കൊൽക്കത്ത നൈറ്റ് റൈഡേഴ്സിന്റെ പരിശീലകനാകാൻ മുൻ ക്യാപ്റ്റൻ? അടുത്ത സീസണ് മുൻപ് കിടിലൻ നീക്കം നടക്കാൻ സാധ്യത

Curated by: ഗോകുൽ എസ്|Samayam Malayalam•30 Jul 2025, 2:27 pm

ഐപിഎല്ലിൽ മൂന്ന് തവണ കിരീടം നേടിയ ചരിത്രമുള്ള കൊൽക്കത്ത നൈറ്റ് റൈഡേഴ്സ് കഴിഞ്ഞ ദിവസമാണ് തങ്ങളുടെ പരിശീലകനായ ചന്ദ്രകാന്ത് പണ്ഡിറ്റുമായി വേർപിരിഞ്ഞത്‌. 2024ൽ കെകെആർ മൂന്നാം ഐപിഎൽ കിരീടത്തിൽ മുത്തമിടുമ്പോൾ അവരുടെ പരിശീലകനായിരുന്നു ചന്ദ്രകാന്ത് പണ്ഡിറ്റ്. 2025 ൽ ടീം എട്ടാം സ്ഥാനത്തായിരുന്നു പോയിന്റ് പട്ടികയിൽ ഫിനിഷ് ചെയ്തത്. ഇതാണ് അദ്ദേഹവുമായി ഫ്രാഞ്ചൈസി വേർപിരിയാൻ കാരണമെന്നാണ് കരുതപ്പെടുന്നത്.അതേ സമയം ചന്ദ്രകാന്ത് പണ്ഡിറ്റിന് പകരം കൊൽക്കത്ത നൈറ്റ് റൈഡേഴ്സിന്റെ പുതിയ പരിശീലകനാവുക ആരാണെന്ന കാര്യത്തിൽ ഫ്രാഞ്ചൈസി സൂചനകളൊന്നും പുറത്തുവിട്ടിട്ടില്ലെങ്കിലും, ടീമിന്റെ മുൻ ക്യാപ്റ്റൻ കൂടിയായ ഓയിൻ മോർഗൻ ഈ സ്ഥാനത്തേക്ക് എത്തുമെന്ന് റിപ്പോർട്ടുകൾ പുറത്തുവരുന്നുണ്ട്. പരിശീലകനായി കാര്യമായ പരിചയമില്ലാത്തയാളാണ് ഓയിൻ മോർഗൻ എന്നതാണ് ശ്രദ്ധേയം. എന്നാൽ നേരത്തെ ഇംഗ്ലണ്ടിന്റെ വൈറ്റ് ബോൾ ടീമുകളുടെ പരിശീലക സ്ഥാനത്തേക്കും മോർഗന്റെ പേര് പറഞ്ഞുകേട്ടിരുന്നു. അന്താരാഷ്ട്ര ക്രിക്കറ്റിലടക്കം ക്യാപ്റ്റനായി മികച്ച റെക്കോഡുള്ള മോർഗൻ, ഐപിഎല്ലിൽ കുറച്ചുനാൾ കെകെആറിന്റെ നായകനായിരുന്നു.


2020 സീസണിനിടക്ക് കൊൽക്കത്ത നൈറ്റ് റൈഡേഴ്സിന്റെ നായക സ്ഥാനം ഏറ്റെടുത്ത മോർഗൻ, 2021 ൽ ടീമിനെ ഐപിഎൽ ഫൈനലിൽ എത്തിച്ചിരുന്നു. 2020-21 സീസണുകളിലായി ആകെ 24 കളികളിലാണ് ഓയിൻ മോർഗൻ കൊൽക്കത്ത നൈറ്റ് റൈഡേഴ്സിനെ നയിച്ചത്. ഇതിൽ 11 ജയവും 12 തോൽവികളുമാണ് കെകെആറിനുള്ളത്. ഒരു കളി ടൈയായി.

Also Read: സണ്‍റൈസേഴ്‌സിനോട് 110 റണ്‍സിന് കെകെആര്‍ കീഴടങ്ങി. കെകെആറിന്റെ ഏറ്റവും വലിയ തോല്‍വിയാണിത്.

2019 ലെ എകദിന ലോകകപ്പിൽ ഇംഗ്ലണ്ടിനെ കിരീടത്തിലേക്ക് നയിച്ച ക്യാപ്റ്റനും ഓയിൻ മോർഗനാണ്. 2022 ലാണ് അദ്ദേഹം അന്താരാഷ്ട്ര ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചത്.

സഞ്ജു സാംസണ്‍ ഷാരൂഖ് ഖാന്റെ കെകെആറിലേക്ക്? 'ചില ഓര്‍മകള്‍ സവിശേഷമാണ്'.. വലിയ സൂചന നല്‍കി ഫേസ്ബുക്ക് പോസ്റ്റ്
നേരത്തെ ന്യൂസിലൻഡ് ഇതിഹാസം ബ്രണ്ടൻ മക്കല്ലത്തിന് പകരക്കാരനായാണ് ചന്ദ്രകാന്ത് പണ്ഡിറ്റ് കൊൽക്കത്ത നൈറ്റ് റൈഡേഴ്സിന്റെ പരിശീലകനായത്. 2023 മുതൽ ടീമിന്റെ മുഖ്യ പരിശീലകനായി അദ്ദേഹം പ്രവർത്തിച്ചു. 2023 ൽ ഏഴാം സ്ഥാനത്ത് ഫിനിഷ് ചെയ്ത കെകെആർ പക്ഷേ 2024 ൽ ഐപിഎൽ ചാമ്പ്യന്മാരായി. എന്നാൽ ടീമിന്റെ ജയത്തിന്റെ ക്രെഡിറ്റ് മുഴുവൻ പോയത് മെന്ററായിരുന്ന ഗൗതം ഗംഭീറിനാണ്. ചന്ദ്രകാന്ത് പണ്ഡിറ്റിന് കീഴിൽ 42 മത്സരങ്ങൾ കളിച്ച കെകെആർ ഇതിൽ 22 കളികളിലാണ് ജയം നേടിയത്. 18 കളികളിൽ അവർ പരാജയപ്പെട്ടപ്പോൾ, രണ്ട് മത്സരങ്ങളിൽ ഫലമുണ്ടായില്ല.