ചെന്നൈ സൂപ്പർ കിങ്സിന് വമ്പൻ നാണക്കേട്, ഐപിഎല്ലിൽ ഇതാദ്യം; ധോണിപടക്ക് ഇതെന്തു പറ്റി

Curated byഗോകുൽ എസ് | Samayam Malayalam | Updated: 1 May 2025, 11:36 am

2025 സീസൺ ഇന്ത്യൻ പ്രീമിയർ ലീഗിൽ ദയനീയ പ്രകടനമാണ് ചെന്നൈ സൂപ്പർ കിങ്സിന്റേത്. ആദ്യ 10 കളികളിൽ എട്ടെണ്ണത്തിലും അവർ പരാജയപ്പെട്ടു. ഇന്നലെ നടന്ന കളിയിൽ പഞ്ചാബ് കിങ്സിനോട് തോറ്റതോടെ പ്ലേ ഓഫ് സാധ്യതകളിൽ നിന്ന് അവർ ഔദ്യോഗികമായി പുറത്താവുകയും ചെയ്തു. സൂപ്പർ താരങ്ങളായ ഡെവോൺ കോൺവെ, റുതുരാജ് ഗെയിക്ക്വാദ് എന്നിവരുടെ പരിക്കുകളും മറ്റ് പ്രധാന താരങ്ങളുടെ ഫോമൗട്ടുമാണ് ഈ സീസണിൽ ചെന്നൈക്ക് തിരിച്ചടിയായത്. ഐപിഎല്ലിൽ അഞ്ച് തവണ കിരീടം ചൂടിയ ധോണിയുടെ ചെന്നൈ സംഘത്തിന്റെ ഈ സീസണിലെ പ്രകടനം ആരാധകരെ നിരാശയുടെ പടുകുഴിയിലേക്ക് തള്ളിയിടുന്നതാണ്.


ഇന്നലെ ഹോം ഗ്രൗണ്ടായ ചെന്നൈയിലെ ചെപ്പോക്കിൽ നടന്ന മത്സരത്തിലാണ് പഞ്ചാബ് കിങ്സിനോട് ചെന്നൈ സൂപ്പർ കിങ്സ് പരാജയപ്പെട്ടത്. 2025 സീസണിൽ ഹോം ഗ്രൗണ്ടിൽ ചെന്നൈ‌ തോൽക്കുന്ന അഞ്ചാമത്തെ മത്സരം കൂടിയായിരുന്നു ഇത്. ഐപിഎൽ ചരിത്രത്തിൽ ചെന്നൈ ഏറ്റവും കൂടുതൽ ഹോം മത്സരങ്ങൾ തോൽക്കുന്ന സീസണായും ഇതോടെ 2025 മാറി.

സഞ്ജുവിന്റെ കാര്യത്തിൽ സുപ്രധാന അപ്ഡേറ്റ് പുറത്തുവിട്ട് രാഹുൽ ദ്രാവിഡ്; രാജസ്ഥാൻ റോയൽസ് ആരാധകർക്ക് നിരാശ
ആദ്യ ഹോം മത്സരത്തിൽ മുംബൈ ഇന്ത്യൻസിനെ പരാജയപ്പെടുത്തിയതിന് ശേഷമാണ് ചെപ്പോക്കിൽ ചെന്നൈ അഞ്ച് കളികൾ തുടർച്ചയായി തോറ്റത് എന്നതാണ് ശ്രദ്ധേയം. റോയൽ ചലഞ്ചേഴ്സ് ബംഗളൂരു, ഡെൽഹി ക്യാപിറ്റൽസ്, കൊൽക്കത്ത നൈറ്റ് റൈഡേഴ്സ്, സൺ റൈസേഴ്സ് ഹൈദരാബാദ്, പഞ്ചാബ് കിങ്സ് ടീമുകളാണ് ഇക്കുറി ചെന്നൈയിൽ അതിഥേയരെ വീഴ്ത്തിയത്.

പഞ്ചാബ് കിങ്സിന് എതിരായ മത്സരത്തിൽ നാല് വിക്കറ്റിനായിരുന്നു ചെന്നൈ സൂപ്പർ കിങ്സിന്റെ തോൽവി. മത്സരത്തിൽ ആദ്യം ബാറ്റ് ചെയ്ത ചെന്നൈ 190 റൺസിന് ഓളൗട്ടായപ്പോൾ, പഞ്ചാബ് കിങ്സ് രണ്ട് പന്തുകൾ ബാക്കി നിൽക്കെ വിജയം നേടുകയായിരുന്നു. യുസ്വേന്ദ്ര ചഹൽ പഞ്ചാബിനായി ഹാട്രിക്ക് നേടിയ കളിയിൽ ശ്രേയസ് അയ്യരും, പ്രഭ്സിമ്രാൻ സിങ്ങുമായിരുന്നു പഞ്ചാബിന്റെ ബാറ്റിങ് ഹീറോസ്. പ്രഭ്സിമ്രാൻ 36 പന്തിൽ 56 റൺസും, ശ്രേയസ് അയ്യർ 41 പന്തിൽ 72 റ‌ൺസും നേടി.

ആദ്യ ഏഴിൽ രണ്ട് ഇന്ത്യൻ താരങ്ങൾ, ‌2025 സീസൺ ഐപിഎല്ലിലെ ഏറ്റവും വലിയ‌ സിക്സറുകൾ പറത്തിയത് ഇവർ
ഈ സീസണിൽ കളിച്ച 10 മത്സരങ്ങളിൽ ആകെ നാല് പോയിന്റ് മാത്രമാണ് ചെന്നൈ സൂപ്പർ കിങ്സിന്റെ സമ്പാദ്യം. മുംബൈ ഇന്ത്യൻസിന് എതിരെയും ലക്നൗ സൂപ്പർ ജയന്റ്സിന് എതിരെയുമാണ് ടീമിന് ജയിക്കാനായത്. ഇനി നാല് മത്സരങ്ങളാണ് ഈ സീസണിൽ ചെന്നൈക്ക് ബാക്കിയുള്ളത്. റോയൽ ചലഞ്ചേഴ്സ് ബംഗളൂരു, കൊൽക്കത്ത നൈറ്റ് റൈഡേഴ്സ്, രാജസ്ഥാൻ റോയൽസ്, ഗുജറാത്ത് ടൈറ്റൻസ് എന്നിവരാണ് എതിരാളികൾ.