ് കിരീടം നേടിക്കൊടുത്ത ക്യാപ്റ്റൻ ശ്രേയസ് അയ്യറിനെ വരെ കെകെആർ നിലനിർത്തിയിരുന്നില്ല. ശ്രേയസിന്റെ സ്ഥാനത്തേക്ക് വന്ന അജിങ്ക്യ രഹാനെയ്ക്ക് ടീമിനെ മികച്ച രീതിയിൽ മുന്നോട്ടുകൊണ്ടുപോകാനും സാധിച്ചിരുന്നില്ല. ഇപ്പോൾ മുഖ്യ പരിശീലകൻ കൂടി ടീം വിടുമ്പോൾ അത് കെകെആർ ആരാധകർക്ക് നന്നേ നിരാശ നൽകുന്ന ഒന്നാണ്.
ഇംഗ്ലണ്ടിനെതിരെ അരങ്ങേറ്റം കുറിക്കാനൊരുങ്ങി ഇന്ത്യയുടെ യുവതാരം; നെറ്റ്സിലെ പ്രാക്റ്റീസ് ആരെയും അത്ഭുതപ്പെടുത്തുന്നത്
വെങ്കിടേഷ് അയ്യരെ 23.75 കോടി രൂപയ്ക്ക് സ്വന്തമാക്കുന്നതിൽ പണ്ഡിറ്റ് നിർണായക പങ്കുവഹിച്ചതായി റിപ്പോർട്ടുണ്ട്. നേരത്തെ മധ്യപ്രദേശിൽ അദ്ദേഹത്തെ പരിശീലിപ്പിച്ചിരുന്നത് പണ്ഡിറ്റ് ആയിരുന്നു. ഇതാണ് താരത്തെ വലിയ തുകയ്ക്ക് ടീമിലെത്തിക്കാൻ കാരണമായത്. എന്നാൽ ഐപിഎൽ 2025 സീസണിൽ വെങ്കിടേഷ് വലിയ നിരാശയായിരുന്നു. ഈ സീസണിൽ 11 മത്സരങ്ങൾ കളിച്ച വെങ്കിടേഷ് വെറും 142 റൺസാണ് നേടിയത്.

അതേസമയം പണ്ഡിറ്റിന് കീഴിൽ മൂന്ന് സീസണുകളിലായി കെകെആർ 42 മത്സരങ്ങളിൽ 22 എണ്ണത്തിൽ വിജയിച്ചപ്പോൾ 18 എണ്ണത്തിൽ തോൽക്കുകയും 2 കളികൾ റദ്ദാവുകയും ചെയ്‌തു. എക്സ് പോസ്റ്റിലൂടെയാണ് കെകെആർ മുഖ്യ പരിശീലകൻ ടീം വിടുകയാണ് എന്ന് ആരാധകരെ അറിയിച്ചത്.

'പുതിയ അവസരങ്ങൾ തേടാൻ മുഖ്യ പരിശീലകൻ ചന്ദ്രകാന്ത് പണ്ഡിറ്റ് തീരുമാനിച്ചതുകൊണ്ടുതന്നെ അദ്ദേഹം കൊൽക്കത്ത നൈറ്റ് റൈഡേഴ്‌സിന്റെ മുഖ്യ പരിശീലക സ്ഥാനത് നിന്നും രാജി വെച്ചു. 2024ൽ ടാറ്റ ഐപിഎൽ ചാമ്പ്യൻഷിപ്പിലേക്ക് കെകെആറിനെ നയിച്ചതും ശക്തവും പ്രതിരോധശേഷിയുള്ളതുമായ ഒരു ടീമിനെ കെട്ടിപ്പടുക്കാൻ സഹായിച്ചതും ഉൾപ്പെടെയുള്ള അദ്ദേഹത്തിന്റെ വിലമതിക്കാനാവാത്ത സംഭാവനകൾക്ക് ഞങ്ങൾ നന്ദി അറിയിക്കുകയാണ്. അദ്ദേഹത്തിന്റെ നേതൃത്വവും അച്ചടക്കവും ടീമിൽ ശാശ്വതമായ സ്വാധീനം ചെലുത്തിയിട്ടുണ്ട്. ഭാവിയിൽ അദ്ദേഹത്തിന് എല്ലാവിധ ആശംസകളും നേരുന്നു' എന്ന് കെകെആർ എക്‌സിൽ എഴുതി.

അതേസമയം മുഖ്യ പരിശീലകൻ പോയതോടെ ആരാകും അടുത്ത പരിശീലകൻ എന്ന ചർച്ചകളും ക്രിക്കറ്റ് പ്രേമികൾക്കിടയിൽ തുടങ്ങി കഴിഞ്ഞു. 2026 ഐപിഎൽ സീസണിൽ ഒരു ഗംഭീര തിരിച്ചുവരവാണ് ടീമും ആരാധകരും പ്രതീക്ഷിക്കുന്നത്. അതുകൊണ്ടുതന്നെ ഏറ്റവും മികച്ച പരിശീലകനെ തന്നെ ടീമിലെത്തിക്കാൻ ആയിരിക്കും മാനേജ്‌മന്റ് തീരുമാനിക്കുക.

നിലവിൽ അടുത്ത പരിശീലകൻ ആര് എന്ന ഉത്തരം കെകെആർ നൽകിയിട്ടില്ല എങ്കിലും ലഭിക്കുന്ന സൂചനകൾ അനുസരിച്ച് കെകെആർ മുൻ ക്യാപ്റ്റനും മുൻ ഇംഗ്ലണ്ട് താരവുമായ ഇയോൺ മോർഗൻ പരിശീലക സഥാനത്തേക്ക് എത്താൻ സാധ്യത കൂടുതലാണ്. അങ്ങനെയെങ്കിൽ 2026 ഐപിഎൽ സീസൺ ആരംഭിക്കുന്നതിന് മുമ്പ് മുൻ ഇംഗ്ലണ്ട് താരം പരിശീലക സ്ഥാനത്തേക്ക് എത്തിയേക്കും.